ମୁମ୍ବାଇ: ବଲିଉଡ ଅଭିନେତା ଗୋବିନ୍ଦଙ୍କ ପତ୍ନୀ ସୁନୀତା ଆହୁଜା ସେମାନଙ୍କ ବିବାହ ସମ୍ପର୍କରେ ଚାଲିଥିବା ବିଚ୍ଛେଦ ଗୁଜବକୁ ଦୃଢ ଭାବେ ଖଣ୍ଡନ କରିଛନ୍ତି। ସେ ଜାତୀୟ ଗଣମାଧ୍ୟମ ଟାଇମ୍ସ ଅଫ୍ ଇଣ୍ଡିଆକୁ ଦେଇଥିବା ଏକ ସାକ୍ଷାତକାରରେ କହିଛନ୍ତି, "ଗୋବିନ୍ଦ କେବଳ ମୋର, ଏବଂ କେହି ଆମକୁ ଅଲଗା କରିପାରିବେ ନାହିଁ।" ସୁନୀତାଙ୍କ ଇନଷ୍ଟାଗ୍ରାମ ହ୍ୟାଣ୍ଡେଲରୁ 'ଆହୁଜା' ଉପନାମ ହଟାଇବା ଏବଂ ତାଙ୍କ ନାମରେ ଅତିରିକ୍ତ 'ଏସ' ଯୋଗ କରିବା ପରେ ଏହି ଗୁଜବ ଆରମ୍ଭ ହୋଇଥିଲା। ସେ ସ୍ପଷ୍ଟ କରିଛନ୍ତି ଯେ ଏହା ପଛରେ କୌଣସି ଉଦ୍ଦେଶ୍ୟ ନଥିଲା ଏବଂ ଏହାର ବିବାହ ସହ କୌଣସି ସମ୍ପର୍କ ନାହିଁ।
ସୁନୀତା ଆହୁରି ମଧ୍ୟ କହିଛନ୍ତି ଯେ, "ମୁଁ ଗତ ବର୍ଷ ମଧ୍ୟ ମୋ ନାମରୁ 'ଆହୁଜା' ହଟାଇଥିଲି ଏବଂ ନାମ ଓ ଖ୍ୟାତି ପାଇଁ ଏକ ଅତିରିକ୍ତ 'ଏସ' ଯୋଗ କରିଥିଲି। ମୁଁ ଆହୁଜା ଅଟେ ଏବଂ ଏହା କେବଳ ମୋର ମୃତ୍ୟୁ ପରେ ହିଁ ବଦଳିବ।" ସେ ଆହୁରି ମଧ୍ୟ କହିଛନ୍ତି, "ଆମେ ଏକ ସୁଖୀ ପରିବାର। ଯେପର୍ଯ୍ୟନ୍ତ ଆମ ଦୁହିଁଙ୍କ ଠାରୁ ସିଧାସଳଖ କିଛି ନ ଆସେ, ସୋସିଆଲ ମିଡିଆ ଆଧାରରେ କିଛି ଅନୁମାନ କରନ୍ତୁ ନାହିଁ।"
ଆପଣଙ୍କୁ ଜଣାଇରଖୁ ଗୋବିନ୍ଦ ଏବଂ ସୁନୀତା ୧୯୮୭ ମସିହା ମାର୍ଚ୍ଚ ୧୧ ତାରିଖରେ ବିବାହ କରିଥିଲେ। ଏବଂ ସେମାନଙ୍କର ଦୁଇ ସନ୍ତାନ, ଝିଅ ଟିନା ଆହୁଜା ଏବଂ ପୁତ୍ର ଯଶବର୍ଦ୍ଧନ ଆହୁଜା ରହିଛନ୍ତି। ସୁନୀତା ଗୋବିନ୍ଦଙ୍କ ପ୍ରତିଭା ଏବଂ ବଦଳୁଥିବା ସିନେମା ଜଗତରେ ତାଙ୍କର ସଂଘର୍ଷ ବିଷୟରେ ମଧ୍ୟ କହିଛନ୍ତି। ସେ ପରାମର୍ଶ ଦେଇଛନ୍ତି ଯେ ଗୋବିନ୍ଦଙ୍କୁ ଆଧୁନିକ ଟ୍ରେଣ୍ଡକୁ ଅନୁସରଣ କରିବା ଦରକାର, କାରଣ ଆଜିର ସିନେମା ୯୦ ଦଶକର ନୁହେଁ।
ଏହାସହ ଚଳିତ ଥରର ଗଣେଶ ଚତୁର୍ଥୀରେ ଗୋବିନ୍ଦା ନିଜ ଘରେ ସମସ୍ତଙ୍କ ସହ ଉପସ୍ଥିତ ରହି ପୂଜା କରୁଥିବା ନଜରକୁ ଆସିଛନ୍ତି। ଏହି ପୂଜାରେ ସୁନୀତା ଏକ ଉଜ୍ଜ୍ୱଳ ବାଇଗଣୀ ରଙ୍ଗର ଶାଢୀ ପିନ୍ଧୀ ଖୁସି ମନରେ ପୂଜା କରୁଥିବା ଦେଖାଯାଇଛି। ଅନ୍ୟପଟେ ଗୋବିନ୍ଦା ଏକ ଲାଲ କୁର୍ତ୍ତା ପିନ୍ଧି ନିଜ ପୁଅ ଓ ଝିଅଙ୍କ ସହ ଆଳତୀ କରୁଥିବାର ଦୃଶ୍ୟ ବିଭିନ୍ନ ସୋଶିଆଲ ମିଡିଆ ପ୍ଲାଟଫର୍ମରେ ଭାଇରାଲ ହେବାରେ ଲାଗିଛି। ଏହାସହ ଉଭୟ ଦମ୍ପତ୍ତି ସାଙ୍ଗ ହୋଇ ମିଛେଇ ବାଣ୍ଟୁଥିବାର ଦୃଶ୍ୟ ମଧ୍ୟ ଦେଖାଯାଇଛି।
ଏହି ଖବର ସୁନୀତାଙ୍କ ଦୃଢ଼ ଅବସ୍ଥାନକୁ ପ୍ରତିଫଳିତ କରିଛି। ସେ ଏବଂ ଗୋବିନ୍ଦ ଏକ ସୁଖୀ ଦାମ୍ପତ୍ୟ ଜୀବନ ଅନୁଭବ କରୁଛନ୍ତି ବୋଲି ଆଉ କୌଣସି ସଂଶୟ ନାହିଁ ବୋଲି ସେ ଦୃଢୋକ୍ତି ପ୍ରକାଶ କରିଛନ୍ତି। ଏବଂ ସେ ସୋସିଆଲ ମିଡିଆ ଗୁଜବକୁ ଦୃଢ଼ ଭାବେ ଖଣ୍ଡନ କରିଛନ୍ତି।
