ନୂଆଦିଲ୍ଲୀ, ୩୧/୦୫ : ସିଙ୍ଗାପୁରରେ ଆୟୋଜିତ ୨୨ତମ ଶାଂଗ୍ରୀ-ଲା ଡାଇଲଗ୍ରେ ବର୍ଷିଲେ ସିଡିଏସ୍ ଜେନେରାଲ୍ ଅନିଲ ଚୌହ୍ଵାନ। ପାକିସ୍ତାନକୁ ଦେଖାଇଲେ ଆଇନା। ସିଡିଏସ୍ ଜେନେରାଲ୍ ଚୌହ୍ଵାନ କହିଛନ୍ତି ଯେ, ଭାରତ ସବୁବେଳେ ପାକିସ୍ତାନକୁ ବନ୍ଧୁତାର ହାତ ବଢାଇଛି। ହେଲେ ପାକିସ୍ତାନଠୁ ସବୁବେଳେ ଶତ୍ରୁତା ମିଳିଛି। ଏବେ ଖାଲି ଭାରତ ବଦଳିନି, ରଣନୀତି ବି ବଦଳିଛି। ଭାରତ ଏବଂ ପାକିସ୍ତାନ ଭିତରେ ସମ୍ବନ୍ଧକୁ ନେଇ ଏବେ ଆମେ ବିନା ରଣନୀତିରେ କାମ କରୁନୁ। ଯେତେବେଳେ ସ୍ଵାଧିନତା ପାଇଥିଲୁ ସେତେବେଳେ ପାକିସ୍ତାନ ଆମ ତୁଳନାରେ ଆଗରେ ଥିଲା। ସାମାଜିକ ଏବଂ ଆର୍ଥିକ କ୍ଷେତ୍ରରେ ଆଗୁଆ ଥିଲା। ହେଲେ ବର୍ତ୍ତମାନ ଅର୍ଥିକ, ମାନବ ବିକାଶ ଏବଂ ସାମାଜିକ ସଦ୍ଭାବନା କ୍ଷେତ୍ରରେ ଭାରତ ଆଗରେ। ଏହା କେବଳ ସଂଯୋଗ ଯୋଗୁଁ ସମ୍ଭବ ହୋଇନି ବରଂ ଦୀର୍ଘକାଳୀନ ରଣନୀତି ଯୋଗୁଁ ସମ୍ଭବ ହୋଇପାରିଛି।
ଭାରତ-ପାକିସ୍ତାନ ଭିତରେ ସମ୍ପର୍କକୁ ନେଇ ସିଡିଏସ୍ କହିଛନ୍ତି ଯେ, କୂଟନୈତିକ ସ୍ତରରେ ୨୦୧୪ରେ ଆମେ ପାକିସ୍ତାନ ସହ ସମ୍ପର୍କ ସୁଧାରିବାକୁ ଚେଷ୍ଟା କରିଥିଲୁ। ସେତେବେଳେ ପିଏମ୍ ମୋଦି ପାକିସ୍ତାନର ତତ୍କାଳୀନ ପ୍ରଧାନମନ୍ତ୍ରୀ ନୱାଜ ଶରିଫ୍ଙ୍କୁ ନିମନ୍ତ୍ରଣ କରିଥିଲେ। ହେଲେ କ'ଣ ହେବ ? ତାଳି ଗୋଟଏ ହାତରେ ବାଜେନି। ଆମକୁ ପାକିସ୍ତାନ ଠାରୁ ସବୁବେଳେ ଶତ୍ରୁତା ମିଳିଛି। ତେଣୁ, ବର୍ତ୍ତମାନ ପାଇଁ ପୃଥକୀକରଣ ଏକ ଭଲ ରଣନୀତି ହୋଇପାରେ।
ସିଡିଏସ୍ ଜେନେରାଲ ଅନିଲ ଚୌହାନ କହିଛନ୍ତି ଯେ 'ଆମର ସମ୍ପୂର୍ଣ୍ଣ ଧ୍ୟାନ ଏବେ ଭାରତ ମହାସାଗର ଉପରେ। ବିଶେଷକରି ଉତ୍ତର ବଙ୍ଗୋପସାଗରରେ। ଆମର ଭୂରାଜନୈତିକ ପରିସ୍ଥିତି ଏପରି ଯେ ଆମେ ଉତ୍ତର ଦିଗରୁ କିଛି କରିପାରୁ ନାହୁଁ। କାରଣ ଚୀନ୍ ସହିତ ଉତ୍ତେଜନା ଜାରି ରହିଛି। ସେପଟେ ମିଆଁମାରରେ ଅସ୍ଥିରତା ଥିବାରୁ ଆମେ ପୂର୍ବ ଦିଗରେ ମଧ୍ୟ କିଛି କରିପାରୁ ନାହୁଁ। ଆମେ ରାଜନୈତିକ ଭାବରେ ମଧ୍ୟ ଏବଂ ପଶ୍ଚିମ ଏସିଆ ସହିତ ଜଡିତ, କିନ୍ତୁ ଭୂରାଜନୈତିକ ଦୃଷ୍ଟିରୁ ପୃଥକ।
ପ୍ରକାଶ ଥାଉକି, ସିଙ୍ଗାପୁରରେ ଆୟୋଜିତ ଏହି କାର୍ଯ୍ୟକ୍ରମରେ ସିଡିଏସ୍ ଅଷ୍ଟ୍ରେଲିଆ, ୟୁରୋପୀୟ ସଙ୍ଘ, ଫ୍ରାନ୍ସ, ଜର୍ମାନୀ, ଇଣ୍ଡୋନେଶିଆ, ଜାପାନ, ନେଦରଲ୍ୟାଣ୍ଡ, ନ୍ୟୁଜିଲାଣ୍ଡ, ଫିଲିପାଇନ୍ସ, ସିଙ୍ଗାପୁର, ବ୍ରିଟେନ ସମେତ ବହୁ ଦେଶର ବରିଷ୍ଠ ପ୍ରତିରକ୍ଷା ଅଧିକାରୀ ଏବଂ ସୈନ୍ୟ ନେତାଙ୍କ ସହ ଦ୍ଵିପାକ୍ଷିକ ଆଲୋଚନା କରିଛନ୍ତି। ଏହି ବୈଠକରେ ଇଣ୍ଡୋ-ପ୍ୟାସିଫିକ୍ ଅଞ୍ଚଳରେ ସୈନ୍ୟ ସହାୟତା ବୃଦ୍ଧି ଏବଂ ପ୍ରତିରକ୍ଷା ଚୁକ୍ତି ବିଷୟରେ ଆଲୋଚନା ହୋଇଛି।
