ଭୁବନେଶ୍ୱର, ୦୨/୦୩: ମଶା ମାରିବାକୁ କୋଟିଏ ଟଙ୍କା ଉଡ଼ାଇଲେ । ଖୋଜି ଖୋଜି ମଶା ବସାରେ ତେଲ ପକାଇଲେ । ହେଲେ ମଶାଙ୍କ ସାନ୍ଦ୍ରତା କମିବା ପରିବର୍ତ୍ତେ ଏବେ ବଢ଼ିଲାଣି । ମଶା କାମୁଡ଼ାରେ ଲୋକେ କଲବଲ ହେଲେଣି । ମଶା ତେଲ କିଣିବା ଟଙ୍କା ପାଣିରେ ପଡ଼ିଲା
ରାଜଧାନୀରେ ମଶା ନିପାତ ପାଇଁ ଗୋଟିଏ ବର୍ଷରେ ୧ କୋଟି ଟଙ୍କାରୁ ଅଧିକ ମୂଲ୍ୟର ମଶାତେଲ କିଣାଗଲାଣି । ମିଳିଥିବା ସୂଚନା ଅନୁଯାୟୀ କେବଳ ମଶାତେଲ ବାବଦରେ ଭୁବନେଶ୍ୱର ମହାନଗର ନିଗମ ଏବଂ ସ୍ୱାସ୍ଥ୍ୟ ବିଭାଗ ୨୦୨୪ ବର୍ଷରେ ୧ କୋଟି ୧୬ଲକ୍ଷ ୮୮ ହଜାର ୧୨୬ ଟଙ୍କା ଖର୍ଚ୍ଚ କରିଛି । ଏହା ସମଗ୍ର ରାଜ୍ୟରେ ଥିବା ପୌରାଞ୍ଚଳ ମଧ୍ୟରେ ସର୍ବାଧିକ । ସହରରେ ଏବେ ବିଭିନ୍ନ ସ୍ଥାନରେ ମଶାଙ୍କ ସାନ୍ଦ୍ରତା ଢେର ଅଧିକ ରହୁଛି ା ଗ୍ରୀଷ୍ମ ଲହରି ଆରମ୍ଭ ହୋଇଥିଲେ ମଧ୍ୟ ସନ୍ଧ୍ୟାରେ ଖୋଲା ସ୍ଥାନରେ ଛିଡ଼ାହେବା କଷ୍ଟକର ହୋଇପଡୁଛି । ବିଏମ୍ସିର ୬୭ଟି ୱାର୍ଡରେ ମଶାତେଲ ସିଞ୍ଚନ ପାଇଁ ପର୍ଯ୍ୟାପ୍ତ ମାନବ ସମ୍ବଳ ନଥିବା ଓ ମଶାଧୂଆଁ ଛାଡ଼ିବା ପାଇଁ ଆବଶ୍ୟକ ଯନ୍ତ୍ରପାତି ନଥିବାବେଳେ କୋଟିଏ ଟଙ୍କାରୁ ଅଧିକ ମୂଲ୍ୟର ମଶାତେଲ ବର୍ଷକ ମଧ୍ୟରେ କିଭଳି ବ୍ୟବହାର ହେଲା ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି ।
