ଭୁବନେଶ୍ଵର, ୨୬/୧୧ : ଶୀତ ଅଧିବେଶନ ଆରମ୍ଭରୁ ଗୃହରେ ପ୍ରବଳ ହଟ୍ଟଗୋଳ। ଚାଲିପାରିଲାନି ବିଧାନସଭା। ଶୂନ୍ୟକାଳରେ ବିରୋଧୀଙ୍କ ନାରାବାଜିରେ କମ୍ପିଲା ଗୃହ। ଶୂନ୍ୟକାଳରେ ବିଜେଡି ବିଧାୟକ ରଣେନ୍ଦ୍ର ପ୍ରତାପ ସ୍ଵାଇଁ ସମ୍ବିଧାନ ମୁଖବନ୍ଧରେ ଧର୍ମନିରପେକ୍ଷ ଓ ସମାଜବାଦ ଶବ୍ଦ ନରହିବା ପ୍ରସଙ୍ଗ ଉଠାଇଥିଲେ। ବାଚସ୍ପତିଙ୍କ ଦୃଷ୍ଟି ଆକର୍ଷଣ ପାଇଁ ଦାବି କରିଥିଲେ। ଏହାକୁ କଂଗ୍ରେସ ବିଧାୟକମାନେ ମଧ୍ୟ ସମର୍ଥନ କରିଥିଲେ। ତେବେ ଉଭୟ ବିଜେଡି ଓ କଂଗ୍ରେସ ସଦସ୍ୟଙ୍କ ହଟ୍ଟଗୋଳ ଯୋଗୁଁ ବାଚସ୍ପତି ଅପରାହ୍ନ ୪ଟା ଯାଏଁ ଗୃହ ମୁଲତବୀ ଘୋଷଣା କରିଛନ୍ତି।
ସୂଚନାନୁଯାୟୀ, ବିଧାନସଭା ପରିସରରେ ଥିବା ସମ୍ବିଧାନ ମୁଖବନ୍ଧରେ ଧର୍ମନିରପେକ୍ଷ ଓ ସମାଜବାଦ ଶବ୍ଦ ନଥିବାରୁ ଏହାକୁ ହଟେଇବା ପାଇଁ ବିଜେଡି ବିଧାୟକ ରଣେନ୍ଦ୍ର ପ୍ରତାପ ସ୍ଵାଇଁ ଶୂନ୍ୟକାଳରେ ଦାବି କରିଥିଲେ। ସେ କହିଥିଲେ ଯେ, ଧର୍ମନିରପେକ୍ଷ ଏବଂ ସମାଜବାଦୀ ଶବ୍ଦ ହେଉଛି ସମ୍ଵିଧାନର ଆତ୍ମା। ଏହି ଦୁଇ ଶବ୍ଦକୁ ସମ୍ବିଧାନର ବାଦ୍ ଦେବା ଲଜ୍ଜାଜନକ।
ସେପଟେ ଏନେଇ ବିଜେପି ବିଧାୟକ ଇରାଶିଷ ଆଚାର୍ଯ୍ୟ କହିଥିଲେ ଯେ, ୧୯୭୬ରେ ୪୨ତମ ସଂଶୋଧନ ହୋଇଥିଲା। ଏଥିରେ ସମାଜବାଦୀ ଏବଂ ଧର୍ମନିରପେକ୍ଷ ଶବ୍ଦକୁ ଯୋଡାଯାଇଥିଲା। ଏହି ଦୁଇ ଶବ୍ଦକୁ ବାଦ୍ ଦେବା ପାଇଁ ସୁପ୍ରିମକୋର୍ଟରେ ପିଟିସନ ଫାଇଲ୍ ହୋଇଥିଲା। ହେଲେ ଏହାକୁ ସୁପ୍ରିମକୋର୍ଟ ଖାରଜ କରିଛନ୍ତି। ସମ୍ବିଧାନର ମୁଖବନ୍ଧରେ ଏହି ଦୁଇ ଶବ୍ଦ ରହିବ ବୋଲି ସୁପ୍ରିମକୋର୍ଟ ନିଜ ରୟରେ କହିଛନ୍ତି। ଆମେ ମଧ୍ୟ ସୁପ୍ରିମକୋର୍ଟଙ୍କ ନିଷ୍ପତ୍ତିକୁ ଗ୍ରହଣ କରିଛୁ ଏବଂ ମୁଖବନ୍ଧ ସମ୍ବିଧାନର ମୁଳ ଆତ୍ମା ବୋଲି ସ୍ଵୀକାର କରିଛୁ। ଆପଣମାନେ ଗୃହକୁ ଭ୍ରମିତ କରିବାକୁ ଚାହୁଁଛନ୍ତି। ବିଧାନସଭା ପରିସରରେ ବର୍ତ୍ତମାନ ଯେଉଁ ସମ୍ବିଧାନର ମୁଖବନ୍ଧଟି ସ୍ଥାନିତ ହୋଇଛି ତାହା ସମ୍ବିଧାନର ପ୍ରଥମ ବହି। ଇତି ମଧ୍ୟରେ ସମ୍ବିଧାନରେ ୧୧୦ଟି ସଂଶୋଧନ ସରିଲାଣି। ଆସନ୍ତାକାଲି ଆଉ ଗୋଟିଏ ସଂଶୋଧନ ହୋଇପାରେ। ତେଣୁ ସବୁବେଳେ କଣ ସମ୍ବିଧାନର ମୁଖ ପୁସ୍ତକ ପରିବର୍ତ୍ତନ କରିହେବ କି ?
ସେହିପରି ବିଜେଡିକୁ କଟାକ୍ଷ କରି ଇରାଶିଷ କହିଛନ୍ତି ଯେ, ସମ୍ବିଧାନରେ ସଂଶୋଧନ କ୍ଷମତା କେବଳ ସଂସଦ ନିକଟରେ ରହିଛି। ଯେହେତୁ ବିଜେଡିର ଜଣେ ହେଲେ ସାଂସଦ ସେଠାରେ ନାହାଁନ୍ତି ତେଣୁ ବିଜେଡି ଏହି ପ୍ରସଙ୍ଗକୁ ବିଧାନସଭାରେ ଉଠାଉଛି।
