ଇସଲାମାବାଦ: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଦଳ ପାକିସ୍ତାନ ତେହରିକ-ଏ-ଇନସାଫ (PTI) ତାଙ୍କ ଦୁଇ ବର୍ଷର କାରାବାସର ବାର୍ଷିକୀ ଉପଲକ୍ଷେ ଅଗଷ୍ଟ ୫ ତାରିଖରେ ଦେଶବ୍ୟାପୀ ବିକ୍ଷୋଭ ଆୟୋଜନ କରିଛି। ଏହି ବିକ୍ଷୋଭ ଇମ୍ରାନ ଖାନଙ୍କୁ ମୁକ୍ତି ଦାବି କରି ପାକିସ୍ତାନ ସହ ଆମେରିକା ଓ ୟୁରୋପରେ ଥିବା PTI ସମର୍ଥକଙ୍କ ମଧ୍ୟରେ ମଧ୍ୟ ଆୟୋଜିତ ହୋଇଛି। ଏହାର ଜବାବରେ ପାକିସ୍ତାନ ସରକାର ଇସଲାମାବାଦ ଓ ରାୱଲପିଣ୍ଡିରେ କଡା ସୁରକ୍ଷା ବ୍ୟବସ୍ଥା ଗ୍ରହଣ କରିଛନ୍ତି।

ରାୱାଲପିଣ୍ଡି ଜିଲ୍ଲା ପ୍ରଶାସନ ଅଗଷ୍ଟ ୫ ତାରିଖରୁ ୧୦ ତାରିଖ ପର୍ଯ୍ୟନ୍ତ କୋଡ ଅଫ କ୍ରିମିନାଲ ପ୍ରୋସିଜର (CrPC)ର ଧାରା ୧୪୪ ଜାରି କରିଛି। ଯାହା ଚାରି କିମ୍ବା ତତୋଧିକ ଲୋକଙ୍କ ସମାବେଶକୁ ନିଷିଦ୍ଧ କରିଛି। ରାୱାଲପିଣ୍ଡିର ଆଦିଆଲା ଜେଲ ବାହାରେ, ଯେଉଁଠାରେ ଇମ୍ରାନ ଖାନ ବନ୍ଦୀ ଅଛନ୍ତି, ୪,୦୦୦ରୁ ଅଧିକ ପୁଲିସ କର୍ମୀ ଏବଂ ଦଙ୍ଗା ନିୟନ୍ତ୍ରଣ ବାହିନୀ ମୁତୟନ କରାଯାଇଛି। ଏହା ସହିତ, ମଧ୍ୟରାତ୍ରିରେ ପୋଲିସ ବିଭିନ୍ନ ସ୍ଥାନରେ ଚଢାଉ କରି ୩୦୦ରୁ ଅଧିକ PTI କର୍ମୀଙ୍କୁ ଗିରଫ କରିଛି। ଲାହୋରରେ ମଧ୍ୟ ୩୦ରୁ ଅଧିକ PTI କର୍ମୀଙ୍କୁ ପୁଲିସ ଗିରଫ କରିଥିବା ନେଇ ସୂଚନା ମିଳିଛି।

ଇମ୍ରାନ ଖାନଙ୍କୁ ୨୦୨୩ ମସିହା ଅଗଷ୍ଟ ୫ରେ ତୋଷାଖାନା ମାମଲାରେ ଗିରଫ କରାଯାଇଥିଲା। ଯେଉଁଥିରେ ତାଙ୍କୁ ରାଷ୍ଟ୍ରୀୟ ଉପହାର ବେଆଇନ ଭାବେ ବିକ୍ରି କରିବା ଅଭିଯୋଗରେ ଦୋଷୀ ସାବ୍ୟସ୍ତ କରାଯାଇଥିଲା। PTI ଏହି ଗିରଫଦାରୀକୁ ରାଜନୈତିକ ପ୍ରତିହିଂସା ବୋଲି ଅଭିଯୋଗ କରିଛି। ଦଳ ଦାବି କରୁଛି ଯେ ୨୦୨୨ରେ ମହାଭିଯୋଗ ପ୍ରସ୍ତାବ ମାଧ୍ୟମରେ ଖାନଙ୍କୁ କ୍ଷମତାଚ୍ୟୁତ କରାଯାଇଥିଲା ଏବଂ ତାଙ୍କ ବିରୁଦ୍ଧରେ ୨୦୦ରୁ ଅଧିକ ମାମଲା ରୁଜୁ କରାଯାଇଥିଲା।

ପ୍ରଧାନମନ୍ତ୍ରୀ ଶେହବାଜ ଶରିଫଙ୍କ ନେତୃତ୍ୱାଧୀନ ସରକାର PTIକୁ ପାକିସ୍ତାନରେ ଅଶାନ୍ତି ସୃଷ୍ଟି କରିବା ନେଇ ଅଭିଯୋଗ କରିଛନ୍ତି। ଆଭ୍ୟନ୍ତରୀଣ ମନ୍ତ୍ରୀ ମୋହସିନ ନକଭି ବିକ୍ଷୋଭକାରୀଙ୍କ ବିରୁଦ୍ଧରେ "କଠୋର ପଦକ୍ଷେପ" ନେବା ପାଇଁ ଚେତାବନୀ ଦେଇଛନ୍ତି। ଏହାସହ ଜେଲରେ ଥିବା ଇମ୍ରାନଙ୍କ ପାଇଁ ମଧ୍ୟ ସୁରକ୍ଷା ବ୍ୟବସ୍ଥାକୁ କଡାକଡି କରାଯିବା ସହ ରାସ୍ତାଘାଟରେ ବ୍ୟାରିକେଡ ଲଗାଯାଇଛି ଏବଂ ସେଫ୍ ସିଟି କ୍ୟାମେରା ଓ ପେଟ୍ରୋଲିଂ ଟିମ ମୁତୟନ କରାଯାଇଛି।

PTI ଦାବି କରିଛି ଯେ ସରକାର ଏବଂ ସେନା ମୁଖ୍ୟ ଆସିମ ମୁନିରଙ୍କ ନେତୃତ୍ୱାଧୀନ ସାମରିକ ସ୍ଥାପନା ଇମ୍ରାନ ଖାନଙ୍କୁ ରାଜନୈତିକ ଭାବେ ଦମନ କରିବାରେ ଲାଗିଛନ୍ତି। ଦଳ କହିଛି ଯେ ଖାନଙ୍କ ଗିରଫଦାରୀ ଏକ ରାଜନୈତିକ ଷଡଯନ୍ତ୍ର ଏବଂ ନ୍ୟାୟ ନମିଳିବା ଯାଏ ସେମାନେ ଶାନ୍ତିପୂର୍ଣ୍ଣ ବିକ୍ଷୋଭ ଜାରି ରଖିବେ।

ଇମ୍ରାନ ଖାନ ୨୦୨୨ରେ ମହାଭିଯୋଗ ପ୍ରସ୍ତାବ ମାଧ୍ୟମରେ କ୍ଷମତାଚ୍ୟୁତ ହେବା ପରେ ବିଭିନ୍ନ ମାମଲାରେ ଅଭିଯୁକ୍ତ ହୋଇଛନ୍ତି। ତାଙ୍କ ଦଳ ୨୦୨୪ ସାଧାରଣ ନିର୍ବାଚନରେ ସ୍ୱାଧୀନ ପ୍ରାର୍ଥୀ ଭାବେ ସର୍ବାଧିକ ଆସନ ହାସଲ କରିଥିଲେ ମଧ୍ୟ, ନିର୍ବାଚନ ଚିହ୍ନ ନ ମିଳିବା ଯୋଗୁଁ ସେମାନେ ସରକାର ଗଠନ କରିପାରି ନଥିଲେ।

ପାକିସ୍ତାନରେ ଏହାକୁ ନେଇ ରାଜନୈତିକ ଅସ୍ଥିରତା ବୃଦ୍ଧି ପାଉଛି। ଏବଂ ଏହି ବିକ୍ଷୋଭ ସରକାର ଓ PTI ମଧ୍ୟରେ ଚାଲିଥିବା ଉତ୍ତେଜନାକୁ ଆହୁରି ତୀବ୍ର କରିଛି।