ନୂଆଦିଲ୍ଲୀ: କଂଗ୍ରେସ ଶାସିତ ହିମାଚଳ ପ୍ରଦେଶରେ ସ୍କୁଲରେ ପଡ଼ୁଛି ତାଲା । ଗୋଟିଏ କି ଦୁଇଟି ନୁହେଁ, ୧୨୦୦ ବିଦ୍ୟାଳୟ ବନ୍ଦ ହୋଇଗଲାଣି । ଅଢ଼େଇ ବର୍ଷ ମଧ୍ୟରେ ୧୨ ଶହ ସ୍କୁଲରେ ତାଲା ପଡ଼ିଛି ବୋଲି ଖୋଦ ରାଜ୍ୟର ଶିକ୍ଷା ମନ୍ତ୍ରୀ ରୋହିତ ଠାକୁର ସ୍ବୀକାର କରିଛନ୍ତି । ସେ କହିଛନ୍ତି, ୪୫୦ ବିଦ୍ୟାଳରେ ଗୋଟିଏ ବି ପିଲା ନାମ ଲେଖାଇ ନାହାନ୍ତି । ଅନ୍ୟ ବିଦ୍ୟାଳୟରେ ପିଲାଙ୍କ ସଂଖ୍ୟା ଖୁବ କମ୍ ରହିଛି । ଶିକ୍ଷା ମନ୍ତ୍ରୀ କହିଛନ୍ତି ଯେ, ଶିକ୍ଷା ବିଭାଗକୁ ସୁଦୃଢ଼ କରିବା ପାଇଁ ରାଜ୍ୟ ସରକାର ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଉଛନ୍ତି ଏବଂ ଆବଶ୍ୟକ ହେଲେ ବିଦ୍ୟାଳୟଗୁଡ଼ିକର ମିଶ୍ରଣ ଏବଂ ପୁନର୍ଗଠନ ଉପରେ ବିଚାର କରାଯାଉଛି ।
ଷଷ୍ଠରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ୨୫ରୁ କମ୍ ପିଲାଙ୍କ ନାମଲେଖା ହେଲେ ବିଦ୍ୟାଳୟଗୁଡ଼ିକୁ ମିଶ୍ରଣ କରିବା ପାଇଁ ଏକ ପାରାମିଟର ସ୍ଥିର କରାଯାଇଛି । ସେ ଆହୁରି କହିଛନ୍ତି ଯେ, ସରକାର କର୍ମଚାରୀଙ୍କ ଦୀର୍ଘଦିନର ଦାବି ପୂରଣ କରିଛନ୍ତି। ସରକାର ଖାଲି ପଦବୀ ପୂରଣ ଉପରେ ମଧ୍ୟ ଧ୍ୟାନ ଦେଉଛନ୍ତି । ଏଥିପାଇଁ ୧୫୦୦୦ ଶିକ୍ଷକ ପଦବୀ ପୂରଣ ଲାଗି ସରକାର ଅନୁମତି ଦେଇଛନ୍ତି । ସେଥିମଧ୍ୟରୁ ପ୍ରାଥମିକ ଶିକ୍ଷା ବିଭାଗରେ ୩୯୦୦ ପଦବୀ ଅନ୍ତର୍ଭୁକ୍ତ ।
ସେହିଭଳି ୩୧୦୦ ଅତିରିକ୍ତ ଶିକ୍ଷକ ପଦବୀ ଶୀଘ୍ର ପୂରଣ କରାଯିବ ବୋଲି ରୋହିତ ଠାକୁର କହିଛନ୍ତି । ଏହା ବ୍ୟତୀତ ମନ୍ତ୍ରୀ ଏହା ମଧ୍ୟ କହିଛନ୍ତି ଯେ, ପୂର୍ବ ସରକାର ସମୟରେ ବନ୍ଦ ହୋଇଥିବା ନିଯୁକ୍ତି ବର୍ତ୍ତମାନର ସରକାର ପୂରଣ କରୁଛନ୍ତି । ପ୍ରାକ୍-ପ୍ରାଥମିକକୁ ସୁଦୃଢ଼ କରିବା ପାଇଁ ୬୨୦୦ ନର୍ସରୀ ଶିକ୍ଷକଙ୍କୁ ନିଯୁକ୍ତି ଦିଆଯାଉଛି । ଉଚ୍ଚଶିକ୍ଷା ବିଭାଗରେ ୪୮୩ ସହକାରୀ ପ୍ରଫେସରଙ୍କୁ ନିଯୁକ୍ତି ଦିଆଯିବ ବୋଲି କହିଛନ୍ତି ଶିକ୍ଷା ମନ୍ତ୍ରୀ ।
