ଭୁବନେଶ୍ୱର,୧୦/୦୧: ଫେବ୍ରୁଆରି ୧୮ରୁ ଆରମ୍ଭ ହେବ ଯୁକ୍ତ ଦୁଇ ଥିଓରୀ ପରୀକ୍ଷା । ଏନେଇ ପ୍ରସ୍ତୁତି ଜୋରଦାର କରାଯାଉଛି । ତ୍ରୁଟିଶୂନ୍ୟ ଓ ଶୃଙ୍ଖଳିତ ପରୀକ୍ଷା କରିବା ପାଇଁ ରୋଡ୍ମ୍ୟାପ୍ ପ୍ରସ୍ତୁତ କରିଛି ଉଚ୍ଚ ମାଧ୍ୟମିକ ଶିକ୍ଷା ପରିଷଦ (ସିଏଚ୍ଏସ୍ଇ) । ଅନ୍ୟପଟେ କପି ରୋକିବା ପାଇଁ ଚଳିତ ବର୍ଷରୁ ଆରମ୍ଭ ହେବ ଜିଲ୍ଲାସ୍ତରୀୟ ସ୍କ୍ୱାଡ୍ ବ୍ୟବସ୍ଥା । ପ୍ରତି ଜିଲ୍ଲାରେ ପରୀକ୍ଷା ପରିଚାଳନା ହବ୍ ସହ ସ୍କ୍ୱାଡ୍ ଡିପୋ କରାଯିବ । ଗୋଟିଏ ଟିମ୍ରେ ୩ଜଣ ଲେଖାଏଁ ଅଧିକାରୀ ରହିବେ । ଛୋଟ ଜିଲ୍ଲା ପାଇଁ ଗୋଟିଏ ଟିମ୍ ଓ ବଡ଼ ଜିଲ୍ଲା ପାଇଁ ୨ଟି ଟିମ୍ ଗଠନ ହେବ । ସେମାନେ ପରୀକ୍ଷା ସରିବା ଯାଏ ଡିପୋରେ ରହିବେ ବୋଲି ସିଏଚ୍ଏସ୍ଇ ପରୀକ୍ଷା ନିୟନ୍ତ୍ରକ ଡ. ପ୍ରଶାନ୍ତ କୁମାର ପରିଡ଼ା ସୂଚନା ଦେଇଛନ୍ତି ।
ଡ. ପରିଡ଼ା କହିଛନ୍ତି, ପ୍ରତିବର୍ଷ ରାଜ୍ୟସ୍ତରୀୟ ସ୍କ୍ୱାଡ୍ ବ୍ୟବସ୍ଥା କରାଯାଏ । ହେଲେ ଏହି ଟିମ୍ ସବୁ ଜିଲ୍ଲାକୁ ଯାଇ ନିୟମିତ ବ୍ୟବଧାନରେ କପି ଯାଞ୍ଚ କରିବା କଷ୍ଟକର ହେଉଥିଲା । କିନ୍ତୁ ଚଳିତ ବର୍ଷରୁ ଜିଲ୍ଲାସ୍ତରୀୟ ସ୍କ୍ୱାଡ୍ ବ୍ୟବସ୍ଥା କରାଯିବ । ସେମାନେ ନିକଟସ୍ଥ କଲେଜର ଅତିଥି ଭବନରେ ରହିବେ । ସେହି ସ୍ଥାନକୁ ସ୍କ୍ୱାଡ୍ ଡିପୋ କରାଯିବ । ଗତବର୍ଷ ପରୀକ୍ଷାମୂଳକ ଭାବେ କୋରାପୁଟ, ଅନୁଗୁଳ ଓ କେନ୍ଦୁଝର ଆଦି ୩ଟି ଜିଲ୍ଲାରେ ଏହି ଜିଲ୍ଲାସ୍ତରୀୟ ସ୍କ୍ୱାଡ୍ର ବ୍ୟବସ୍ଥା ହୋଇଥିଲା । ଏହା ସଫଳ ହୋଇଥିବାରୁ ପ୍ରତିଜିଲ୍ଲାରେ ଏହାକୁ ଲାଗୁ କରାଯିବାକୁ ଯୋଜନା ହେଉଛି ।
ଏହି ସ୍କ୍ୱାଡ୍ ଟିମ୍ରେ ଜିଲ୍ଲା ବାହାର ଅଧ୍ୟାପକକୁ ସାମିଲ କରାଯିବ । ଟିମ୍ ବିଭିନ୍ନ ପରୀକ୍ଷା କେନ୍ଦ୍ରକୁ ଅଚାନକ ଗସ୍ତ କରି ଯାଞ୍ଚ କରିବେ । ସେମାନଙ୍କ ରହଣିଠୁ ଆରମ୍ଭ କରି ଖାଇବା ଓ ଗସ୍ତ ଖର୍ଚ୍ଚ ବହନ କରିବ ସିଏଚ୍ଏସ୍ଇ । ଏଥିସହ ପରିଷଦ ପକ୍ଷରୁ ଜୋନ୍ସ୍ତରୀୟ, ହବ୍ ନିରୀକ୍ଷକ ଓ ଜିଲ୍ଲାପାଳଙ୍କ ପ୍ରତିନିଧିକୁ ନେଇ ସ୍କ୍ୱାଡ୍ ଗଠନ ହେବ ।
