କେସିଙ୍ଗା ଏନ୍ଏସି,୧୧/୦୬: କଳାହାଣ୍ଡି ଜିଲ୍ଲା କେସିଙ୍ଗା ବ୍ଲକ ତହସିର ଗ୍ରାମରେ ନବ ନିର୍ମିତ ମା' ସମଲେଶ୍ଵରୀ ବିଗ୍ରହ ପ୍ରତିଷ୍ଠା ପାଇଁ ମଙ୍ଗଳବାର ଦିନ ସନ୍ଧ୍ୟା ସମୟରେ ମୟୂରଭଞ୍ଜ ଜିଲ୍ଲାର ଖିଚିଙ୍ଗ ଠାରୁ ମାଆଙ୍କ ବିଗ୍ରହ କେସିଙ୍ଗାରେ ପହଞ୍ଚିଥିଲା । ମୟୂରଭଞ୍ଜରୁ ମାଆଙ୍କ ବିଗ୍ରହ ଆସିବା ସମୟରେ ସ୍ଥାନେ ସ୍ଥାନେ ମାଆଙ୍କୁ ଧୂପ ହୁଳହୁଳିରେ ସ୍ଵାଗତ କରାଯାଇଥିଲା।
ମାଆ ସମଲେଶ୍ଵରୀଙ୍କ ବିଗ୍ରହ ସହିତ ମାଆ ପାଟନେଶ୍ୱରୀ, ତିନୋଟି ପାର୍ଶ୍ଵ ଦେବାଦେବୀ,୯ ଟି ନବଗ୍ରହ ଓ ଦୁଇ ଦ୍ଵାରପାଳଙ୍କ ବିଗ୍ରହ ମନ୍ଦିରରେ ପହଞ୍ଚିଛି । ବଲାଙ୍ଗୀର ଜିଲ୍ଲାର ଲୁଥରବନ୍ଧଠାରେ ମାଆଙ୍କ ବିଗ୍ରହକୁ ସ୍ଵାଗତ ପରେ ଅପରାହ୍ଣ ୪ ଟା ସମୟରେ ବିଗ୍ରହ କେସିଙ୍ଗା ସହର ଠାରେ ପହଞ୍ଚିଥିଲା । କେସିଙ୍ଗାରେ ମାଆଙ୍କୁ ସ୍ଵାଗତ କରିବା ପାଇଁ କେସିଙ୍ଗା ପଣ୍ଡରାମାଳି ସମାଜର ପୂର୍ବତନ ସଭାପତି ରୋହିତ ଭୋଇଙ୍କ ନେତୃତ୍ୱରେ ତହସିର ସମଲେଶ୍ଵରୀ/ ପାଟନେଶ୍ୱରୀ ମନ୍ଦିର କମିଟିର ସଭାପତି ସୁରେନ୍ଦ୍ର ମହଲା, ସମ୍ପାଦକ ବଂଶୀପାଣି ସାହା, ଶଶାଙ୍କ ମହଲା,ମକରଧ୍ୱଜ ସାହା, ଉତ୍ତମ କୁମାର ଭୋଇ , ଖଗେନ୍ଦ୍ର ଭୋଇ, ଡମ୍ବରୁଧର ଭୋଇ ଉପସ୍ଥିତ ରହିଥିଲେ । ସେମାନଙ୍କ ସହ କେସିଙ୍ଗାରେ ଥିବା ମାଆଙ୍କ ଭକ୍ତବୃନ୍ଦ ଉପସ୍ଥିତ ରହି ମାଆଙ୍କ ବିଗ୍ରହକୁ ହରିବୋଲ ହୁଳହୁଳିରେ ସ୍ଵାଗତ କରି ତହସିରରେ ନିର୍ମିତ ମାଆଙ୍କ ନୂତନ ମନ୍ଦିରକୁ ପାଛୋଟି ନେଇଥିଲେ ।
