ପାଟନା: ବିହାରରେ ଭୋଟର ତାଲିକାର ସ୍ୱତନ୍ତ୍ର ବ୍ୟାପକ ସଂଶୋଧନ (SIR) କୁ ନେଇ ବିବାଦ ଲାଗି ରହିଛି । ଏବେ ପଶ୍ଚିମବଙ୍ଗରେ ସାର୍ ଲାଗୁ କରିବାକୁ ଦାବି କରିଛି ଭାରତୀୟ ଜନତା ପାର୍ଟି । ଦଳର ରାଜ୍ୟ ସଭାପତି ସମିକ ଭଟ୍ଟାଚାର୍ଯ୍ୟ କହିଛନ୍ତି ଯେ, ବେଙ୍ଗଲରେ ଭୋଟର ତାଲିକାର ବ୍ୟାପକ ସଂଶୋଧନ ଆବଶ୍ୟକ । ଯଦି ଏହା କରା ନ ଯାଏ, ତେବେ ପଶ୍ଚିମବଙ୍ଗ ବାଂଲାଦେଶରେ ପରିଣତ ହୋଇପାରେ । ସେ ଦାବି କରିଛନ୍ତି ଯେ, ପଶ୍ଚିମବଙ୍ଗରେ ଜନସଂଖ୍ୟାଗତ ଏବଂ ଆଇନ ଶୃଙ୍ଖଳା ସମସ୍ୟା ଯୋଗୁଁ ରାଜ୍ୟ ଭିତରେ ଏକ ଚିନ୍ତାଜନକ ପରିସ୍ଥିତି ରହିଛି। ମମତା ବାନାର୍ଜୀ କହିଛନ୍ତି, ପଶ୍ଚିମବଙ୍ଗ ସମୃଦ୍ଧ ହେଉଛି, ଯଦି ଏହା ପ୍ରକୃତରେ ସତ ତେବେ ରାଜ୍ୟରୁ ଏତେ ଲୋକ କାହିଁକି ସ୍ଥାନାନ୍ତରିତ ହେଉଛନ୍ତି ବୋଲି ସମିକ ପ୍ରଶ୍ନ କରିଛନ୍ତି ।
ସେ ଆହୁରି କହିଛନ୍ତି, ଦେଶର ମୋଟ ନକଲି ଟଙ୍କାର ୭୨% ପଶ୍ଚିମବଙ୍ଗର ମାଲଦା ଜିଲ୍ଲାରୁ ଆସୁଛି। ପଶ୍ଚିମବଙ୍ଗରେ SIR କାର୍ଯ୍ୟକାରୀ ହେବା ଉଚିତ । ନଚେତ୍ ଏହା ପଶ୍ଚିମ ବାଂଲାଦେଶ ହୋଇଯିବ । ଏଠାରେ ମଧ୍ୟଯୁଗର ଏକ ଝଲକ ଦେଖିବାକୁ ମିଳିବ । ପଶ୍ଚିମବଙ୍ଗର ସଂଖ୍ୟାଗରିଷ୍ଠ ସମ୍ପ୍ରଦାୟ ଏକଜୁଟ ହୋଇଛନ୍ତି। ସମିକ ଭଟ୍ଟାଚାର୍ଯ୍ୟଙ୍କ ଏହି ମନ୍ତବ୍ୟ ଏପରି ସମୟରେ ଆସିଛି ଯେତେବେଳେ ବିହାରରେ ଭୋଟର ତାଲିକାର ସ୍ୱତନ୍ତ୍ର ବ୍ୟାପକ ସଂଶୋଧନକୁ ନେଇ ହଙ୍ଗାମା ଚାଲିଛି।
ବିହାରରେ ଭୋଟର ତାଲିକାରେ ଚାଲିଥିବା ସ୍ୱତନ୍ତ୍ର ବ୍ୟାପକ ସଂଶୋଧନ ବିବାଦ ସୃଷ୍ଟି କରିଛି। ଯାହାକୁ ନେଇ ବିରୋଧୀ ଅଭିଯୋଗ କରିଛନ୍ତି ଯେ, ଭୋଟର ତାଲିକାରୁ ବହୁ ସଂଖ୍ୟକ ଲୋକଙ୍କ ନାମ ବାଦ ଦେବାକୁ ପ୍ରୟାସ କରାଯାଉଛି । ବିହାରରେ ନିର୍ବାଚନ କମିଶନଙ୍କ ଦ୍ୱାରା କରାଯାଉଥିବା SIR ପ୍ରକ୍ରିୟା ଉପରେ ଆଲୋଚନା ସମ୍ପର୍କରେ ଗୃହର କାର୍ଯ୍ୟକୁ ସ୍ଥଗିତ ରଖିବା ପାଇଁ ଦାବି କରାଯାଇଥିଲା । ଯାହାକୁ ନେଇ ଏକ ନୋଟିସ ମଧ୍ୟ ଉପସ୍ଥାପିତ ହୋଇଥିଲା । ଏପରିକି ଭୋଟର ତାଲିକାରେ ସଂଶୋଧନ ଉପରେ ମଧ୍ୟ ଚିନ୍ତା ପ୍ରକାଶ କରିଥିଲେ ବିରୋଧୀ ।
ବିଜେପିର ରାଜ୍ୟ ସଭାପତି ସମିକ ଭଟ୍ଟାଚାର୍ଯ୍ୟ SIR ଲାଗୁ କରିବାକୁ ଦାବି କରୁଥିବା ବେଳେ ବିରୋଧୀ ଦଳ ନେତା ଶୁଭେନ୍ଦୁ ଅଧିକାରୀ ବଡ଼ ଅଭିଯୋଗ ବି ଆଣିଛନ୍ତି । ସେ କହିଛନ୍ତି, ବେଙ୍ଗଲରେ ବର୍ତ୍ତମାନ ସମୟରେ ୧.୨୫ କୋଟି ନକଲି ଭୋଟର ଅଛନ୍ତି । ଭୋଟର ତାଲିକାର ବ୍ୟାପକ ସଂଶୋଧନ ହେଲେ ସେମାନଙ୍କୁ ନିଜ ସ୍ଥାନକୁ ପଠାଯାଇ ପାରିବ । ସେପଟେ ଶାସକ ଟିଏମସି ତାଙ୍କର ଏହି ଦାବିକୁ ଖଣ୍ଡନ କରିଛି ।
