ଜଗତସିଂହପୁର, ୦୪/୦୮ : ଜଗତସିଂହପୁର ଜିଲ୍ଲା ବିରିଡ଼ି ବ୍ଲକ ୨୨ମୌଜା ବାଗଲପୁର ଗ୍ରାମରେ ଜଣ୍ଡିସ୍ ଆତଙ୍କ। ସୋମବାର ସୁଦ୍ଧା ଗ୍ରାମରେ ମୋଟ ୪ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି। ଆକ୍ରାନ୍ତଙ୍କ ନିକଟରେ ଡାକ୍ତରୀ ଦଳ ପହଞ୍ଚି ଚିକିତ୍ସା ସେବା ଯୋଗାଇ ଦେଇଛନ୍ତି।
ସୂଚନାନୁଯାୟୀ, ଗତ ୩୧ତାରିଖରେ ବିରିଡ଼ି ବ୍ଲକ ୨୨ମୌଜା ବାଗଲପୁର ଗାଁର କିଛି ଲୋକଙ୍କ ରକ୍ତ ନମୁନା ସଂଗ୍ରହ କରାଯାଇଥିଲା। ଯେଉଁଥିରେ ପ୍ରଥମେ ଶିବପ୍ରସାଦ ଭୋଇ (୪୦ ବର୍ଷ)ଙ୍କର ପଜିଟିଭ ବାହାରିଥିଲା। ତାଙ୍କର ଚିକିତ୍ସା ଚାଲିଥିବାବେଳେ ୨ତାରିଖ ଦିନ ୮ଜଣଙ୍କ ରକ୍ତ ନମୁନା ସଂଗ୍ରହ କରାଯାଇ ପରୀକ୍ଷା ପାଇଁ ପଠାଯାଇଥିଲା। ସେମାନଙ୍କ ମଧ୍ୟରୁ ଜଣେ ୧୨ବର୍ଷର ନାବାଳକଙ୍କ ପଜିଟିଭ ବାହାରିଥିବା ବେଳେ ଆଉ ଜଣେ ୧୩ ବର୍ଷର ନାବାଳକଙ୍କ ପଜିଟିଭ୍ ବାହାରିଛି। ସେହିପରି ଅନ୍ୟ ଜଣେ ଚନ୍ଦ୍ରଶେଖର ସାମଲ( ୩୨ ବର୍ଷ)କାମଳ ରୋଗର ଶିକାର ହୋଇଛନ୍ତି। ସମସ୍ତ ଆକ୍ରାନ୍ତଙ୍କ ନିକଟରେ ଡାକ୍ତରୀ ଦଳ ପହଞ୍ଚି ଚିକିତ୍ସା ଯୋଗାଇ ଦେଉଥିବା ବାଗଲପୁର ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରର ଡାକ୍ତର ସୁଭଦର୍ଶିନୀ ଦାଶ କହିଛନ୍ତି। ୨୨ମୌଜା ପୂରଣ ପଞ୍ଚାୟତ କମଳପୁର ଦଣ୍ଡାସାହିରେ ଆଜି ସୁଦ୍ଧା ୭ଜଣ କାମଳ ରୋଗରେ ଆକ୍ରାନ୍ତ ହୋଇଥିବା ସନ୍ଦେହ କରାଯାଉଛି।
