ରାଉରକେଲା ୧୬/୦୫ : ସୁନ୍ଦରଗଡ଼ ଜିଲ୍ଲା ଚାନ୍ଦିପୋଷ ଥାନା ଅନ୍ତର୍ଗତ ତାମଡା ଗାଁର ରାସନ ଦୋକାନୀ ଶିବ ଶଙ୍କର ସାହୁ ଓ ତାଙ୍କ ଦୋକାନରେ ଛିଡା ହୋଇଥିବା ଜଣେ ଗ୍ରହକଙ୍କୁ ହୋଇଛି ଗୁଳିମାଡ଼। ଉଭୟଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯିବା ପରେ ରାଉରକେଲା ସରକାରୀ ଡାକ୍ତରଖାନାକୁ ନିଆଯାଇଥିଲା । ପରେ ଏକ ଘରୋଇ ହସ୍ପିଟାଲରେ ଉଭୟଙ୍କୁ ଭର୍ତି କରାଯାଇଛି।
ସୂଚନା ଅନୁସାରେ, ଶିବ ଶଙ୍କର ଆଜି ସନ୍ଧ୍ୟାରେ ଦୋକାନରେ ଥିବା ସମୟରେ ଦୁଇ ମୁଖାଧାରୀ ଯୁବକ ଦୋକାନକୁ ଆସିଥିଲେ । ଶିବ ଶଙ୍କରଙ୍କୁ ହିନ୍ଦୀ ଭାଷାରେ ଟଙ୍କା ମାଗିଥିଲେ । ଟଙ୍କା ନାହିଁ କହିବାରୁ ପ୍ରଥମେ ଦୁଇ ରାଉଣ୍ଡ ବ୍ଲାଙ୍କ ଫାଇରିଂ କରିଥିଲେ । ପରେ ଶିବ ଶଙ୍କର ଓ ଗ୍ରାହକଙ୍କ ଉପରକୁ ତିନି ରାଉଣ୍ଡ ଫାଇରିଂ କରିବାରୁ ଗୋଟିଏ ଗୁଳି ଶିବ ଶଙ୍କରଙ୍କ ଛାତିରେ ଓ ଆଉ ଗୋଟିଏ ଗ୍ରାହକଙ୍କ ଗୋଡ଼ରେ ବାଜିଥିଲା। ରକ୍ତ ଜୁଡୁବୁଡୁ ଅବସ୍ଥାରେ ଦୁହେଁ ତଳେ ପଡିଯିବା ପରେ ଦୁଇ ଦୁର୍ବୁତ୍ତ ବାଇକ ଧରି ଘଟଣା ସ୍ଥଳରୁ ଚମ୍ପଟ ମାରିଥିଲେ। ଚାନ୍ଦିପୋଷ ପୁଲିସ ଘଟଣା ସ୍ଥଳରେ ପହଁଚି ତଦନ୍ତ ଚଳାଇଛି ।
