ଦୁବାଇ, ୨୧/୧୧: ସଦ୍ୟ ପ୍ରକାଶିତ ଆଇସିସି ଟି-ଟ୍ୱେଣ୍ଟି ମାନ୍ୟତା ତାଲିକାରେ ହାର୍ଦ୍ଦିକ ପାଣ୍ଡ୍ୟାଙ୍କ ଜବରଦସ୍ତ ଉନ୍ନତି ହୋଇଛି । ସେ ଅଲ୍ରାଉଣ୍ଡର ତାଲିକାର ଶୀର୍ଷ ସ୍ଥାନ ଦଖଲ କରିଛନ୍ତି । ସେହିପରି ତିଳକ ବର୍ମା ବ୍ୟାଟିଂ ମାନ୍ୟତା ତାଲିକାର ତୃତୀୟ ସ୍ଥାନକୁ ଉନ୍ନୀତ ହୋଇଛନ୍ତି ।
ଗତ ସପ୍ତାହରେ ପାଣ୍ଡ୍ୟା ଅଲ୍ରାଉଣ୍ଡର ମାନ୍ୟତା ତାଲିକାର ତୃତୀୟ ସ୍ଥାନରେ ରହିଥିଲେ । ଦକ୍ଷିଣ ଆଫ୍ରିକାରେ ଉନ୍ନତ ପ୍ରଦର୍ଶନ ବଳରେ ତାଙ୍କ ମାନ୍ୟତାରେ ୨ଟି ସ୍ଥାନ ଉନ୍ନତି ହୋଇଥିଲା । ଉକ୍ତ ସିରିଜରେ ପାଣ୍ଡ୍ୟା ୫୯ ରନ୍ ସଂଗ୍ରହ କରିଥିଲେ ଓ ୨ଟି ୱିକେଟ୍ ନେଇଥିଲେ । ସୀମିତ ପ୍ରଦର୍ଶନ ମଧ୍ୟ ତାଙ୍କୁ ଶୀର୍ଷରେ ପହଞ୍ଚାଇବା ପାଇଁ ଉପଯୁକ୍ତ ସାବ୍ୟସ୍ତ ହୋଇଥିଲା ।
ଦକ୍ଷିଣ ଆଫ୍ରିକାରେ ଅନୁଷ୍ଠିତ ୪ମ୍ୟାଚ୍ ବିଶିଷ୍ଟ ଟି-ଟ୍ୱେଣ୍ଟି ସିରିଜରେ ଚମତ୍କାର ପ୍ରଦର୍ଶନ କରିବା ଫଳରେ ତିଳକଙ୍କ ମାନ୍ୟତାରେ ୬୯ଟି ସ୍ଥାନ ଉନ୍ନତି ହୋଇଥିଲା । ସେ ସେଞ୍ଚୁରୀୟନ୍ ଓ ଜୋହାନ୍ସବର୍ଗରେ ଶତକ ଅର୍ଜନ କରିଥିଲେ । ୪ଟି ମ୍ୟାଚ୍ରେ ସେ ମୋଟ୍ ୨୮୦ ରନ୍ ସଂଗ୍ରହ କରିଥିଲେ । ସେହିପରି ଉକ୍ତ ସିରିଜରେ ଡବଲ୍ ଶତକ ଅର୍ଜନ କରିଥିବା ସଞ୍ଜୁ ସାମସନଙ୍କ ମାନ୍ୟତାରେ ମଧ୍ୟ ୧୭ଟି ସ୍ଥାନ ଉନ୍ନତି ହୋଇଛି । ସେ ୨୨ତମ ସ୍ଥାନକୁ ଉନ୍ନୀତ ହୋଇଛନ୍ତି । ଅନ୍ୟ ଭାରତୀୟଙ୍କ ମଧ୍ୟରେ ସୂର୍ଯ୍ୟକୁମାର ଯାଦବ ଚତୁର୍ଥ ଓ ଯଶସ୍ୱୀ ଜୈସ୍ୱାଲ୍ ଅଷ୍ଟମ ସ୍ଥାନରେ ରହିଛନ୍ତି ।
ବୋଲିଂ ମାନ୍ୟତାରେ ମଧ୍ୟ ଅର୍ଶଦୀପ ସିଂହଙ୍କ ଉନ୍ନତି ହୋଇଛି । ସେ ନବମ ସ୍ଥାନ ଦଖଲ କରିଛନ୍ତି । ଦକ୍ଷିଣ ଆଫ୍ରିକାରେ ଅର୍ଶଦୀପ ୪ଟି ମ୍ୟାଚ୍ରୁ ମୋଟ୍ ୮ଟି ୱିକେଟ୍ ଅକ୍ତିଆର କରିଥିଲେ । ଅକ୍ଷର ପଟେଲଙ୍କ ମାନ୍ୟତାରେ ୧୦ଟି ସ୍ଥାନ ଉନ୍ନତି ହୋଇଛି ଓ ସେ ୧୩ତମ ସ୍ଥାନ ଦଖଲ କରିଛନ୍ତି ।
