ଦାରିଙ୍ଗବାଡି,୨୮/୫(ଆପ୍ର): ଦାରିଙ୍ଗବାଡି ବ୍ଲକ ସିମନବାଡ଼ିଠାରେ ସଫେଇ ଅଭିଯାନ ଆଳରେ ଗୋଟିଏ ଦୁଇଟି ସ୍ଥାନରୁ ଅଳିଆ ସଫା କରାଯାଇ ଅନେକ ସ୍ଥାନରୁ ଅଳିଆ ସଫା କରାଯାଇନଥିବା ଅଭିଯୋଗ ହୋଇଛି । ତେଲି ଛକଠାରୁ ରାଇକିଆ ରାସ୍ତା ମଧ୍ୟରେ ରହିଥିବା ଡ୍ରେନ ସଫେଇ ହୋଇଥିବ ବେଳେ ତେଲି ଛକଠାରୁ ଜୁଡ଼ାବାଡ଼ି ସାହି ଡ୍ରେନ ସଫେଇ ହୋଇ ନଥିବା ଫଳରେ ବର୍ତ୍ତମାନ ବର୍ଷା ହେବା ଯୋଗୁଁ ଗଦା ଗଦା ଅଳିଆ ଡ୍ରେନ ମଧ୍ୟରେ ଫସି ରହିଥିବା ଦେଖିବାକୁ ମିଳିଛି ।
ସେହିଭଳି ବନ୍ଧ ସାହିର ଶେଷ ଭାଗରେ ଅଳିଆ ସଫା କରାଯିବା ବଦଳରେ ଓଲଟ ପାଲଟ କରି ରଖି ଦିଆ ଯାଇଛି । ଏଭଳି ଭାବେ ସଫେଇ ନାମରେ କିଛି କିଛି ସ୍ଥାନ ସଫେଇ କରାଯାଇ ଅନେକ ସ୍ଥାନ ଛଡା ଯାଇ ଟଙ୍କା ହଡ଼ପ କରାଯିବା ପାଇଁ ପ୍ରୟାସ ଚାଲିଥିବା ସାଧାରଣରେ ଚର୍ଚ୍ଚା ହେଉଛି । ଯୁଡ଼ାବାଡ଼ି ଡ୍ରେନ ସଫା ନହେବା ଫଳରେ ପ୍ଲାଷ୍ଟିକ ବୋତଲ ଠାରୁ ଆରମ୍ଭ କରି ପଲିଥିନ ଓ ଅନ୍ୟାନ୍ୟ ଅଳିଆ ଜମି ରହିଥିବା ଯୋଗୁଁ ଦୁର୍ଗନ୍ଧ ହେବା ସହ ମଶା ବଂଶ ବୃଦ୍ଧି ପାଉଛି । ଫଳରେ ସାହିରେ ମଶାଙ୍କ ପ୍ରଦୃଭାବ ବଢୁଥିବା ଯୋଗୁଁ ଘରେ ହେଉ ଅବା ଘର ବାହାରେ ବସିବା ଅବା ଶୋଇବା ସମ୍ଭବପର ହେଉନାହିଁ । ଏଣୁ ବ୍ଲକ ପ୍ରଶାସନ ଏଥି ପ୍ରତି ଦୃଷ୍ଟି ଦେଇ ଜୁଡ଼ାବାଡ଼ି ସାହି ଡ୍ରେନ ସମେତ ଅଳିଆ ଜମି ରହିଥିବା ସ୍ଥାନକୁ ସଫେଇ କରିବା ପାଇଁ ଦାବି କରିଛନ୍ତି ଅଞ୍ଚଳବାସୀ ।
