ନୂଆଦିଲ୍ଲୀ,୨୫।୧: ପ୍ରସିଦ୍ଧ ସାମ୍ବାଦିକ ଏବଂ ଲେଖକ ମାର୍କ ଟଲିଙ୍କ ପରଲୋକ। ସେ ୯୦ ବର୍ଷ ବୟସରେ ଦିଲ୍ଲୀରେ ଶେଷ ନିଶ୍ୱାସ ତ୍ୟାଗ କରିଛନ୍ତି।ବହୁ ସମ୍ମାନଜନକ ପୁରସ୍କାରପ୍ରାପ୍ତ ମାର୍କ ଟଲି କିଛି ସମୟ ଧରି ଅସୁସ୍ଥ ଥିଲେ ଏବଂ ଗତ ସପ୍ତାହ ଏକ ଘରୋଇ ହସ୍ପିଟାଲରେ ଭର୍ତ୍ତି ହୋଇଥିଲେ। ସେ ଭାରତ ଉପରେ ଅନେକ ପୁସ୍ତକ ଲେଖିଥିଲେ। ୨୪ ଅକ୍ଟୋବର, ୧୯୩୫ରେ କଲିକତାରେ ଜନ୍ମଗ୍ରହଣ କରିଥିବା ଟଲି ୨୨ ବର୍ଷ ଧରି ବିବିସିର ନୂଆଦିଲ୍ଲୀ ବ୍ୟୁରୋ ମୁଖ୍ୟ ଭାବରେ କାର୍ଯ୍ୟ କରିଥିଲେ।
ଜଣେ ପ୍ରସିଦ୍ଧ ଲେଖକ ହେବା ସହିତ, ଟଲି ବିବିସି ରେଡିଓ ୪ କାର୍ଯ୍ୟକ୍ରମ ‘ସମଥିଙ୍ଗ୍ ଅଣ୍ଡରଷ୍ଟୁଡ୍’ ର ମଧ୍ୟ ହୋଷ୍ଟ ଥିଲେ। ମାର୍କ ଟଲିଙ୍କୁ ୨୦୦୨ ରେ ବ୍ରିଟେନରେ ‘ନାଇଟହୁଡ୍’ ଉପାଧି ଦିଆଯାଇଥିଲା ଏବଂ ୨୦୦୫ ରେ ଭାରତ ସରକାର ଦ୍ୱାରା ପଦ୍ମଭୂଷଣ ପ୍ରଦାନ କରାଯାଇଥିଲା। ଟଲି ଭାରତ ଉପରେ ଅନେକ ପୁସ୍ତକ ଲେଖିଛନ୍ତି, ଯେଉଁଥିରେ ‘ନୋ ଫୁଲ୍ ଷ୍ଟପ୍ସ ଇନ୍ ଇଣ୍ଡିଆ’, ‘ଇଣ୍ଡିଆ ଇନ୍ ସ୍ଲୋ ମୋସନ୍’,ଏବଂ ‘ଦ ହାର୍ଟ ଅଫ୍ ଇଣ୍ଡିଆ’ ରହିଛି।
ମାର୍କ ଟଲି ଜଣେ ନିର୍ଭୀକ ସାମ୍ବାଦିକ ଥିଲେ ଯିଏ ଦଶନ୍ଧି ଧରି ଭାରତର ପ୍ରମୁଖ ଘଟଣାବଳୀକୁ ନେଇ ବିଶ୍ୱର ଦୃଷ୍ଟି ଆକର୍ଷଣ କରିଥିଲେ। ୧୯୭୫-୭୭ ମଧ୍ୟରେ ସେ ଇନ୍ଦିରା ଗାନ୍ଧୀ ସରକାରଙ୍କ ବିରୁଦ୍ଧରେ ଏତେ ସାହସିକ ଭାବରେ ରିପୋର୍ଟିଂ କରିଥିଲେ ଯେ ତାଙ୍କୁ ଦେଶ ଛାଡିବାକୁ ବାଧ୍ୟ କରାଯାଇଥିଲା।
ପ୍ରମୁଖ ଘଟଣାବଳୀର କଭରେଜ୍
ସେ ୧୯୭୧ ଭାରତ-ପାକିସ୍ତାନ ଯୁଦ୍ଧ ଏବଂ ବାଂଲାଦେଶ ମୁକ୍ତି ଯୁଦ୍ଧକୁ କଭର କରିଥିଲେ। ୧୯୮୪ ମସିହାରେ ଅମୃତସରର ସ୍ୱର୍ଣ୍ଣ ମନ୍ଦିରରେ ସାମରିକ କାର୍ଯ୍ୟାନୁଷ୍ଠାନ ଉପରେ ରିପୋର୍ଟିଂ କରିଥିବା ବିଶ୍ୱର କିଛି ସାମ୍ବାଦିକଙ୍କ ମଧ୍ୟରେ ସେ ଥିଲେ। ସେ ଇନ୍ଦିରା ଗାନ୍ଧୀଙ୍କ ହତ୍ୟା, ପରବର୍ତ୍ତୀ ଶିଖ ବିରୋଧୀ ଦଙ୍ଗା ଏବଂ ଭୋପାଳ ଗ୍ୟାସ ଟ୍ରାଜେଡି (୧୯୮୪) ର ପୀଡିତଙ୍କ ଯନ୍ତ୍ରଣାକୁ ମଧ୍ୟ ବିଶ୍ୱ ସମ୍ମୁଖରେ ଉପସ୍ଥାପନ କରିଥିଲେ। ଟଲି ୧୯୯୧ ରେ ରାଜୀବ ଗାନ୍ଧୀଙ୍କ ହତ୍ୟା ଏବଂ ୧୯୯୨ ରେ ଅଯୋଧ୍ୟାରେ ବାବ୍ରୀ ମସଜିଦ ଧ୍ୱଂସ ଘଟଣାସ୍ଥଳେ ଉପସ୍ଥିତ ଥିଲେ, ସେଠାକାର ପରିସ୍ଥିତି ଉପରେ ରିପୋର୍ଟିଂ କରିଥିଲେ। ମାର୍କ ଟଲିଙ୍କୁ ତାଙ୍କର ନିରପେକ୍ଷ ଏବଂ ସାହସିକ ସାମ୍ବାଦିକତା ପାଇଁ ସର୍ବଦା ମନେ ରଖାଯିବ।
ଆହୁରି ପଢନ୍ତୁ : ଜାପାନରେ ଏବେ ଆଉ ଦେଖିବାକୁ ମିଳିବନି ପାଣ୍ଡା,୫୦ବର୍ଷ ପରେ ଏଭଳି ହେବ ପ୍ରଥମ
