ଭୁବନେଶ୍ୱର,୧୪/୦୩: ଏଣିକି ବିଭିନ୍ନ ବୈଜ୍ଞାନିକ ଜ୍ଞାନକୌଶଳରେ ହେବ ଜଙ୍ଗଲ ସଂରକ୍ଷଣ । ଶିମିଳିପାଳ ଭଳି ଡେବ୍ରିଗଡ଼, ଅନୁଗୁଳ ସମେତ ଅନ୍ୟ ଜଙ୍ଗଲକୁ ବି ଜଗିମ କୃତ୍ରିମ ବୁଦ୍ଧିମତ୍ତା ଯୁକ୍ତ(ଏଆଇ)ୱାଚ୍ ଟାୱାର । ଫଳରେ ଜଙ୍ଗଲରେ ଗଛଠୁ ଆରମ୍ଭ କରି ଜୀବଜନ୍ତୁଙ୍କୁ ହାନି ପହଞ୍ଚାଇବାକୁ ଉଦ୍ୟମ କଲେ ତୁରନ୍ତ ବିଭାଗୀୟ ଅଧିକାରୀଙ୍କୁ ଜଣାପଡ଼ିବ । ପୂର୍ବାପେକ୍ଷା ଭଲ ଭାବେ ଜଙ୍ଗଲ ସୁରକ୍ଷା କରାଯାଇ ପାରିବ । ୫ ‘ଜେ’ର ମନ୍ତ୍ର ଆପଣାଇବୁ ବୋଲି ଜଙ୍ଗଲ, ପରିବେଶ ଓ ଜଳବାୟୁ ବିଭାଗର ଖର୍ଚ୍ଚ ଦାବି ଆଲୋଚନା ବେଳେ ବିଭାଗୀୟ ମନ୍ତ୍ରୀ ଗଣେଶରାମ ସିଂ ଖୁଣ୍ଟିଆ କହିଛନ୍ତି ।
ଗୁରୁବାର ଜଙ୍ଗଲ, ପରିବେଶ ଓ ଜଳବାୟୁ ବିଭାଗର ଖର୍ଚ୍ଚ ଦାବି ଆଲୋଚନା ବେଳେ ମନ୍ତ୍ରୀ ଶ୍ରୀ ଖୁଣ୍ଟିଆ କହଥିଲେ, ଭାରତୀୟ ବନ ସର୍ବେକ୍ଷଣ ସଂସ୍ଥାର ରାଜ୍ୟ ଜଙ୍ଗଲ ବିବରଣୀ-୨୦୨୩ ଅନୁଯାୟୀ ରାଜ୍ୟର ସମୁଦାୟ ଜଙ୍ଗଲ ପରିମାଣ ୫୨୪୩୩.୫୬ ବର୍ଗ କିଲୋମିଟର ରହିଛି । ରାଜ୍ୟରେ ୫୫୮.୫୭ ବର୍ଗ କିଲୋମିଟର ଅଞ୍ଚଳରେ ଜଙ୍ଗଲ ଅଭିବୃଦ୍ଧି ହୋଇଛି । ଯାହା ଦେଶରେ ତୃତୀୟ ସର୍ବାଧିକ। ୩ କୋଟି ଚାରା ବଣ୍ଟନର ଲକ୍ଷ୍ୟ ରହିଛି । ସେଥିପାଇଁ ସବୁଜ ମହାନଦୀ ମିଶନରେ ୫୩ କୋଟି ବ୍ୟୟବରାଦ ରହିଛି । କାମ୍ପା ଯୋଜନାରେ ୧୦୨୦.୬୧ କୋଟି ବ୍ୟୟ ଅଟକଳ ପ୍ରସ୍ତାବ ରଖାଯାଇଛି । ଏହି ଯୋଜନାରେ ୬୯୨୨.୨୫ ହେକ୍ଟର ଜଙ୍ଗଲରେ କ୍ଷତିପୂରଣ ବନୀକରଣ, ୨୮୯୨୪.୬୫ ହେକ୍ଟରରେ ରକ୍ଷଣାବେକ୍ଷଣ ଓ ୫୦ ହଜାର ହେକ୍ଟର ଉଜୁଡ଼ା ବାଉଁଶ ଜଙ୍ଗଲ ପୁନଃ ସୃଷ୍ଟି କରାଯିବ ।
ପ୍ରଧାନମନ୍ତ୍ରୀଙ୍କ ଆହ୍ୱାନରେ ‘ଏକ୍ ପେଡ୍ ମଆ କେ ନାମ୍’ ଅଭିଯାନରେ ରାଜ୍ୟରେ ୫.୬୦କୋଟି ଚାରା ରୋପଣ କରାଯାଇଛି। ମୁଖ୍ୟମନ୍ତ୍ରୀ କେନ୍ଦୁପତ୍ର କଲ୍ୟାଣ ପାଣ୍ଠିରେ ୧୨୦ କୋଟି ରହିଛି । ବନ୍ୟଜନ୍ତ୍ରୁ ଓ ସେମାନଙ୍କ ଆବାସସ୍ଥଳୀର ସୁରକ୍ଷା ଓ ସଂରକ୍ଷଣ ପାଇଁ ୭୫ କୋଟି ବ୍ୟୟବରାଦ ହୋଇଛି । ଯାହା ପୂର୍ବ ବର୍ଷ ତୁଳନାରେ ୨୫% ଅଧିକ । ବନ୍ୟଜନ୍ତୁଙ୍କ ପାଇଁ ଜଳ ଅଭାବ ପୂରଣ କରିବାକୁ ଶହେଟି ନୂଆ ଜଳାଶୟ ଖନନ କରାଯିବ । ହାତୀ ଚଲାପଥର ଉନ୍ନତି ପାଇଁ ୨୫ କୋଟିର ବ୍ୟବସ୍ଥା ହୋଇଛି । ଯାହା ପୂର୍ବ ବର୍ଷ ତୁଳନାରେ ୨୦% ଅଧିକ ଗଜସାଥି ଯୋଜନାରେ ପ୍ରତି ଗାଁରୁ ଜଣଙ୍କୁ ନିଯୁକ୍ତି ଦିଆଯାଉଛି ।
ଚଳିତବର୍ଷ ଏଥିରେ ୨୩ ଶହ ଗ୍ରାମ ଯୋଡ଼ାଯିବ । ୨୦୦ ସୌରଚାଳିତ ଆଲୋକ ସଂଯୋଗ କରାଯିବ । ପରିବେଶ ପର୍ଯ୍ୟଟନ(ଇକୋ ଟୁରିଜିମ୍) ବାବଦରେ ୨୧ କୋଟି ଟଙ୍କା ଥିବା ବେଳେ ବର୍ତ୍ତମାନ ୫୩ଟି ରହିଛି । ଆଗାମୀ ଦିନରେ ଏହାର ସଂଖ୍ୟା ଶହେକୁ ବୃଦ୍ଧି କରାଯିବ। ଆମ ଶିମିଳିପାଳ ଯୋଜନାରେ ୫୦ କୋଟି ଥିବା ବେଳେ ନନ୍ଦନକାନନକୁ ବିଶ୍ୱସ୍ତରୀୟ କରିବାକୁ ୪୦ କୋଟି ବ୍ୟୟବରାଦ କରାଯାଇଛି । ଚିଲିକାର ପୁନରୁଦ୍ଧାର ପାଇଁ ୪.୯୯ କୋଟି ରହିଛି। ଜଙ୍ଗଲ, ପରିବେଶ ଓ ଜଳବାୟୁ ବିଭାଗର ଏଭଳି ମୋଟ ୨୫୧୨ କୋଟି ୯ଲକ୍ଷ ୭୬ହଜାରର ଖର୍ଚ୍ଚ ଦାବିକୁ ମଞ୍ଜୁର କରିବାକୁ ମନ୍ତ୍ରୀ ଶ୍ରୀ ଖୁଣ୍ଟିଆ ଅନୁରୋଧ କରିଥିଲେ । ଯାହାକୁ ଗୃହର ମଞ୍ଜୁରି ମିଳିଥିଲା ।
