ନୂଆଦିଲ୍ଲୀ,୦୨/୦୫: ପାକିସ୍ତାନ ଗୁପ୍ତଚରକୁ ଗିରଫ କରିଛି ରାଜସ୍ଥାନ ଇଣ୍ଟେଲିଜେନ୍ସ । ଅଭିଯୁକ୍ତ ଗୁପ୍ତଚର ଜୈସାଲମିରର ପଠାନ ଖାନ୍ ବୋଲି ଜଣାପଡ଼ିଛି । ସେ ପାକିସ୍ତାନ ଇଣ୍ଟର ସର୍ଭିସେସ୍ ଇଣ୍ଟେଲିଜେନ୍ସ ବା ଆଇଏସଆଇରେ ଗୁପ୍ତଚର ଭାବେ କାର୍ଯ୍ୟ କରୁଥିଲା ।ବିଏସଏଫର ସିକ୍ରେଟ ସୂଚନା ସବୁ ପଠାନ୍ ପାକିସ୍ତାନ ଏଜେନ୍ସିକୁ ଦେଉଥିଲା ।
ତେବେ କିଛି ବର୍ଷ ହେବ ପଠାନ୍ ପାକିସ୍ତାନ ପାଇଁ କାମ କରୁଛି । ସୀମାରେ ସନ୍ଦେହଜନକ କାର୍ଯ୍ୟ କରୁଥିବାବେଳେ ପଠାନକୁ ଦେଖାଯାଇଥିବା କହିଛନ୍ତି ରାଜସ୍ଥାନ ଇଣ୍ଟେଲିଜେନ୍ସର ଆଇଜି ବିଷ୍ଣୁକାନ୍ତ । ଆଇଏସଆଇ ସହିତ ପଠାନ୍ କଣ୍ଟାକରେ ରହୁଥିଲା । ସୋସିଆଲ ମିଡିଆ ଏବଂ ବ୍ୟକ୍ତିଗତ ସାକ୍ଷାତକାର ଜରିଆରେ ପଠାନ୍ ଗୁଇନ୍ଦା ସୂଚନା ପାକିସ୍ତାନ ଏଜେନ୍ସିକୁ ଦେଉଥିବା ଜଣାପଡ଼ିଛି । ୨୦୧୩ରେ ପଠାନ୍ ପ୍ରଥମ ଥର ଲାଗି ପାକିସ୍ତାନ ଯାଇଥିଲା । ଯେଉଁଠାରେ ସେ ଆଇଏସଆଇ ସହିତ ଭାରତର ଗୁଇନ୍ଦା ତଥ୍ୟ ଦେବା ନେଇ କଥାବାର୍ତ୍ତା ହୋଇଥିଲା ।ଭାରତ ଫେରିବା ପରେ ପାକିସ୍ତାନ ଆଇଏସଆଇ କଣ୍ଟାକ୍ଟରେ ପଠାନ୍ ରହିଥିଲା ଏବଂ ଭାରତୀୟ ସିମକାର୍ଡ ପାକିସ୍ତାନକୁ ଯୋଗାଉଥିଲା ।ତେବେ ବର୍ତ୍ତମାନ ଜୟପୁରରେ ପାଠାନକୁ ପଚରାଉଚରା ଚାଲିଛି । ତା’ମୋବାଇଲ ଫୋନରୁ ଅନେକ ଭିଡିଓ ଓ ଗୁଇନ୍ଦା ତଥ୍ୟ ସଂଗ୍ରହ କରାଯାଇଛି ।
