ପ୍ରମୂଖ ଖବର
  • ରବିବାର ଇସ୍ରୋର ୧୦୧ତମ ଉତ୍‌କ୍ଷେପଣ, ଶ୍ରୀହରିକୋଟାରୁ ଲଞ୍ଚ୍‌ ହେବ ଇସ୍ରୋର ଇଓଏସ୍‌-୯ ମିଶନ
  • ||
  • IPL 2025: ୧୦ ଦିନ ପରେ ଫେରିଲା ଫଟାଫଟ୍ କ୍ରିକେଟ୍, ଆଜି ରୟାଲ ଚ୍ୟାଲେଞ୍ଜର୍ସକୁ ଭେଟିବ ନାଇଟ୍‌ ରାଇଡର୍ସ
  • ||
  • ଭୁବନେଶ୍ୱର : ବାଇକ୍‌ରେ ଆସି କାର୍‌ କାଚ ଭାଙ୍ଗିଲେ ଦୁର୍ବୃତ୍ତ, ଅଭିଯୁକ୍ତ ଫେରାର
  • ||
  • ବାସୁଦେବପୁର : ଭୋଜି ଖାଇ ଫେରିବା ବେଳେ ଓଲଟିଲା ଚାରି ଚକିଆ ଗାଡି, ୧୦ରୁ ଉର୍ଦ୍ଧ୍ଵ ଗୁରୁତର
  • ||
  • ମେ' ୨୦ ସୁଦ୍ଧା ଯୁକ୍ତ ଦୁଇ ପରୀକ୍ଷା ଫଳ, ଏବେ ଚୂଡ଼ାନ୍ତ ପର୍ଯ୍ୟାୟରେ ପ୍ରକ୍ରିୟା
  • ||
  • କାଳବୈଶାଖୀ ଆସିବ, ଆଶ୍ୱସ୍ତି ଦେବନି: ୬ ଦିନ ପର୍ଯ୍ୟନ୍ତ ତାପମାତ୍ରାରେ ବିଶେଷ ପରିବର୍ତ୍ତନ ସମ୍ଭାବନା କମ୍
  • ||

ରାଜଧାନୀରେ ପସରା ମେଲାଇଛି ବିହାରର ଲିଚୁ, ବାଲେଶ୍ୱର ଜାମୁରୋଳ

Published By : Prameya | May 6, 2025 9:53 AM

ଭୁବନେଶ୍ୱର, ୦୬/୦୫ : ଆମ୍ବ ପରେ ବର୍ତ୍ତମାନ ରାଜଧାନୀ ବଜାରରେ ଆସ୍ଥାନ ଜମେଇଛି ଲିଚୁ ଓ ଜାମୁରୋଳ। ପ୍ରାୟ ସପ୍ତାହେ ହୋଇଯିବ ଏହି ଦୁଇପ୍ରକାର ଫଳ ବିକ୍ରି ହେବା ଆରମ୍ଭ ହୋଇଛି । ବର୍ଷର ଥରେ ଏହି ଫଳ ବଜାରକୁ ଆସୁଥିବାରୁ ଲୋକମାନଙ୍କର ଏଥିପ୍ରତି ବେଶ୍‌ ଆଦର ରହୁଛି। ମୁଖ୍ୟତଃ ଜାମୁରୋଳ ଗାଁ ଗହଳିରେ ମିଳୁଥିବା ବେଶ୍‌ ପରିଚିତ ଫଳ । ଯାହକୁ ଲୋକମାନେ ନିଜ ବାଡ଼ି ବଗିଚାରେ ଲଗାଇବାକୁ ପସନ୍ଦ କରିଥାନ୍ତି । ଏହାର ଗଛ ବରଗଛ ପରି ବିଶାଳକାୟ ହୋଇଥାଏ । ହେଲେ ଗାଁ’ ରେ ଚାହିଦାରେ ରହୁଥିବା ଏହି ଫଳ ବର୍ତ୍ତମାନ ରାଜଧାନୀର ରାସ୍ତା କଡ଼ଠାରୁ ଆରମ୍ଭକରି ଛୋଟ ବଡ଼ ଫଳ ଦୋକାନରେ ପସରା ମେଲାଇଥିବାର ଦେଖିବାକୁ ମିଳୁଛି । ଏହା ମୁଖ୍ୟତଃ ଖରାଦିନେ ମିଳୁଥିବା ଏବଂ ଏଥିରେ ପ୍ରଚୁର ପରିମାଣରେ ଜଳୀୟ ଅଂଶ ରହୁଥିବାରୁ ରାଜଧାନୀବାସୀଙ୍କ ପସନ୍ଦ ତାଲିକାରେ ସାମିଲ ହୋଇଛି । ମୁଖ୍ୟତଃ ବେପାରୀମାନେ ଏହି ଜମୁରୋଳକୁ ବାଲେଶ୍ୱର ଜିଲ୍ଲାର ଭୋଗରାଇ ଅଞ୍ଚଳରୁ ରାଜଧାନୀକୁ ଆଣୁଛନ୍ତି । ଯାହାର ମୂଲ୍ୟ କିଲୋ ପ୍ରତି ୧୪୦ ଟଙ୍କା ରହୁଛି । 

ସେହିପରି ଭାବେ ଲିଚୁର ପସରା ରାସ୍ତାକଡ଼ଠାରୁ ବଜାର ପର୍ଯ୍ୟନ୍ତ ଦେଖିବାକୁ ମିଳୁଛି । ରାଜଧାନୀରେ ସାଧରଣତଃ ଦୁଇପ୍ରକାର ଲିଚୁ ଦେଖାଯାଇଥାଏ । ରାଜ୍ୟବାହାରୁ ଆସୁଥିବା ଲିଚୁକୁ କୁହାଯାଏ ‘ମୁମ୍ବାଇ ଲିଚୁ’ ଏବଂ ଓଡ଼ିଶାର ବିଭିନ୍ନ ଜିଲ୍ଲାରୁ ଆସୁଛି ‘ଦେଶୀ ଲିଚୁ’ । ବର୍ତ୍ତମାନ ଲିଚୁ ମୂଲ୍ୟ ଅଧିକ ଥିବାରୁ ଲୋକମାନେ ଲିଚୁ ନେବାକୁ ଆଗ୍ରହ ପ୍ରକାଶ କରୁନାହାଁନ୍ତି । ଏହି ଲିଚୁଗୁଡ଼ିକ ପଶ୍ଚିମବଙ୍ଗ, ମୁମ୍ବାଇ, ବିହାରରୁ ଆସିଥାଏ । ବର୍ତ୍ତମାନ ବିହାରରୁ ଆସିଥିବା ଲିଚୁ ବଜାରରେ ଅଧିକ ପରିମାଣରେ ଦେଖାଯାଉଛି । ସେହିପରି ଓଡ଼ିଶାର ସୁନ୍ଦରଗଡ଼, ଅନୁଗୁଳ, ଢେଙ୍କାନାଳ ଭଳି କେତେକ ଅଞ୍ଚଳରୁ ଲିଚୁ ଆସିଥାଏ । ବର୍ତ୍ତମାନ ଏହି ଲିଚୁର ମୂଲ୍ୟ କିଲୋକୁ ୨୫୦ ଟଙ୍କା ରହିଛି । 

ବିଶେଷକରି ଏକ ନମ୍ବର ହାଟ, ଶିଶୁ ଭବନ ଛକ, ଏଜି ଛକ, ସିଆରପିଏଫ, ଫାୟାର ଷ୍ଟେସନ, ୟୁନିଟି-୮, ପାୱାର ହାଉସ୍‌ ଛକ, ପ୍ରଦର୍ଶନୀ ପଡ଼ିଆ ନିକଟରେ ଜାମୁରୋଳ ଏବଂ ଲିଚୁର ପସରା ଦେଖାଯାଉଛି । ପ୍ରଦର୍ଶନୀ ପଡ଼ିଆ ନିକଟ ରାସ୍ତାରେ ଜାମୁରୋଳ ଓ ଲିଚୁ ବିକ୍ରି କରୁଥିବା ନରେନ୍ଦ୍ର ଖୁଣ୍ଟିଆ କୁହନ୍ତି, ୬ ରୁ ୭ ଦିନ ହେବ ଏହି ଦୁଇଟି ଫଳ ବଜାରକୁ ଆସିଛି । ସେଥିପାଇଁ ବେଶ୍‌ ଭଲ ବେପାର ହେବା ଆରମ୍ଭ ହୋଇନି । ବର୍ତ୍ତମାନ ଉପଲବ୍ଧ ହେଉଥିବା ଜାମୁରୋଳ ବାଲେଶ୍ୱରରୁ ଆସୁଥିବା ବେଳେ ଲିଚୁ ବିହାରରୁ ଆସୁଛି ।


Prameya Is Now On WhatsApp Join And Get Latest News Updates Delivered To You Via WhatsApp

Copyright © 2024 - Summa Real Media Private Limited. All Rights Reserved.