ଉମରକୋଟ,୨/୬(ଆପ୍ର): ମା’ଙ୍କ ଶକ୍ତି, ଭକ୍ତଙ୍କ ଭକ୍ତି ଓ ବିଶ୍ୱାସ ଆଗରେ ହାର ମାନିଛି ପ୍ରକୃତି । ଏଭଳି ଏକ ଆସ୍ଥା ଓ ବିଶ୍ୱାସର ଦୃଶ୍ୟ ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା ଉମରକାଟ ସହରରେ ଥିବା ସନ୍ତୋଷୀ ମନ୍ଦିରରେ । ଅଧାଗଢ଼ା ମା’ଙ୍କ ଏହି ମନ୍ଦିରରେ ଦୀର୍ଘ ୧୨ ବର୍ଷ ହେଲା ଜଳୁଛି ଅଖଣ୍ଡ ଦୀପ । କୌଣସି ଝଡ଼ତୋଫାନ ଏହାକୁ ଲିଭାଇ ପାରିନି । ମନ୍ଦିରର ମୁଖ୍ୟ ସେବକ ଶାନ୍ତିଲତା ପାତ୍ରଙ୍କୁ ୧୨ ବର୍ଷ ତଳେ କୁଆଡ଼େ ସ୍ୱପ୍ନାଦେଶ ହୋଇଥିଲା ମନ୍ଦିରରେ ଏକ ଅଖଣ୍ଡ ଦୀପ ଜାଳିବାକୁ । ୨୦୧୩ ଜୁନ୍ ପହିଲାରେ ସେ ଅଖଣ୍ଡ ଦୀପ ଜାଳିଥିଲେ । ଆଜକୁ ୧୨ ବର୍ଷ ହେଲା ଜଳି ଚାଲିଛି । ଏ ଭିତରେ ଅନେକ ଝଡ଼ତୋଫାନ ସାଙ୍ଗକୁ ପ୍ରବଳ ବର୍ଷା ହୋଇଛି । କୌଣସି ପରିସ୍ଥିତିରେ ଖୋଲାମେଲାରେ ଥିବା ମନ୍ଦିରର ଦୀପକୁ ଲିଭାଇ ପାରିନି । ମାନେ ଭକ୍ତି ଓ ବିଶ୍ୱାସ ଆଗରେ ପ୍ରକୃତି ହାର ମାନିଛି ।
୧୨ ବର୍ଷ ପୂର୍ତ୍ତି ଅବସରରେ ଆଜି ଗାୟତ୍ରୀ ପରିବାରର ଜିଲ୍ଲା ମୁଖ୍ୟ ମନାଜ କୁମାର ପଟ୍ଟନାୟକ ଏବଂ ମନ୍ଦିର କମିଟି ପକ୍ଷରୁ ୧୦୦୮ ଦୀପ ପ୍ରଜ୍ଜ୍ୱଳନ ପରେ ଯାଇ ଜଗତର ମଙ୍ଗଳ କାମନା କରାଯାଇଥିବା ମୁଖ୍ୟ ସେବକ ବାବୁ ଦଳେଇ କହିଛନ୍ତି । ଏହି ସମୟରେ ମନ୍ଦିର ପୂଜକ ଶ୍ରୀକାନ୍ତ କୁମାର ପଣ୍ଡା, ସହଯୋଗୀ ରବି ପଣ୍ଡା, ମନ୍ଦିର କମିଟି ସମ୍ପାଦକ ସୁଶୀଲ କୁମାର ପଣ୍ଡା, କୋଷାଧ୍ୟକ୍ଷ ଉଦୟ ଘୋଷ, ଆଇନ ପରାମର୍ଶଦାତା ଝାଡ଼େଶ୍ୱର ମହାନ୍ତି ପ୍ରମୁଖ ଉପସ୍ଥିତ ଥିଲେ ।
