ନୂଆଦିଲ୍ଲୀ,୨୪/୦୩: ସମସ୍ତ ସରକାରୀ ନିଯୁକ୍ତି ଲାଗି କେନ୍ଦ୍ର ସରକାର ଏକକ ନିଯୁକ୍ତି ପୋର୍ଟାଲ ଆଣିବା ଯୋଜନା ରଖିଛନ୍ତି । ଏହା ଉପରେ ଏବେ କାମ ଆରମ୍ଭ ହୋଇଥିବା କେନ୍ଦ୍ର ମନ୍ତ୍ରୀ ଜିତେନ୍ଦ୍ର ସିଂ ସୂଚନା ଦେଇଛନ୍ତି ।
କାର୍ମିକ ଏବଂ ତାଲିମ ବିଭାଗ ସମୀକ୍ଷା ବେଳେ ଶ୍ରୀ ସିଂ କହିଲେ, ଟେକ୍ନୋଲୋଜି ଭିତ୍ତିକ ସଂସ୍କାର ଏବଂ ନିଯୁକ୍ତି ପ୍ରକ୍ରିୟାକୁ ତ୍ୱରାନ୍ୱିତ କରିବା ଲାଗି କେନ୍ଦ୍ର ସରକାର ପ୍ରତିବଦ୍ଧ । ଏକକ ନିଯୁକ୍ତି ପୋର୍ଟାଲ କାର୍ଯ୍ୟକ୍ଷମ ହେଲେ ଏହା ନିଯୁକ୍ତି ଆଶାୟୀଙ୍କ ସମୟ ଏବଂ ଶକ୍ତି ଅପଚୟକୁ ରୋକିବ । ଏବେ ନିଯୁକ୍ତି ପରୀକ୍ଷା ୧୩ଟି ଭାଷାକୁ ସମ୍ପ୍ରସାରିତ ହୋଇଛି । ଏହାକୁ ସମ୍ବିଧାନର ଅଷ୍ଟମ ସୂଚୀ ଆଧାରରେ ୨୨ ଭାଷାକୁ ଶୀଘ୍ର ବୃଦ୍ଧି କରାଯିବ । ଏବେ ହାରାହାରି ନିଯୁକ୍ତି ସମୟ ୧୫ ମାସରୁ ୮ ମାସକୁ ହ୍ରାସ କରାଯାଇଛି । ଏହାକୁ ଆଗାମୀ ଦିନରେ ଆହୁରି ହ୍ରାସ କରାଯିବା ଯୋଜନା ରହିଛି ବୋଲି ଶ୍ରୀ ସିଂ ଉଲ୍ଲେଖ କରିଛନ୍ତି ।
