ନୂଆଦିଲ୍ଲୀ: ଜମ୍ମୁ ଓ କାଶ୍ମୀରରେ ସୁରକ୍ଷାକର୍ମୀମାନେ ପହଲଗାମ ଆତଙ୍କୀ ଆକ୍ରମଣ ପରେ ଆତଙ୍କୀ ବିରୋଧୀ ଅଭିଯାନକୁ ତୀବ୍ର କରିଛନ୍ତି। ଶନିବାର କୁପୱାରାରେ ଲସ୍କର-ଏ-ତୋଇବାର ଜଣେ ଆତଙ୍କୀ ଫାରୁକ ଅହମଦଙ୍କ ଘରକୁ ସୁରକ୍ଷାକର୍ମୀମାନେ ବିସ୍ଫୋରଣ କରି ଧୂଳିସାତ କରିଦେଇଛନ୍ତି। ତେବେ ଫାରୁକ ବର୍ତ୍ତମାନ ପାକିସ୍ତାନରେ ରହିଛନ୍ତି ବୋଲି ସୂଚନା ମିଳିଛି। ଗତ ୪୮ ଘଣ୍ଟା ମଧ୍ୟରେ ଏହା ସେନାର ୬ଷ୍ଠ ତମ କାର୍ଯ୍ୟାନୁଷ୍ଠାନ।
ଏହି ଅଭିଯାନରେ ଅନ୍ୟ ଆତଙ୍କୀଙ୍କ ଘରକୁ ମଧ୍ୟ ଟାର୍ଗେଟ କରାଯାଇଛି। ଖାସକରି ଯେଉଁମାନେ ଅନନ୍ତନାଗ, ପୁଲୱାମା, ଶୋପିଆନ ଓ କୁଲଗାମରେ ରହୁଛନ୍ତି ସେମାନଙ୍କୁ ବିଶେଷ ଭାବେ ଟାର୍ଗେଟ କରାଯାଉଛି। ଗତ ଏପ୍ରିଲ ୨୫ ତାରିଖରେ ଅନନ୍ତନାଗ ଅଞ୍ଚଳର ଆଦିଲ ହୁସେନ ଥୋକରଙ୍କ ଘରକୁ ଆଇଇଡି ବ୍ଲାଷ୍ଟ ଓ ତ୍ରାଲ ଅଞ୍ଚଳର ଆସିଫ ଶେଖଙ୍କ ଘରକୁ ବୁଲଡୋଜର ଦ୍ୱାରା ଧ୍ୱଂସ କରାଯାଇଥିଲା। ଆଦିଲ ଥୋକରଙ୍କ ଉପରେ ପାକିସ୍ତାନୀ ଆତଙ୍କୀମାନଙ୍କୁ ବୈସରଣ ଉପତ୍ୟକାରେ ଆକ୍ରମଣ ପାଇଁ ସହାୟତା କରିଥିବାର ଅଭିଯୋଗ ରହିଛି।
ଅନନ୍ତନାଗ ପୁଲିସ ଆଦିଲ ଥୋକର ଓ ଦୁଇ ପାକିସ୍ତାନୀ ଆତଙ୍କୀ, ଆଲି ଭାଇ ଓ ହାସିମ ମୁସାଙ୍କ ବିରୋଧରେ ସୂଚନା ପାଇଁ ୨୦ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା କରିଛି। ଏହା ସହ ସୁରକ୍ଷାକର୍ମୀମାନେ ଏହି ଆତଙ୍କୀମାନଙ୍କୁ ଖୋଜିବା ପାଇଁ ବ୍ୟାପକ ସର୍ଚ୍ଚ ଅପରେସନ ଜାରି ରଖିଛନ୍ତି।
ପହଲଗାମରେ ଏପ୍ରିଲ ୨୨ରେ ହୋଇଥିବା ଏହି ଆତଙ୍କୀ ଆକ୍ରମଣର ଦାୟିତ୍ତ୍ୱ ଲସ୍କର-ଏ-ତୋଇବାର ଏକ ଛାୟା ସଂଗଠନ ‘ଦି ରେସିସ୍ଟାନ୍ସ ଫ୍ରଣ୍ଟ’ (ଟିଆରଏଫ) ନିଜ ଉପରକୁ ନେଇଛି। ଏହି ଆକ୍ରମଣରେ ୨୫ ଜଣ ଭାରତୀୟ ଓ ଜଣେ ନେପାଳୀ ନାଗରିକ ନିହତ ହୋଇଥିଲେ। ଏହି ଘଟଣା ପରେ ଭାରତ ସରକାର ପାକିସ୍ତାନ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ଯେଉଁଥିରେ ଇଣ୍ଡସ ଜଳ ଚୁକ୍ତି ସ୍ଥଗିତ ରଖିବା, ପାକିସ୍ତାନୀ ନାଗରିକଙ୍କ ଭିସା ବାତିଲ କରିବା ଓ ଅଟାରୀ-ୱାଘା ବର୍ଡର ବନ୍ଦ କରିବା ଭଳି ପଦକ୍ଷେପ ଅନ୍ତର୍ଭୁକ୍ତ ରହିଛି।
ସୁରକ୍ଷାକର୍ମୀମାନେ ଆତଙ୍କୀ ଓ ତାଙ୍କର ସମର୍ଥକମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଜାରି ରଖିଛନ୍ତି। ବାନ୍ଦିପୋରାରେ ତିନି ଲସ୍କର ସହଯୋଗୀଙ୍କୁ ଗିରଫ କରାଯାଇଛି ଓ କୁପୱାରାରେ ଏକ ଆତଙ୍କୀ ବଙ୍କରକୁ ଭାଙ୍ଗି ଅସ୍ତ୍ରଶସ୍ତ୍ର ଜବତ କରାଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ଆକ୍ରମଣର ଦୋଷୀମାନଙ୍କୁ ଖୋଜି ଦଣ୍ଡ ଦେବାକୁ ପ୍ରତିଶ୍ରୁତି ଦେଇଛନ୍ତି। ଜାମ୍ମୁ ଓ କାଶ୍ମୀରରେ ଶାନ୍ତି ଓ ସୁରକ୍ଷା ବଜାୟ ରଖିବା ପାଇଁ ସରକାର ଦୃଢ଼ପ୍ରତିଜ୍ଞ ବୋଲି ପିଏମ ମୋଦି କହିଛନ୍ତି।
