ଭାପୁର,୦୫/୧୨: ଶାସନ ପଞ୍ଚାୟତର ଟିକିରିପଡା ଠାରୁ ପଦ୍ମାବତୀ ଲକ୍ଷ୍ମଣ ନାଳ ସ°ଯୋଗ ପାଇଁ ସେତୁ ନିର୍ମାଣ ବେଳେ ବିଦ୍ୟୁତ୍ ଆଘାତରେ ଜଣେ ଶ୍ରମିକଙ୍କ ମୃତ୍ୟୁ ହୋଇଥିବା ବେଳେ ଜଣେ ଆହତ ହୋଇଥିବା ଜଣାପଡିଛି । ମୃତ ଶ୍ରମିକ ସୁନ୍ଦରଗଡ ଜିଲ୍ଲା ଲିଠିକଟା ବ୍ଲକ ଅନ୍ତର୍ଗତ ଲହଦର ଗ୍ରାମର ସୁକୁରା ଟପଙ୍କ ପୁଅ ଜହନ ଟପ୍ (୩୦) ଓ ଆହତ ଶ୍ରମିକ ସେହି ବ୍ଲକ ଅନ୍ତର୍ଗତ ଏରଗୋଡା ଗ୍ରାମର ଚୁକୁଲେ ଖାଲକଙ୍କ ପୁଅ ରାଜୁ ଖାଲକ (୩୫) ବୋଲି ଜଣାପଡ଼ିଛି । ଢେଙ୍କାନାଳ ଜିଲ୍ଲା ଫତେଗଡ ଥାନା ଅନ୍ତର୍ଗତ ଭାପୁର ବ୍ଲକରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଟିକିରିପଡା ଠାରୁ ପଦ୍ମାବତୀ କଲେଜ ରାସ୍ତା ପାଇଁ ଗୋଟିଏ କିଲୋମିଟର ରାସ୍ତା ଓ ଲକ୍ଷ୍ମଣ ନାଳ ଉପରେ ବ୍ରିଜ ନିର୍ମାଣ ପାଇଁ ବିଜୁ ସେତୁ ଯୋଜନାରେ ୨.୭୪ କୋଟି ବ୍ୟୟବରାଦ ହୋଇଛି । ଏହି କାମକୁ ପିପିଲି ଅଞ୍ଚଳର ବାସୁଦେବ କନଷ୍ଟ୍ରସନ ଟେଣ୍ଡର ନେଇଛି । ଗୁରୁବାର ସକାଳ ଦଶଟା ବେଳେ ବ୍ରିଜ କାମ କରୁଥିବା ବେଳେ ଉପରେ ଯାଇଥିବା ଇଲେଭେନ କେଭି ବିଦ୍ୟୁତ୍ ତାର ସଂସ୍ପର୍ଶରେ ଆସିଥିଲେ । ଫଳରେ ଦୁଇ ଜଣ ଶ୍ରମିକ ଛିଟିକି ପାଣିରେ ପଡ଼ି ଯାଇଥିଲେ । ଏହା ଦେଖି ସ୍ଥାନୀୟଲୋକେ ଦୁଇ ଆହତ ଶ୍ରମିକଙ୍କୁ ଭାପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଚିକିତ୍ସା ପାଇଁ ଭର୍ତ୍ତି କରିଥିଲେ । ସେଠାରେ ଡାକ୍ତର ଜଣକୁ ମୃତ ଘୋଷଣା କରିଥିବା ବେଳେ ଗୁରୁତର ଆହତ ଶ୍ରମିକଙ୍କୁ ଭୁବନେଶ୍ୱର ସ୍ଥାନାନ୍ତର କରିଥିଲେ । ଏନେଇ ପୋଲିସକୁ ଖବର ଦେଇଥିଲେ ଲୋକେ । ଖବର ପାଇ ଫତେଗଡ ଥାନା ପୋଲିସ ଘଟଣା ସ୍ଥଳରେ ପହଞ୍ଚିଛି । ଏହା ସହ ଘଟଣାର ତଦନ୍ତ ଚଳାଇଛି ପୋଲିସ ।
