ନୂଆଦିଲ୍ଲୀ,୧୫/୦୧: ଇପିଏଫ୍ଓର କୋଟି କୋଟି ଉପଭୋକ୍ତାଙ୍କୁ ଏଥର ବଜେଟ୍ରେ ମିଳିପାରେ ଖୁସି ଖବର । ଗଣମାଧ୍ୟମ ରିପୋର୍ଟ ଅନୁସାରେ, ଇପିଏଫ୍ଓ ସଦସ୍ୟଙ୍କ ସର୍ବନିମ୍ନ ମାସିକ ପେନ୍ସନକୁ ୧୦୦୦ ଟଙ୍କାରୁ ବଢ଼ାଇ ୭,୫୦୦ ଟଙ୍କା କରାଯାଇପାରେ । ପେନ୍ସନଭୋଗୀଙ୍କ ଏକ ପ୍ରତିନିଧିଦଳ ନିକଟରେ ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କୁ ଭେଟି ସର୍ବନିମ୍ନ ମାସିକ ପେନ୍ସନ ବଢ଼ାଇବା ଲାଗି ଦାବି କରିଛନ୍ତି । ଅର୍ଥମନ୍ତ୍ରୀ ସେମାନଙ୍କ ଦାବି ଉପରେ ବିଚାର କରିବା ପାଇଁ ଆଶ୍ୱାସନା ଦେଇଛନ୍ତି ।
ଆର୍ଥିକବର୍ଷ ୨୦୨୫-୨୬ର ବଜେଟ୍ ଫେବ୍ରୁଆରୀ ୧ରେ ଉପସ୍ଥାପିତ ହେବ । ଏହାକୁ ନେଇ ଜାନୁଆରୀ ୧୦ରେ ଇପିଏସ୍-୯୫ ନ୍ୟାସ୍ନାଲ ଏଜିଟେସନ କମିଟି କେନ୍ଦ୍ର ଅର୍ଥମନ୍ତ୍ରୀଙ୍କୁ ଭେଟିଥିଲେ । ଏହା ପୂର୍ବରୁ ଶ୍ରମିକ ସଂଗଠନଗୁଡ଼ିକ ବି ସୀତାରମଣଙ୍କ ସହ ବୈଠକ କରିଥିଲେ । ସେମାନେ ଅର୍ଥମନ୍ତ୍ରୀଙ୍କୁ ଇପିଏସ୍ ଜରିଆରେ ମିଳୁଥିବା ସର୍ବନିମ୍ନ ପେନ୍ସନକୁ ୫ ଗୁଣା କରିବା ପାଇଁ, ଅଷ୍ଟମ ବେତନ ଆୟୋଗର ତତ୍କାଳ ଗଠନ ଏବଂ ଅତି ଧନୀଙ୍କ ଉପରେ ଅଧିକ କର ଲଗାଇବା ପାଇଁ ଦାବି କରିଥିଲେ । କିନ୍ତୁ ଇପିଏସ୍-୯୫ ନ୍ୟାସ୍ନାଲ ଏଜିଟେସନ କମିଟି ୫,୦୦୦ ଟଙ୍କାର ପେନ୍ସନ ଯଥେଷ୍ଟ ନୁହେଁ ବୋଲି କହିବା ସହ ଏହା ମୂଳ ଆବଶ୍ୟକତାକୁ ବି ପୂରଣ କରିପାରିବ ନାହିଁ ବୋଲି କହିଥିଲା । ରିପୋର୍ଟ ଅନୁସାରେ କମିଟି କହିଛି ଯେ, ୨୦୨୪ରେ ସରକାର ସର୍ବନିମ୍ନ ମାସିକ ପେନ୍ସନ ୧୦୦୦ ଟଙ୍କା କରିଥିଲେ କିନ୍ତୁ କେତେକ ପେନ୍ସନଭୋଗୀଙ୍କୁ ଏବେ ବି ଏହାଠାରୁ କମ୍ ପେନ୍ସନ ମିଳୁଛି ।
