ଭୁବନେଶ୍ୱର,୦୪/୦୨: ଭୟଙ୍କର ରୂପ ନେଉଛି ସମୁଦ୍ର । ଉପରମୁହାଁ ହୋଇ ଆଗକୁ ମାଡ଼ି ଚାଲିଛି । ତାଜା ଆକଳନ ହେଲା- ସମୁଦ୍ର ଜଳପତ୍ତନ ଆଗକୁ ଆହୁରି ଫୁଲିବ । ଆଗାମୀ ୩ ଦଶନ୍ଧି ଭିତରେ ପ୍ରାୟ ୨ରୁ ୭ ଫୁଟ ଉପରକୁ ଉଠିପାରେ କିଛି ଅଞ୍ଚଳକୁ । ଯଦି ଏମିତି ହୁଏ, ତେବେ ସମୁଦ୍ର ଆଁରେ ପଶିଯିବ ଭିତରକନିକା ଜାତୀୟ ଉଦ୍ୟାନ, ବାଲୁଖଣ୍ଡ-କୋଣାର୍କ ବନ୍ୟପ୍ରାଣୀ ଅଭୟାରଣ୍ୟ, ଚନ୍ଦ୍ରଭାଗା ବେଳାଭୂମି ଅଞ୍ଚଳ ।
ଖାଲି ସେତିକି ନୁହେଁ, ବିଶ୍ୱପ୍ରସିଦ୍ଧ ଚିଲିକା ହ୍ରଦର ଚାରିପାଖ ଅଞ୍ଚଳକୁ ବି ସମୁଦ୍ର ବୁଡ଼ାଇ ଦେବା ଆଶଙ୍କା ରହିଛି । ଖୋଦ୍ ରାଜ୍ୟ ସରକାରଙ୍କ ଜଳବାୟୁ ପରିବର୍ତ୍ତନ ଆକ୍ସନ ପ୍ଲାନ ରିପୋର୍ଟରେ ଏଭଳି ଭୟାନକ ଆକଳନ କରାଯାଇଛି ।
ଆମେରିକାର ନ୍ୟୁ ଜର୍ସିସ୍ଥିତ ବିଜ୍ଞାନ ପତ୍ରିକା କ୍ଲାଇମେଟ୍ ସେଣ୍ଟ୍ରାଲ୍ର ରିପୋର୍ଟରେ ଏଭଳି ଭୟଙ୍କର ଆକଳନ କରାଯାଇଥିବା ରାଜ୍ୟ ସରକାରଙ୍କ ରିପୋର୍ଟରେ ଦର୍ଶାଯାଇଛି । ଲୋକସଭାରେ ଏକ ପ୍ରଶ୍ନର ଉତ୍ତରରେ କେନ୍ଦ୍ର ଜଙ୍ଗଲ ଓ ପରିବେଶ ମନ୍ତ୍ରୀ କୀର୍ତ୍ତିବର୍ଦ୍ଧନ ସିଂ ଲିଖିତ ଉତ୍ତରରେ ଦର୍ଶାଇଛନ୍ତି, ଓଡ଼ିଶାର ପ୍ରାୟ ୨୫.୬% ବେଳାଭୂମିରେ ସମୁଦ୍ର କୂଳ ଲଂଘୁଛି । ୧୪୦.୭ କିମି ବେଳାଭୂମିରେ ସମୁଦ୍ର ମାଡ଼ିବାରେ ଲାଗିଛି । ଜାତୀୟ ଉପକୂଳ ଗବେଷଣା କେନ୍ଦ୍ର (ଏନ୍ସିସିଆର୍) ରିପୋର୍ଟକୁ ଆଧାର କରି ମନ୍ତ୍ରୀ ଏହି ତଥ୍ୟ ରଖିଛନ୍ତି ।
ବିଶ୍ୱବ୍ୟାଙ୍କ ରିପୋର୍ଟ କହୁଛି, ରାଜ୍ୟର ୪୮୦ କିଲୋମିଟର ବେଳାଭୂମି ଭିତରୁ ୧୮୭ କିମିରେ ସମୁଦ୍ର ମାଡ଼ୁଛି । ଉପକୂଳ ଅବକ୍ଷୟରେ ଏହା ପ୍ରଭାବିତ । ୩୯.୩ କିଲୋମିଟର ବେଳାଭୂମି ଅତ୍ୟଧିକ ଓ ପ୍ରାୟ ୫୨ କିମି ମଧ୍ୟମ ଧରଣର ଅବକ୍ଷୟପ୍ରବଣ ବେଳାଭୂମି ।
ଗବେଷଣା ଅନୁସାରେ ପ୍ରାୟ ୩୦ ବର୍ଷ ଭିତରେ ଗଞ୍ଜାମ, ପୁରୀ, ଜଗତସିଂହପୁର, କେନ୍ଦ୍ରାପଡ଼ା, ଭଦ୍ରକ, ବାଲେଶ୍ୱର ଜିଲ୍ଲାର ଉପକୂଳ ଅଞ୍ଚଳ ପାଇଁ ସମୁଦ୍ର ଜଳପ୍ଳାବନର ବଡ଼ ଆଶଙ୍କା ରହିଛି । ଏହା ଲକ୍ଷଲକ୍ଷ ଲୋକଙ୍କୁ ପ୍ରଭାବିତ କରିବ । କ୍ଲାଇମେଟ୍ ସେଣ୍ଟ୍ରାଲ୍ ଦ୍ୱାରା ପ୍ରସ୍ତୁତ ଗବେଷଣା ପତ୍ରିକାରେ ଆକଳନ ହେଲା-୨୦୫୦ ସୁଦ୍ଧା ଗଞ୍ଜାମରୁ ବାଲେଶ୍ୱର ପର୍ଯ୍ୟନ୍ତ ବ୍ୟାପିଥିବା ସମଗ୍ର ଉପକୂଳ ଓଡ଼ିଶା ପାଇଁ ସମୁଦ୍ର ଜଳପତ୍ତନ ବୃଦ୍ଧି ଭୟାନକ ରୂପ ନେବା ଆଶଙ୍କା ରହିଛି ।
କେନ୍ଦ୍ର ଭୂବିଜ୍ଞାନ ମନ୍ତ୍ରଣାଳୟ ତଥ୍ୟ ଅନୁସାରେ ଓଡ଼ିଶାର ସାତଭାୟା ଅଞ୍ଚଳରେ ସମୁଦ୍ର ୪ ବର୍ଗ କିମି ବେଳଭୂମିକୁ ଗିଳି ଦେଇଛି । ଅର୍ଥାତ୍ ସମୁଦ୍ର କୂଳର ସମାନ୍ତରାଳ ଭାବେ ୪ କିମି ଖାଇଥିବାବେଳେ ଭିତରକୁ ପ୍ରାୟ ୧ କିମି ଯାଏଁ ମାଡ଼ି ଯାଇଛି ।
ପେଣ୍ଠ ଅଞ୍ଚଳରେ ୬ ବର୍ଗ କିମିକୁ ମାଡ଼ି ଯାଇଛି ସମୁଦ୍ର । ଏହାବାଦ୍ ସାତଭାୟା, ବାଲେଶ୍ୱର, ଧବଳେଶ୍ୱର, ଗଞ୍ଜାମ, ଆର୍ଯ୍ୟପଲ୍ଲୀ, ଗୋଲଡେନ ବିଚ୍ରେ ସମୁଦ୍ର କୂଳ ମାଡ଼ିଯାଇଛି । ଏକ ବେସରକାରୀ ରିପୋର୍ଟ ଅନୁସାରେ କେନ୍ଦ୍ରାପଡ଼ାର ପେଣ୍ଠ ପାଖ ପଦ୍ମନାଭପାଟଣା, ରାଜନଗରର ଜାଉଦିଆ, ଜମ୍ବୁ ପାଖ ସୁନୀତି, ହୁକିଟୋଲା, ହେଟାମୁଣ୍ଡିଆ, ପାରାଦୀପର ବାଘଡିଆ, ପରମାନନ୍ଦପୁର, ବାସୁଦେବପୁରର ତାଳପଦା, ଜଗତସିଂହପୁରର ଢିଙ୍କିଆ, ସାତଭାୟା, କେନ୍ଦ୍ରାପଡ଼ାର ବଡ଼ଗହିରମଥା, ପୁରୀର ସିପସରୁବାଲି, କୋଣାର୍କ ଓ ଭଦ୍ରକର ହ୍ୱିଲର ଦୀପରେ ସମୁଦ୍ର ବେଶି କୂଳ ଖାଇଛି
