ନୂଆଦିଲ୍ଲୀ: ଦିଲ୍ଲୀ ବିଧାନସଭା ନିର୍ବାଚନ ପାଇଁ ଭୋଟ୍ ୫ ଫେବୃଆରୀ ୨୦୨୫ରେ ଅନୁଷ୍ଠିତ ହେବାକୁ ଯାଉଛି। ଏହାକୁ ନେଇ ଚ୍ୟାମ୍ବର ଅଫ୍ ଟ୍ରେଡ୍ ଆଣ୍ଡ୍ ଇଣ୍ଡଷ୍ଟ୍ରୀ (CTI) କହିଛି ଯେ ଫେବୃଆରୀ ୫ ରେ ମତଦାନ ଦିନ ଜାତୀୟ ରାଜଧାନୀର ସମସ୍ତ ୭ଶହ ବଜାର ବନ୍ଦ ରହିବ। ସିଟିଆଇ ସଭାପତି ବ୍ରିଜେଶ ଗୋୟଲ କହିଛନ୍ତି ଯେ, ବ୍ୟବସାୟୀ ମାନେ ନିର୍ବାଚନ କମିଶନ ଏବଂ ଶ୍ରମ ବିଭାଗର ନିର୍ଦ୍ଦେଶ ପାଳନ ନିଶ୍ଚିତ କରିବା ଉଚିତ। ସେ କହିଛନ୍ତି ଯେ କିଛି କ୍ଷେତ୍ରରେ, ଖୁଚୁରା କ୍ଷେତ୍ରର ଦୋକାନୀ ମାନେ ଭୋଟ ଦେବା ପରେ ସନ୍ଧ୍ୟାରେ ସେମାନଙ୍କର ଦୋକାନ ଖୋଲିପାରନ୍ତି। ତଥାପି, ଗୋୟଲ କହିଛନ୍ତି ଯେ ଯଦି କୌଣସି ଦୋକାନ କିମ୍ବା କାରଖାନା ଖୋଲାଯାଏ ତେବେ କର୍ମଚାରୀ ମାନଙ୍କୁ ଦରମା ଛୁଟି ଦିଆଯିବା ଉଚିତ ଏବଂ ଦରମାରେ କୌଣସି ହ୍ରାସ କରାଯିବା ଉଚିତ୍ ନୁହେଁ।
ଦିଲ୍ଲୀ ବିଧାନସଭାର ସମସ୍ତ ୭୦ଟି ଆସନ ପାଇଁ ଫେବୃଆରୀ ୫ରେ ଭୋଟ୍ ଗ୍ରହଣ କରାଯିବ ଏବଂ ଫେବୃଆରୀ ୮ ରେ ଭୋଟ୍ ଗଣତି ହେବ। ଏକ ବିବୃତ୍ତିରେ, ସିଟିଆଇ ସମସ୍ତ ବଜାର ସଂଘ ଏବଂ ବାଣିଜ୍ୟିକ ପ୍ରତିଷ୍ଠାନ ଗୁଡ଼ିକୁ ଫେବୃଆରୀ ୫ ରେ ସେମାନଙ୍କର ଦୋକାନ ବନ୍ଦ ରଖିବାକୁ ନିର୍ଦ୍ଦେଶ ଦେଇଛି। ଶିଳ୍ପାଞ୍ଚଳ ଗୁଡ଼ିକରେ ମଧ୍ୟ ଛୁଟି ରହିବ। ସିଟିଆଇର ସାଧାରଣ ସମ୍ପାଦକ ଗୁରମିତ୍ ଆରୋରା ଗୁରୁତ୍ୱାରୋପ କରି କହିଛନ୍ତି ଯେ ଦିଲ୍ଲୀ ସରକାର ପୂର୍ବରୁ ନିର୍ଦ୍ଦେଶ ଜାରି କରିସାରିଛନ୍ତି ଯେ ଦୋକାନ, ହୋଟେଲ, ରେଷ୍ଟୁରାଣ୍ଟ, ରିସର୍ଟ ଏବଂ ଶିଳ୍ପ ୟୁନିଟ୍ ସମେତ ସମସ୍ତ ବାଣିଜ୍ୟିକ ପ୍ରତିଷ୍ଠାନ ଭୋଟ ଦାନ ଦିନ କର୍ମଚାରୀ ମାନଙ୍କୁ କୌଣସି ଦରମା କାଟ ନକରି ଛୁଟି ପ୍ରଦାନ କରିବେ।
ଶ୍ରମ ବିଭାଗ ମଧ୍ୟ ଜନପ୍ରତିନିଧିତ୍ୱ ଆଇନ, ୧୯୫୧ର ଧାରା ୧୩୫ଖ ଅନୁଯାୟୀ ଏକ ନିର୍ଦ୍ଦେଶ ଜାରି କରିଛି, ଯେଉଁଥିରେ ଯେକୌଣସି ବୃତ୍ତି, ବାଣିଜ୍ୟ କିମ୍ବା ଶିଳ୍ପ ସଂସ୍ଥାରେ ନିୟୋଜିତ ପ୍ରତ୍ୟେକ କର୍ମଚାରୀଙ୍କୁ ଭୋଟ ଦେବା ପାଇଁ ଛୁଟି ନେବାର ଅଧିକାର ରହିଛି।
