ନୂଆଦିଲ୍ଲୀ,୨୯/୦୮:  ଭାରତୀୟ ରିଜର୍ଭ ବ୍ୟାଙ୍କର ପୂର୍ବତନ ଗଭର୍ଣ୍ଣର ଉର୍ଜିତ ପଟେଲଙ୍କୁ ନୂଆ ଦାୟିତ୍ବ । ଅନ୍ତର୍ଜାତୀୟ ମୁଦ୍ରା ପାଣ୍ଠିରେ କାର୍ଯ୍ୟନିର୍ବାହୀ ନିର୍ଦ୍ଦେଶକ ଭାବରେ ହେଲେ ନିଯୁକ୍ତ ।  ଡକ୍ଟର ଉର୍ଜିତ ପଟେଲଙ୍କୁ କେନ୍ଦ୍ର ସରକାର ତିନି ବର୍ଷ ପାଇଁ ଅନ୍ତର୍ଜାତୀୟ ମୁଦ୍ରା ପାଣ୍ଠି ବା IMFରେ କାର୍ଯ୍ୟନିର୍ବାହୀ ନିର୍ଦ୍ଦେଶକ ଭାବରେ ନିଯୁକ୍ତି ଦେଇଛନ୍ତି ।

ସୂଚନା ଅନୁଯାୟୀ, ଚଳିତ ବର୍ଷ ଏପ୍ରିଲ ୩୦ ତାରିଖରେ କେନ୍ଦ୍ର ସରକାର ହଠାତ୍ IMFର ଇଡି କୃଷ୍ଣମୂର୍ତ୍ତି ଭି. ସୁବ୍ରମଣ୍ୟମଙ୍କ କାର୍ଯ୍ୟକାଳ ସମାପ୍ତ କରିଛନ୍ତି । ତାଙ୍କ କାର୍ଯ୍ୟକାଳର ପ୍ରାୟ ୬ ମାସ ପୂର୍ବରୁ ତାଙ୍କୁ ପଦରୁ ହଟାଇ ଦିଆଯାଇଥିଲା । ତେବେ ଏହି ପଦବୀରେ ଏବେ ଉର୍ଜିତ ପଟେଲଙ୍କୁ  ନିଯୁକ୍ତି ଦେଇଛନ୍ତି କେନ୍ଦ୍ର ସରକାର । ଉର୍ଜିତ ପଟେଲ ୨୦୧୬ରେ ରଘୁରାମ ରାଜନଙ୍କ ପରେ ଆରବିଆଇର ୨୪ତମ ଗଭର୍ଣ୍ଣର ଭାବରେ ଦାୟିତ୍ୱ ଗ୍ରହଣ କରିଥିଲେ । ୨୦୧୮ରେ ସେ ବ୍ୟକ୍ତିଗତ କାରଣ ପାଇଁ ଇସ୍ତଫା ଦେଇଥିବା ପ୍ରଥମ ଆରବିଆଇ ଗଭର୍ଣ୍ଣର । ୧୯୯୨ ପରଠାରୁ ସେ ସବୁଠାରୁ କମ୍ ସମୟ ପାଇଁ ଏହି ପଦବୀରେ ରହିଥିଲେ।

ଏହି ପଦକ୍ଷେପ ଏପରି ସମୟରେ ନିଆଯାଇଛି ଯେତେବେଳେ ଭାରତ ପାକିସ୍ତାନ ପାଇଁ ଆଇଏମଏଫ ବେଲଆଉଟ୍ କାର୍ଯ୍ୟକ୍ରମକୁ ବାରମ୍ବାର ବିରୋଧ କରିଆସୁଛି । ଏଥିସହ ଚିନ୍ତା ପ୍ରକାଶ କରିଛି ଯେ ଇସଲାମାବାଦ ଏପରି ପାଣ୍ଠିକୁ ଯୁଦ୍ଧ ଏବଂ ସୀମାପାର ଆତଙ୍କବାଦକୁ ଇନ୍ଧନ ଯୋଗାଇପାରେ। ନିକଟରେ IMF ବୋର୍ଡ ଏକ ବହୁବର୍ଷୀୟ କାର୍ଯ୍ୟକ୍ରମ ଅଧୀନରେ ପାକିସ୍ତାନକୁ ୧ ବିଲିୟନ ଡଲାରର ଋଣ ମଞ୍ଜୁର କରିଛି । ସମଗ୍ର ପ୍ୟାକେଜରେ ମୋଟ ୭ ବିଲିୟନ ଡଲାର ସହାୟତା ଅନ୍ତର୍ଭୁକ୍ତ । ଏହା ସହିତ, IMF ଜଳବାୟୁ ପରିବର୍ତ୍ତନର ମୁକାବିଲା ପାଇଁ ୧.୪ବିଲିୟନ ଡଲାରର କ୍ରେଡିଟ୍ ଲାଇନକୁ ସବୁଜ ସଙ୍କେତ ଦେଇଛି, ଯାହା କିସ୍ତିରେ ଜାରି କରାଯିବ । 

ଏହାରି ମଧ୍ୟରେ ଭାରତୀୟ-ଆମେରିକୀୟ ଅର୍ଥନୀତିଜ୍ଞ ଗୀତା ଗୋପୀନାଥଙ୍କ ଆଇଏମଏଫରେ  କାର୍ଯ୍ୟକାଳଶେଷ ହୋଇଯାଇଛି। ସେ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଏକ ପୋଷ୍ଟ ସେୟାର କରି ଏହା ବିଷୟରେ ସୂଚନା ଦେଇଛନ୍ତି। ଗୀତା ଗୋପୀନାଥ କହିଛନ୍ତି ଯେ ୭ ବର୍ଷର ଯାତ୍ରା ଏଠାରେ ଶେଷ ହେଉଛି। IMF ରେ କାମ କରିବାର ଅଭିଜ୍ଞତା ବହୁତ ଭଲ ଥିଲା। ସେ IMF ଏବଂ ତାଙ୍କ ସହକର୍ମୀଙ୍କୁ ଧନ୍ୟବାଦ ଜଣାଇଥିଲେ।