ନୀଳଗିରି,୯/୧୨: ଗତ ଶନିବାର ନୀଳଗିରି ଅଞ୍ଚଳକୁ ପଶି ଆସିଥିବା ଝାଡ଼ଖଣ୍ଡ ହାତୀପଲ ପାଇଁ ଏବେ ଅଞ୍ଚଳବାସୀ ଆତଙ୍କିତ ହୋଇ ପଡିଛନ୍ତି। ବ୍ୟାପକ ଧାନ ଫସଲ ନଷ୍ଟ ହେଉଥିବା ବେଳେ ଜଙ୍ଗଲରୁ ବାହାରି ଅନ୍ୟ ସ୍ଥାନକୁ ଯିବାବେଳେ ମୁଖ୍ୟ ରାସ୍ତାରେ ବାଇକ ଆରୋହି,ସାଇକେଲ ଆରୋହି,ପଥଚାରୀ ଯିବାକୁ ଭୟ କରୁଛନ୍ତି।ଦିନରେ ହାତୀପଲ ତିନିକୋଶିଆ ଜଙ୍ଗଲ ଭିତରେ ଡେରା ପକାଇ ଥିବାବେଳେ ସନ୍ଧ୍ୟାରେ ବାହାରି ଭାଲୁକାଶୁଣି -ନରଣପୁର ରାସ୍ତାପାର ହୋଇଥିଲେ।
ଏହି ମୁଖ୍ୟ ରାସ୍ତାରେ ନରଣପୁର, ବରମପୁର, ଡ଼ାଳିମ୍ବପାଳ, ଅଁଳାପାଳ, ମାଟିଆଳି, ତେନ୍ତୁଳିଆ ସମେତ ବହୁ ଗାଁକୁ ଫେରୁଥିବା ଗ୍ରାମବାସୀ ରାତିରେ ଯିବାକୁ ଭୟଭୀତ ହୋଇପଡିଛନ୍ତି।ମଝି ରାସ୍ତାରେ ପାଇଲଟ ଦନ୍ତା ଡେରା ପକାଇଥିବା ବେଳେ ରାତିରେ ଘରକୁ ଫେରିବା ସମୟରେ ହାତୀ ସହିତ ସାମ୍ନାସାମ୍ନି ହେବାର ଭୟ ଘାରିଛି।
ଲୋକମାନେ ଏକତ୍ରିତ ହୋଇ ରାସ୍ତାରେ ଯାଉଥିବା ଦେଖିବାକୁ ମିଳିଛି। ତେବେ ଦିନକୁ ଦିନ ହାତୀ ମାନେ ଉପଦ୍ରଵ କରୁଥିବା ବେଳେ ସୋମବାର ହାତୀ ଆଗକୁ ନବଢି ପଛଘୁଞ୍ଚା ଦେବାରୁ ଖୁବଶୀଘ୍ର ଫେରିବେ ବୋଲି ଅନୁମାନ କରାଯାଉଛି।
