ରାଉରକେଲା,୧୪/୭: ରାଉରକେଲାରେ ଲଗାଣ ବର୍ଷା ଜାରି ରହିଛି। ଆଉ ଏହି ଲଗାଣ ବର୍ଷା ଯୋଗୁଁ ରାଉରକେଲା ଓ ଏହାର ଆଖପାଖ ଅଞ୍ଚଳରେ ବସବାସ କରୁଥିବା ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ବର୍ଷା ଯୋଗୁଁ ରାଉରକେଲା ରେଳ ଷ୍ଟେସନର ଦ୍ୱିତୀୟ ପ୍ରବେଶ ପଥର ପାର୍କିଂସ୍ଥଳ ଜଳମଗ୍ନ ହୋଇଯାଇଛି। ଏଥିସହ ସେଠାରେ ରଖା ଯାଇଥିବା ଗାଡିଗୁଡିକ ବୁଡ଼ି ଯାଇଛି।
ସେହିପରି ଟିମ୍ବର କଲୋନୀ,ଗୋପବନ୍ଧୁପାଲି ଓ ରେଲୱେ କଲୋନୀର ତଳିଆ ଅଞ୍ଚଳରେ ପଶିଛି ପାଣି। ସେକ୍ଟର ୧୫ ଓ ୧୬ରେ ଥିବା ଘରଗୁଡିକରେ ମଧ୍ୟ ପାଣି ପଶିଯାଇଛି। ସେହିପରି ବିର୍ସା ନିକଟସ୍ଥ ସନ୍ତୋଷପୁର ପାଖ ରେଲୱେ ଅଣ୍ଡର ପାସ ପାଣିରେ ବୁଡି ଯାଇଛି। ଫଳରେ ସେହି ରାସ୍ତା ଦେଇ ଲୋକଙ୍କ ଯିବା ଆସିବା ବନ୍ଦ ହୋଇଯାଇଛି। ଅନ୍ୟପକ୍ଷରେ ବ୍ରାହ୍ମଣୀ ନଦୀର ଜଳସ୍ତର ବୃଦ୍ଧି ପାଇବାରେ ଲାଗି ଥିବାରୁ ବାଲୁଘାଟ, ପଲପଲ ବସ୍ତି ବାସିନ୍ଦା ଭୟଭୀତ ଅବସ୍ଥାରେ ରହିଥିବା ଜଣାପଡ଼ିଛି।
