ନୂଆଦିଲ୍ଲୀ,୨୯।୬: କାର୍ଗିଲ ଯୁଦ୍ଧରେ କ୍ୟାପଟେନ୍ ସୌରଭ କାଳିଆଙ୍କ ବଳିଦାନକୁ ୨୬ ବର୍ଷ ହୋଇଯାଇଛି। କିନ୍ତୁ ତାଙ୍କ ବାପା ଆଜି ବି ପାକିସ୍ତାନକୁ ଅନ୍ତର୍ଜାତୀୟ ନ୍ୟାୟାଳୟ (ICJ) କୁ ଟାଣିବାକୁ ଚେଷ୍ଟା କରୁଛନ୍ତି। ତାଙ୍କ ବାପା ଅଭିଯୋଗ କରିଛନ୍ତି ଯେ ପାକିସ୍ତାନ ଜେନେଭା ଚୁକ୍ତିନାମା ଉଲ୍ଲଂଘନ କରି ତାଙ୍କ ପୁଅକୁ ଅମାନବୀୟ ଭାବରେ ନିର୍ଯାତନା ଦେଇଥିଲା। ଆଜି କ୍ୟାପଟେନ୍ କାଳିଆଙ୍କ ୪୯ତମ ଜନ୍ମଦିନ ହୋଇଥାନ୍ତା। ଏହି ଅବସରରେ ତାଙ୍କ ବାପା ଡକ୍ଟର ଏନ. କାଳିଆ (୭୮ ବର୍ଷ) ପୁଣି ଥରେ ତାଙ୍କ ପୁଅର ସାହସିକତାକୁ ମନେ ପକାଇଛନ୍ତି।ସେ ଏବେ ବି ନ୍ୟାୟ ପାଇଁ ଆଶା ରଖିଛନ୍ତି।

ଡକ୍ଟର କାଳିଆ ହେଉଛନ୍ତି, ଇନଷ୍ଟିଚ୍ୟୁଟ୍ ଅଫ୍ ହିମାଳୟନ ବାୟୋ-ରିସୋର୍ସ ଟେକ୍ନୋଲୋଜି (IHBT)ର ଅବସରପ୍ରାପ୍ତ ବରିଷ୍ଠ ବୈଜ୍ଞାନିକ । ସେ କହିଛନ୍ତି "ଦେଶର ନ୍ୟାୟ ବ୍ୟବସ୍ଥା ଏବଂ ରାଜନୈତିକ ନେତୃତ୍ୱ ଉପରେ ମୋର ପୂର୍ଣ୍ଣ ବିଶ୍ୱାସ ଅଛି। ମୁଁ ଆଶା କରୁଛି, ଏହି ଜଘନ୍ୟ ଅପରାଧର ଦୋଷୀମାନେ ଦିନେ ଦଣ୍ଡ ପାଇବେ। ତାଙ୍କର ଅତୁଳନୀୟ ବଳିଦାନ ସମଗ୍ର ଶୋଇଥିବା ସମାଜକୁ ଜାଗ୍ରତ କରିଛି ଏବଂ ଦେଶପ୍ରେମର ନିଆଁକୁ ପୁନର୍ବାର ଜାଗ୍ରତ କରିଛି।’

ଲେଫ୍ଟନାଣ୍ଟ ସୌରଭ କାଲିଆ ୪-ଜାଟ୍ ରେଜିମେଣ୍ଟର ଥିଲେ। ୧୯୯୯ ମଇ ମାସର ତୃତୀୟ ସପ୍ତାହରେ, ସେ  ପାଞ୍ଚ ଜଣ ସୈନିକଙ୍କ ସହିତ କାର୍ଗିଲର କାକସର ଅଞ୍ଚଳରେ ଏକ ଗୁପ୍ତ ପର୍ଯ୍ୟବେକ୍ଷଣ ମିଶନରେ ଯାଇଥିଲେ। ପୁରା ଟିମ୍ ନିଖୋଜ ହୋଇଗଲା ଏବଂ ସେମାନଙ୍କ ନିଖୋଜର ପ୍ରଥମ ଖବର ପାକ୍ ଅଧିକୃତ କାଶ୍ମୀରର 'ସ୍କାର୍ଡୁ ରେଡିଓ'ରେ ପ୍ରସାରିତ ହୋଇଥିଲା।

ଜୁନ୍ ୯ ତାରିଖରେ ସୌରଭ କାଲିଆ ଏବଂ ତାଙ୍କ ସାଥୀ ଅର୍ଜୁନ ରାମ, ବନୱାର ଲାଲ, ଭିକାରମ୍, ମୂଳା ରାମ ଏବଂ ନରେଶ ସିଂହଙ୍କ ମୃତଦେହ ଭାରତକୁ ହସ୍ତାନ୍ତର କରାଯାଇଥିଲା। ଜୁନ୍ ୧୦ ତାରିଖରେ ପିଟିଆଇ ରିପୋର୍ଟ କରିଥିଲା ଯେ ପାକିସ୍ତାନ ଭାରତୀୟ ସୈନିକଙ୍କ ସହିତ ବର୍ବରତାର ସମସ୍ତ ସୀମା ଅତିକ୍ରମ କରିଛି। ଶହୀଦଙ୍କ ମୃତଦେହଗୁଡ଼ିକ ମଧ୍ୟରୁ ଅନେକଙ୍କ ଅଙ୍ଗପ୍ରତ୍ୟଙ୍ଗ ନଥିବା ଜଣାପଡ଼ିଥିଲା। ଆଖି ତାଡି ଦିଆଯାଇଥିଲା, ନାକ, କାନ ଏବଂ ଗୁପ୍ତାଙ୍ଗ  ମଧ୍ୟ କାଟି ଦିଆଯାଇଥିଲା। ଇତିହାସରେ ଭାରତ-ପାକ୍ ଯୁଦ୍ଧରେ ଏହା କେବେ ଘଟିନଥିଲା। ଭାରତ ଏହାକୁ ଅନ୍ତର୍ଜାତୀୟ ଚୁକ୍ତିନାମାର ଘୋର ଉଲ୍ଲଂଘନ ବୋଲି ଘୋଷଣା କରିଥିଲା।