ଭୁବନେଶ୍ୱର ୨୮/୧୦: ଆଗକୁ ଆସୁଛି ଆଲୋକର ପର୍ବ ଦୀପାବଳି । ଏହି ପର୍ବ ପାଳନ ପୂର୍ବରୁ ଘରଦ୍ୱାର ସଫାସୁତୁରା କରିବାର ପରମ୍ପରା ରହିଛି । କାରଣ ଦୀପାବଳିରେ ମା’ଲକ୍ଷ୍ମୀ, ଶ୍ରୀଗଣେଶଙ୍କୁ ପୂଜା କରାଯାଏ । ଭାରତର ପୂର୍ବାଞ୍ଚଳରେ ଅବଶ୍ୟ ଦୀପାବଳିରେ ମା’ କାଳୀଙ୍କୁ ପୂଜା କରାଯାଇଥାଏ । ତେବେ ମା’ ଲକ୍ଷ୍ମୀଙ୍କୁ ସନ୍ତୁଷ୍ଟ କରିବାକୁ ହେଲେ ସ୍ୱଚ୍ଛତା ପ୍ରତି ଧ୍ୟାନ ଦେବା ଅତ୍ୟନ୍ତ ଜରୁରି । ଏହି ପରିପ୍ରେକ୍ଷୀରେ ଦୀପାବଳି ପୂର୍ବରୁ ଘରୁ କେତେକ ଜିନିଷ ବାହାର କରିଦେବା ଆବଶ୍ୟକ । ଦୀପ ଜଳାଇବା ବେଳେ କେତେକ ନିୟମ ମଧ୍ୟ ମାନିବା ଉଚିତ୍ । ନଚେତ୍ ଦାରିଦ୍ର୍ୟ ଲାଗି ରହିବା ସହ ଘରେ ନକରାତ୍ମକତା ଜାରି ରହିବା ଆଶଙ୍କା ରହେ ବୋଲି ବାସ୍ତୁ ଶାସ୍ତ୍ରର ମତ । ଆସନ୍ତୁ ଜାଣିବା ଘରୁ କ’ଣ କ’ଣ କାଢ଼ିଦେବା ଉଚିତ୍...
-ଘରେ ଭଙ୍ଗା କାଚ ସାମଗ୍ରୀ ଥିଲେ, ତାହାକୁ ବାହାର କରିଦେବା ଭଲ । ଭଙ୍ଗା କାଚ ସାମଗ୍ରୀ ରହିଲେ ନକରାତ୍ମତା ବଢ଼ିଥାଏ ବୋଲି ବାସ୍ତୁ କହେ ।
-କାନ୍ଥ ଘଣ୍ଟା ଅବା ହାତ ଘଣ୍ଟା ଯଦି ବନ୍ଦ ହୋଇପଡ଼ିଥାଏ ତେବେ ତାକୁ ଶୀଘ୍ର ସଜାଡି ଆଣନ୍ତୁ । ନହେଲେ ଏ ଜିନିଷ ଘରୁ ବିଦା କରିବା ଆବଶ୍ୟକ । ବନ୍ଦ ଘଡ଼ିର ନକରାତ୍ମକ ପ୍ରଭାବରେ ପରିବାରରେ କ୍ଲେଶ ବଢିଥାଏ ।
-ଭଙ୍ଗା ଆସବାବପତ୍ର ମଧ୍ୟ ବାହାର କରି ଘର ସଫା କରି ନିଅନ୍ତୁ । ବାସ୍ତୁ ମତରେ ଭଙ୍ଗାଦଦରା ଆସବାବପତ୍ର ରହିଲେ ଘରର ସୁଖଶାନ୍ତି ନଷ୍ଟ ହୋଇଥାଏ ।
-ଭାଙ୍ଗିଯାଇଥିବା ଦେବଦେବୀଙ୍କ ମୂର୍ତ୍ତିକୁ ଘରେ ସ୍ଥାନ ଦେବା ଅନୁଚିତ । ଏହା ଦୁର୍ଭାଗ୍ୟକୁ ପ୍ରଶ୍ରୟ ଦେଇଥାଏ ବୋଲି ବାସ୍ତୁ ଶାସ୍ତ୍ରର ମତ ।
-କଳଙ୍କି ଲାଗିଯାଇଥିବା ଅବା ଅବ୍ୟବହୃତ ଲୁହା ଜିନିଷକୁ ଦୀପାବଳି ପୂର୍ବରୁ ବାହାରକୁ ସ୍ଥାନାନ୍ତରିତ କରି ଦିଅନ୍ତୁ । ଏପରି ଜିନିଷ ରହିଲେ ଶନି ଏବଂ ରାହୁ ଗ୍ରହର ନକରାତ୍ମକ ପ୍ରଭାବ ପଡ଼ିଥାଏ ବୋଲି କୁହାଯାଏ ।
-ବାସ୍ତୁଶାସ୍ତ୍ର ଅନୁଯାୟୀ ମା’ଲକ୍ଷ୍ମୀଙ୍କ ନିକଟରେ ପ୍ରଜ୍ୱଳିତ ଦୀପଗୁଡ଼ିକ ମଧ୍ୟରୁ ଗୋଟିଏ ଘିଅ ଦୀପ ଜଳାଇବା ଦରକାର । ଏହି ଦୀପଟି ଅନ୍ୟ ଦୀପଗୁଡ଼ିକଠାରୁ ଆକାରରେ ବଡ଼ ହୋଇଥିବ ଏବଂ ଏହା ଚଉମୁଖୀ ହୋଇଥିବା ଉଚିତ ।
-ଦୀପର ବତୀରେ ନିଆଁ ଧରାଇବାବେଳେ ଗୋଟିଏ ଦୀପରୁ ଅନ୍ୟ ଦୀପରେ ନିଆଁ ଧରାନ୍ତୁ ନାହିଁ । ବରଂ ମହମବତୀ ଅବା ଲାଇଟର ଜରିଆରେ ଦୀପରେ ନିଆଁ ଧରାନ୍ତୁ । ଏପରି ନକଲେ ଧନହାନିର ସମ୍ଭାବନା ରହିଥାଏ ବୋଲି ବିଶ୍ୱାସ ରହିଛି ।
