ପ୍ୟାରିସ୍, ୩୧/୦୫: ଚଳିତ ଫ୍ରେଞ୍ଚ ଓପନର ପଞ୍ଚମ ଦିବସରେ ତାରକା ଖେଳାଳିମାନଙ୍କ ଆଧିପତ୍ୟ ଜାରି ରହିଛି । ଟପ ସିଡ୍ ନୋଭାକ ଜୋକୋଭିକ୍ଙ୍କ ସମେତ ଆଲେଜାଣ୍ଡର ଭେରେଭ, ଡାନିଲ ମେଡଭେଡେଭ, ହ୍ୟୁବର୍ଟ ହର୍କାଜ, ଅର୍ନ୍ୟା ସାବାଲେଙ୍କା, ଏଲିନା ରିବାକିନା ପ୍ରମୁଖ ବିଜୟ ଜାରି ରଖି ତୃତୀୟ ରାଉଣ୍ଡ୍ରେ ପ୍ରବେଶ କରିଛନ୍ତି ।
ଜୋକୋଭିକ୍ ଦ୍ୱିତୀୟ ରାଉଣ୍ଡ୍ରେ ସ୍ପେନ୍ର ରୋବୋର୍ଟୋ କାର୍ବାଲିସ ବାଏନାଙ୍କୁ ୨ଘଣ୍ଟା ମଧ୍ୟରେ ୬-୪, ୬-୧, ୬-୨ ସେଟ୍ରେ ହରାଇଥିଲେ । ପଞ୍ଚମ ସିଡ୍ ମେଡଭେଡେଭ ଦ୍ୱିତୀୟ ରାଉଣ୍ଡ୍ରେ ସର୍ବିୟାର ମିଓମିର କେସମାନୋଭିକଙ୍କୁ ଭେଟିଥିଲେ । ରୋଲାଣ୍ଡ ଗ୍ୟାରସରେ ଏହା ଜୋକୋଭିକଙ୍କର ୯୪ତମ ମ୍ୟାଚ୍ ବିଜୟ ରହିଥିଲା । ସେ ବିଶ୍ୱର ପ୍ରଥମ ଖେଳାଳି ଭାବେ ୧୯ଥର ପାଇଁ ଫ୍ରେଞ୍ଚ ଓପନ ତୃତୀୟ ରାଉଣ୍ଡ୍ରେ ପ୍ରବେଶ କରିଥିଲେ । ୧୪ଥର ଚାମ୍ପିଅନ୍ ରାଫେଲ ନାଦାଲ ୧୮ଥର ତୃତୀୟ ରାଉଣ୍ଡ୍ରେ ପ୍ରବେଶ କରିଛନ୍ତି । ଏହି ମ୍ୟାଚ୍ରେ ମେଡଭେଡେଭ ୬-୧, ୫-୦ ସେଟ୍ରେ ଆଗୁଆ ରହିଥିଲେ । କେସମାନୋଭିକ ଆହତ ହୋଇ ଓହରି ଯିବାରୁ ମେଡଭେଡେଭ ତୃତୀୟ ରାଉଣ୍ଡ୍ରେ ପ୍ରବେଶ କରିଥିଲେ । ପ୍ରଥମ ରାଉଣ୍ଡ୍ରେ ରାଫେଲ ନାଦାଲଙ୍କୁ ହରାଇଥିବା ଆଲେକଜାଣ୍ଡର ଭେରେଭ ଦ୍ୱିତୀୟ ରାଉଣ୍ଡ୍ରେ ଡେଭିଡ୍ ଗଫିନଙ୍କୁ ୭-୬(୭-୪), ୬-୨, ୬-୨ ସେଟ୍ରେ ପରାସ୍ତ କରିଥିଲେ । ଏହି ମ୍ୟାଚ୍ ଜିତିବା ପାଇଁ ଭେରେଭଙ୍କୁ ୨ଘଣ୍ଟା ୨୩ ମିନିଟ ଲାଗିଥିଲା । ସେହିପରି ଅଷ୍ଟମ ସିଡ୍ ହର୍କାଗ ଏକ ସଂଘର୍ଷପୂର୍ଣ୍ଣ ମୁକାବିଲାରେ ବର୍ଣ୍ଣାଡ ନାକାସିମାଙ୍କୁ ୬-୭(୨-୭), ୬-୧, ୬-୩, ୭-୬(୭-୫) ସେଟ୍ରେ ପରାସ୍ତ କରିଥିବାବେଳେ ଦଶମ ସିଡ୍ ଗିଗୋର ଦିମିତ୍ରୋଭ ୬-୦, ୬-୩, ୬-୪ ସେଟ୍ରେ ଫାବିଆନ ମାରୋସାନଙ୍କୁ ହରାଇଥିଲେ ।
ଦ୍ୱିତୀୟ ରାଉଣ୍ଡ୍ର ଅନ୍ୟ ମୁକାବିଲାରେ ୨୧ତମ ସିଡ୍ ଫେଲିକ୍ସ ଅଗର ଆଲିଆସେମ ୨ଘଣ୍ଟା ୩୬ମିନିଟ୍ ଲଢେଇ କରି ଜର୍ମାନୀର ହେନରୀ ସ୍କୋୟରଙ୍କୁ ୬-୪, ୪-୬, ୬-୩, ୬-୨ ସେଟ୍ରେ ହରାଇଥିଲେ । ୨୦୨୨ ମସିହାରୁ ଇତି ମଧ୍ୟରେ ସାବାଲେଙ୍କା ୬୦ଟି ମ୍ୟାଚ୍ ଜିତିସାରିଛନ୍ତି । ମହିଳା ସିଙ୍ଗଲ୍ସରେ କେବଳ ଇଗା ସ୍ୱିଟେକ ତାଙ୍କ ଠାରୁ ୭ଟି ମ୍ୟାଚ୍ ଅଧିକ ଜିତିଛନ୍ତି । ସେହିପରି ଡେନିସ ସାପୋଭାଲୋଭ ୩ଘଣ୍ଟା ୧୮ମିନିଟ୍ର ସଂଘର୍ଷ ପରେ ୨୫ତମ ସିଡ୍ ଫ୍ରାନ୍ସିସ ଟିଆଫଏଙ୍କୁ ୬-୭(୪-୭), ୬-୪, ୬-୨, ୬-୪ ସେଟ୍ରେ ହରାଇ ତୃତୀୟ ରାଉଣ୍ଡ୍ରେ ସ୍ଥାନ ପକ୍କା କରିଥିଲେ । ୨୭ତମ ସିଡ୍ ସେବାଷ୍ଟିଆନ କୋର୍ଡା ୬-୪, ୬-୪, ୧-୬, ୬-୩ ସେଟ୍ରେ ସୁନ୍ ଉ କୋନଙ୍କୁ ହରାଇଥିଲେ ।
ମହିଳା ସିଙ୍ଗଲ୍ସ ଦ୍ୱିତୀୟ ରାଉଣ୍ଡ୍ରେ ଦ୍ୱିତୀୟ ସିଡ୍ ସାବାଲେଙ୍କା ୬-୨,୬-୨ ସେଟ୍ରେ ଜାପାନର ମୋୟୁକା ଉଚିଜିମାଙ୍କୁ ହରାଇଥିଲେ । ଏହି ମ୍ୟାଚ୍ ଜିତିବା ପାଇଁ ସାବାଲେଙ୍କାଙ୍କୁ ୬୨ମିନିଟ୍ ଲାଗିଥିଲା । ସେହିପରି ରିବାକିନା ୬୭ମିନିଟ୍ ମଧ୍ୟରେ ଆରାଞ୍ଜା ରସ୍ଙ୍କୁ ୬-୩, ୬-୪ ସେଟ୍ରେ ପରାସ୍ତ କରିଥିଲେ । ପଞ୍ଚମ ସିଡ୍ ମର୍କେଟା ଭଣ୍ଡ୍ରୁସୋଭଗା ୦-୬, ୬-୧, ୬-୪ ସେଟ୍ରେ କାଟି ଭଲିନେଟ୍ସଙ୍କୁ ପରାସ୍ତ କରି ତୃତୀୟ ରାଉଣ୍ଡ୍ରେ ପ୍ରବେଶ କରିଥିଲେ ।
ଅନ୍ୟ ଦ୍ୱିତୀୟ ରାଉଣ୍ଡ ମୁକାବିଲାରେ ଯଥାକ୍ରମେ ୧୫ତମ ସିଡ୍ ଏଲିନା ସ୍ୱିତୋଲିନା ୬-୪, ୭-୬(୭-୩) ସେଟ୍ରେ ଡାଏନା ପେରୀଙ୍କୁ ପରାସ୍ତ କରିଥିବାବେଳେ ୧୪ତମ ସିଡ୍ ମାଡିସନ କିଜ୍ ୬-୦, ୭-୬(୯-୭) ସେଟ୍ରେ ମାୟର ସେରିଫଙ୍କୁ ହରାଇଥିଲେ । ଲେଢଲା ଫର୍ଣ୍ଣାଣ୍ଡେଜ ୬-୩, ୬-୪ ସେଟ୍ରେ ଜିୟୁ ୱାଙ୍ଗୁଙ୍କୁ, ପାଓଲା ବଡୋଶା ୪-୬, ୬-୧, ୭-୫ ସେଟ୍ରେ ୟୁଲିୟା ପୁଟିନସେଭାଙ୍କୁ, ଡୋନା ଭେକିକ ୭-୬, ୬-୪ ସେଟ୍ରେ ୧୮ତମ ସିଡ୍ ମାର୍କା କୋତ୍ସ୍ୟୁକଙ୍କୁ ହରାଇଥିଲେ । ସର୍ବିୟାର ଓଲଗା ଡାନିଲୋଭିକ ଏକ ସଂଘର୍ଷପୂର୍ଣ୍ଣ ମୁକାବିଲାରେ ୧୧ତମ ସିଡ୍ ଡାନିଏଲା କଲିନ୍ସଙ୍କୁ ୬-୭(୩-୭), ୭-୫, ୬-୪ ସେଟ୍ରେ ହରାଇ ବିପର୍ଯ୍ୟୟ ସୃଷ୍ଟି କରିଥିଲେ ।
