ବ୍ରିସବେନ,୦୮/୧୧: ଆଜି ଘରୋଇ ଅଷ୍ଟ୍ରେଲିଆ ଓ ଭାରତ ମଧ୍ୟରେ ପଞ୍ଚମ ତଥା ଅନ୍ତିମ ଟି-ଟ୍ୱେଣ୍ଟି ଖେଳାଯିବ । ଭାରତ ୨-୧ରେ ସିରିଜ ଆଗୁଆ ରହିଛି । ତେଣୁ ଭ୍ରମଣକାରୀ ଦଳ ବିଜୟ ଜାରି ରଖି ସିରିଜ କବ୍ଜା କରିବାକୁ ପ୍ରୟାସ କରିବ । ଅଷ୍ଟ୍ରେଲିଆ ସିରିଜ ବରାବର ପାଇଁ ସବୁ ଶକ୍ତି ଖଟାଇବାକୁ ପ୍ରସ୍ତୁତ । ତେଣୁ ଆଜି ଏକ ସଂଘର୍ଷପୂର୍ଣ୍ଣ ମୁକାବିଲା ଦେଖିବାକୁ ମିଳିବ ।
ଦ୍ୱିତୀୟ ମ୍ୟାଚ୍ରେ ପରାଜିତ ହେବା ପରେ ଭାରତୀୟ ଦଳ ଲଢୁଆ ଖେଳ ପ୍ରଦର୍ଶନ କରି ପରବର୍ତ୍ତୀ ୨ଟି ମ୍ୟାଚ୍ ଜିତି ସିରିଜ ଅଗ୍ରଣୀ ହାସଲ କରିଛି । ଚତୁର୍ଥ ମୁକାବିଲାରେ ଭାରତ ସବୁ ବିଭାଗରେ ଶ୍ରେଷ୍ଠ ପ୍ରଦର୍ଶନ କରି ଦମ୍ଦାର ବିଜୟ ହାସଲ କରିଥିଲା । ଭାରତୀୟ ସ୍ପିନରଙ୍କ ମୁକାବିଲା କରିବାରେ ଘରୋଇ ଦଳ ସମ୍ପୂର୍ଣ୍ଣ ବିଫଳ ହୋଇଥିଲା । ଅବଶ୍ୟ ବ୍ରିସବେନ୍ ପିଚ୍ରେ ସ୍ପିନରଙ୍କ ପାଇଁ ସେଭଳି ସହାୟତା ମିଳିବ ନାହିଁ । ତଥାପି ଭାରତୀୟ ସ୍ପିନରମାନେ ଘରୋଇ ବ୍ୟାଟରଙ୍କୁ ବାନ୍ଧି ରଖିବାକୁ ପ୍ରସ୍ତୁତ ।
ଅଷ୍ଟ୍ରେଲିଆ ପୂର୍ବ ସଫଳତାକୁ ଦୋହରାଇବାକୁ ପ୍ରୟାସ କରିବ । ପୂର୍ବରୁ ୨୦୧୮ରେ ଉଭୟ ଦଳ ଏହି ଗ୍ରାଉଣ୍ଡରେ ଏକ ଟି-ଟ୍ୱେଣ୍ଟି ମ୍ୟାଚ୍ ଖେଳିଥିଲେ । ଅଷ୍ଟ୍ରେଲିଆ ଉକ୍ତ ମ୍ୟାଚ୍ରେ ଭାରତକୁ ୪ ରନ୍ରେ ହରାଇଥିଲା । ମାତ୍ର ଏଥିପାଇଁ ପ୍ରମୁଖ ଖେଳାଳିଙ୍କୁ ଦାୟିତ୍ୱ ମୁଣ୍ଡାଇବାକୁ ହେବ । ଫିଟ୍ ହୋଇ ଫେରିବା ପରଠୁ ଜୋସ ଇଂଲିଶ ଫର୍ମ ପାଇଁ ସଂଘର୍ଷ କରୁଛନ୍ତି । ଗ୍ଲେନ ମ୍ୟାକ୍ସୱେଲ୍ ଏପର୍ଯ୍ୟନ୍ତ ଲୟ ଫେରି ପାଇନାହାନ୍ତି । ଘରୋଇ ଦଳର ବ୍ୟାଟରଙ୍କ ମଧ୍ୟରେ କେବଳ ମିଚେଲ ମାର୍ଶ ଓ ଟିମ ଡେଭିଡ୍ ଫର୍ମରେ ରହିଛନ୍ତି। ଭାରତର କିଛି ଖେଳାଳି ମଧ୍ୟ ଫର୍ମକୁ ନେଇ ସଂଘର୍ଷ କରୁଛନ୍ତି । ତିଳକ ବର୍ମା, ଶୁଭମନ ଗିଲ୍, ସୂର୍ଯ୍ୟକୁମାର ଯାଦବ ଏପର୍ଯ୍ୟନ୍ତ ଦକ୍ଷତା ମୁତାବକ ପ୍ରଦର୍ଶନ କରି ନାହାନ୍ତି ।
ଭାରତ ଶେଷ ଥର ପାଇଁ ୨୦୧୬ରେ ଅଷ୍ଟ୍ରେଲିଆ ବିପକ୍ଷରେ ଏକ ଟି-ଟ୍ୱେଣ୍ଟି ସିରିଜ ମୂଳପୋଛ କରିଥିଲା । ମାତ୍ର ଏହାପରଠୁ ଅଷ୍ଟ୍ରେଲିଆ ବିପକ୍ଷରେ ଭାରତ କ୍ରମାନ୍ୱୟରେ ୩ଟି ଟି-ଟ୍ୱେଣ୍ଟି ଜିତି ନାହିଁ । ଭାରତ ପାଇଁ ଏହି ସୁଯୋଗ ରହିଛି । ଆଜି ଯଶପ୍ରୀତ ବୁମରାଙ୍କ ଉପରେ ନଜର ରହିବ । ଗତ ୩ଟି ମ୍ୟାଚ୍ରେ ମାତ୍ର ୩ଟି ୱିକେଟ୍ ନେଇଥିବା ବୁମରା ଆଉ ଗୋଟିଏ ୱିକେଟ୍ ନେଲେ ୧୦୦ ଟି-ଟ୍ୱେଣ୍ଟି ୱିକେଟ୍ କ୍ଲବ୍ରେ ସ୍ଥାନ ପାଇବେ । ସେ ପ୍ରଥମ ଭାରତୀୟ ଭାବେ ୩ଟି ଯାକ ଫର୍ମାଟ୍ରେ ୧୦୦ ୱିକେଟ୍ ପୂରଣ କରିବେ ।
ଭାରତ ଏକାଦଶରେ ପରିବର୍ତ୍ତନ କରିବା ସମ୍ଭାବନା ନାହିଁ । ପିଚ୍ ଓ ଜଳବାୟୁ ପେସ ବୋଲରଙ୍କୁ ସୁହାଉଥିଲେ ହେଁ ଦଳ ୩ ସ୍ପିନର ନେଇ ଖେଳିବା ନିଶ୍ଚିତ । ଅକ୍ଷର ପଟେଲ ଓ ୱାସିଂଟନ ସୁନ୍ଦର ସବୁ ପରିବେଶରେ ୱିକେଟ୍ ହାତେଇବାର କ୍ଷମତା ରଖିଛନ୍ତି । ଅଷ୍ଟ୍ରେଲିଆ ଏକାଦଶରେ ପରିବର୍ତ୍ତନ କରିବା ଆଶା କରାଯାଉଛି । ଜୋସ ଫିଲିପଙ୍କ ସ୍ଥାନରେ ଅଲ୍ରାଉଣ୍ଡର ମିଚେଲ ଓଏନଙ୍କୁ ପୁନର୍ବାର ଏକାଦଶକୁ ଡକାଇବା ସମ୍ଭାବନା ରହିଛି ।
ଗାବା ଗ୍ରାଉଣ୍ଡର ପାରମ୍ପରିକ ଭାବେ ପେସ୍ ବୋଲରଙ୍କୁ ସହାୟତା କରି ଆସିଛି । ଏଠାରେ ବଲ୍ ଅତିରିକ୍ତ ସୁଇଂ ଓ ବାଉନ୍ସ ହୋଇଥାଏ । ଆଜି ମଧ୍ୟ ପେସ୍ ବୋଲରଙ୍କୁ ପିଚ୍ ଯଥେଷ୍ଟ ସହାୟତା କରିବ । ତଥାପି ଏଠାରେ ବଡ଼ ସ୍କୋର ସମ୍ଭବ । ଏଠାରେ ଟସ ସେଭଳି ଗୁରୁତ୍ୱ ରଖିବ ନାହିଁ । ତଥାପି ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଆଶା କରାଯାଉଛି ।
ସମ୍ଭାବ୍ୟ ଦଳ
ଭାରତ: ଅଭିଷେକ ଶର୍ମା, ଶୁଭମନ ଗିଲ୍, ସୂର୍ଯ୍ୟକୁମାର ଯାଦବ (ଅଧିନାୟକ), ତିଳକ ବର୍ମା, ଅକ୍ଷର ପଟେଲ, ୱାସିଂଟନ ସୁନ୍ଦର, ଜିତେଶ ଶର୍ମା, ଶିବମ ଦୁବେ, ଅର୍ଶଦୀପ ସିଂହ, ବରୁଣ ଚକ୍ରବର୍ତ୍ତୀ, ଯଶପ୍ରୀତ ବୁମରା ।
ଅଷ୍ଟ୍ରେଲିଆ: ମାଥ୍ୟୁ ସର୍ଟ, ମିଚେଲ ମାର୍ଶ (ଅଧିନାୟକ), ଜୋସ ଇଂଲିଶ, ଟିମ ଡେଭିଡ୍, ଗ୍ଲେନ ମ୍ୟାକ୍ସୱେଲ୍, ମିଚେଲ ଓଏନ, ମାର୍କସ ଷ୍ଟଇନିସ, ଜାଭିୟର ବାର୍ଟଲେଟ୍, ବେନ ଡାର୍ସିୟସ, ନାଥାନ ଏଲିସ, ଆଡାମ ଜାମ୍ପା ।
