ନବରଙ୍ଗପୁର, ୧୩।୫ :  କୋଷଗୁମୁଡ଼ା ବ୍ଲକ ସମ୍ମିଳନୀ ଗୃହରେ ମଙ୍ଗଳବାର ଜନଶୁଣାଣୀ ଶିବିର ଅନୁଷ୍ଠିତ ହୋଇଯାଇଛି।   ଏଥିରେ ଜିଲ୍ଲାପାଳ ଡ଼ା ଶୁଭଙ୍କର ମହାପାତ୍ର  ଯୋଗ ଦେଇ ’ଧରତୀ ଆବା  ଜନଜାତୀୟ ଗ୍ରାମ ଉତ୍କର୍ଷ ଅଭିଯାନ’ ଅଧୀନରେ ସଚେତନତା କାର୍ଯ୍ୟକ୍ରମ ବିଷୟରେ କହିଥିଲେ। ଏହା ଜୁନ୍ ୧୫ ରୁ  ଆରମ୍ଭ  ହୋଇ ଜୁନ୍ ୩୦ ପର୍ଯ୍ୟନ୍ତ ସାରା ଜିଲ୍ଲାରେ ଅନୁଷ୍ଠିତ ହେବ ବୋଲି ସୂଚନା ଦେଇଥିଲେ। 

ଏହି ଅଭିଯାନରେ DA-JUGA ପ୍ରୋଗ୍ରାମ୍‌ ଅଧୀନରେ୧୬୯ ଟି  ଗ୍ରାମ ପଞ୍ଚାୟତ ଅନ୍ତର୍ଗତ ୫୩୬ଟି ଗ୍ରାମରେ ବିଶେଷ କ୍ୟାମ୍ପ ଆୟୋଜିତ କରାଯିବ। ଯେଉଁଥିରେ ସରକାରୀ ଯୋଜନାମାନଙ୍କର ସମ୍ପୂର୍ଣ୍ଣ କାର୍ଯ୍ୟକାରିତା ସୁନିଶ୍ଚିତ କରାଯିବ।   ଆଧାର କାର୍ଡ, ରାସନ କାର୍ଡ, ଆୟୁଷ୍ମାନ ଭାରତ କାର୍ଡ, ଜାତି ପ୍ରମାଣପତ୍ର, ପିଏମ୍-କିସାନ୍, ଓ ଜନଧନ ଆକାଉଣ୍ଟ ଭଳି ଜନହିତକର ସେବା ଉପରେ ବିଶେଷ କାର୍ଯ୍ୟକ୍ରମ ଗ୍ରହଣ କରାଯିବ । ମୁଖ୍ୟ ଉନ୍ନୟନ ଅଧିକାରୀ ଜିଲ୍ଲା ପରିଷଦ  ବିରଞ୍ଚି ନାରାୟଣ ଦରୱାନ ଏବଂ ଧରତି ଆବା  ପ୍ରୋଗ୍ରାମ୍‌ର ନୋଡାଲ୍ ଅଧିକାରୀଙ୍କୁ  ଏହି କ୍ୟାମ୍ପେନର ଏକ ବିସ୍ତୃତ ଯୋଜନା ପ୍ରସ୍ତୁତ କରିବା ନିମନ୍ତେ ନିଯୁକ୍ତ କରାଯାଇଛି। ପିଏ ଆଇଟିଡିଏ ତଥା ଜିଲ୍ଲାରେ ଧରତି ଆବା ଜନଜାତୀୟ ଗ୍ରାମ ଉତ୍କର୍ଷ ଅଭିଯାନର ଆବାହକ ରାଜୀବ କୁମାର ସାହୁ ଏହି ଅଭିଯାନ ଅନ୍ତର୍ଗତ ଜିଲ୍ଲାରେ ଅନେକ ବିକାଶମୂଳକ କାର୍ଯ୍ୟକ୍ରମ ଅନୁମୋଦନ ଉପରେ କହିଥିଲେ। 

ଜିଲ୍ଲାରେ ୧୦ଟି ୧୦୦ ଶଯ୍ୟା ବିଶିଷ୍ଟ ବାଳକ ଓ ବାଳିକା ଛାତ୍ରାବାସ, ୨ଟି ୨୦୦ ଶଯ୍ୟା ବିଶିଷ୍ଟ ବାଳକ ଓ ବାଳିକା ଛାତ୍ରାବାସ, ୪ଟି ଅତିରିକ୍ତ ଶ୍ରେଣୀଗୃହ ଏବଂ ଏହି ପ୍ରକଳ୍ପଗୁଡିକ ପାଇଁ ମୋଟ ୪୦୮୦ ଲକ୍ଷ ଟଙ୍କା ଅନୁମୋଦିତ ହୋଇଛି। ଏହା ପୂର୍ବରୁ  ୨୦୨୪ ଜୁନ୍ ଓ ଜୁଲାଇ ମାସରେ ଏକ ସିକେଲ ସେଲ୍ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ଏବଂ ଏହା ଉପରେ ବିଶେଷ ଶିବିର ମଧ୍ଯ ଅନୁଷ୍ଠିତ ହେବ। ଏହି ଧରତି ଆବା ଅଭିଯାନ କାର୍ଯ୍ୟକ୍ରମରେ ଏକ ଜିଲ୍ଲା ସ୍ତରୀୟ ମନ୍ଥନ ଶିବିର ପୂର୍ବରୁ ମଧ୍ୟ ଆୟୋଜିତ ହୋଇଥିଲା। ଯାହାର ଉଦ୍ଦେଶ୍ୟ ଥିଲା ସରକାରୀ ଯୋଜନାମାନଙ୍କ ଉପରେ ସଚେତନତା ବୃଦ୍ଧି ଓ ଏକତା ସୃଷ୍ଟି କରିବା।