ଫିରିଙ୍ଗିଆ, ୧୮/୬ : ସରକାରଙ୍କ ତରଫରୁ ଗରିବ ଅସହାୟଙ୍କୁ ରହିବା ପାଇଁ ଆବାସ ଯୋଜନା ମାଧ୍ୟମରେ ଘର ଯୋଗାଇ ଦିଆଯାଉଥିବାବେଳେ ଯୋଗ୍ୟ ହିତାଧିକାରୀ ଆଜି ପର୍ଯ୍ୟନ୍ତ ଘର ଖଣ୍ଡିଏ ପାଇଁ ଧାଇଁ ଧାଇଁ ନୟାନ୍ତ ହେଲେ ମଧ୍ୟ ଆବାସ ଗୃହ ମିଳିପାରୁ ନାହିଁ l ଯାହାଦ୍ୱାରା ଅଯୋଗ୍ୟ ହିତାଧିକାରୀ କଳେ ବଳେ କୌଶଳେ ଆବାସ ଗୃହ ହାତଉଥିବା ଅଭିଯୋଗ ହେଉଛି । ଫଳରେ ପ୍ରକୃତ ହିତାଧିକାରୀ ଆବାସ ଗୃହ ନ ମିଳିବା ଦ୍ୱାରା ବର୍ଷ ବର୍ଷ ଧରି ଭଙ୍ଗା ଦଦରା କୁଡ଼ିଆ କିମ୍ବା ଜରି ପାଲ ତଳେ ଜୀବନ ଅତିବାହିତ କରୁଥିବା ଦେଖିବାକୁ ମିଳୁଛି l ଏଭଳି ଏକ ଭଙ୍ଗା ଘରେ  ଜରି ପାଲ ଟାଣି ରହୁଥିବା ସହ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଥିବା ଦେଖିବାକୁ ମିଳିଛି କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ ବାଳନ୍ଦା ପଡ଼ା ପଞ୍ଚାୟତ ବାଉପାଙ୍ଗା ନିକଟ ଘିଉ ଗାଡ଼ି ଗାଁରେ l 

ସୂଚନା ଅନୁସାରେ, ଘିଉ ଗାଡ଼ି ଗାଁରେ ଦୀର୍ଘ ବର୍ଷ ହେବ ମନ୍ଧ ଦିଗାଲ ନାମକ ବ୍ୟକ୍ତି ନିଜ ମା’, ସ୍ତ୍ରୀ ଏବଂ ପିଲା ଛୁଆଙ୍କୁ ନେଇ ୫ଜଣ ସଦସ୍ୟ ଭଙ୍ଗା ଦଦରା ଜରି ପାଲ ଘୋଡ଼ା ଘରେ ରହି ଆସୁଛନ୍ତି l ଆଜି ପର୍ଯ୍ୟନ୍ତ ସରକାରଙ୍କ ତରଫରୁ ଅସହାୟ ଗରିବଙ୍କୁ ଦିଆଯାଉଥିବା ଆବାସ ଯୋଜନା ଟିଏ ମିଳିନଥିବାରୁ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି l ମାଟି ଘର ଟିଏ କରିଛନ୍ତି ଯାହା ଭାଙ୍ଗି ରୁଜି ଯାଇଛି । ନିଜେ ରୋଜଗାର କରି ପରିବାର ପ୍ରତିପୋଷଣ କରିବା ଅସମ୍ଭବ ହେଉଥିବାବେଳେ ପେଟକୁ ୨ମୁଠା ଅର୍ଣ୍ଣ ମିଳିବା କଷ୍ଟ ହେଉଥିବାବେଳେ ଘର ଖଣ୍ଡିଏ କରିବା ଅସମ୍ଭବ ହୋଇ ପଡ଼ିଛି l 

ଘର ଖଣ୍ଡିଏ ପାଇଁ ଦୀର୍ଘ ବର୍ଷ ହେବ ପଞ୍ଚାୟତ କାର୍ଯ୍ୟାଳୟଠାରୁ ବ୍ଲକ କାର୍ଯ୍ୟାଳୟ ଏମିତି କି ଅଭିଯୋଗ ଶୁଣାଣିରେ ମଧ୍ୟ ଅଭିଯୋଗ କରିଥିଲେ ବି କୌଣସି ସୁଫଳ ହୋଇ ନ ଥିବା କହିଛନ୍ତି ମନ୍ଧ ଦିଗାଲ l ପରିବାରର ସମସ୍ତଙ୍କୁ ରାସନ କାର୍ଡ଼ରେ ଚାଉଳ ମିଳୁନଥିବାବେଳେ ଚଳିବା ପାଇଁ ମଧ୍ୟ କଷ୍ଟ ହୋଇପଡ଼ୁଛି । ତେଣୁ ତୁରନ୍ତ ବ୍ଲକ ଓ ଜିଲ୍ଲା ପ୍ରଶାସନ ଅସୁବିଧାର ହୃଦୟଙ୍ଗମ କରି ଆବାସ ଯୋଜନାରେ ସାମିଲ କରି ଘର ଖଣ୍ଡିଏ ଯୋଗାଇ ଦେବାକୁ ଗ୍ରାମବାସୀ ଦାବି କରିଥିବାବେଳେ ଘର ଖଣ୍ଡିଏ ମିଳିଲେ ପରିବାରକୁ ନେଇ ଅନ୍ତତଃ ଖରା ଓ ବର୍ଷା ଦାଉରୁ ପରିବାର ସୁରକ୍ଷିତ ରହିବେ ବୋଲି କହିଛନ୍ତି ମନ୍ଧ ଦିଗାଲ l