ନୂଆଦିଲ୍ଲୀ: କର୍ଣ୍ଣାଟକର ବିଜୟପୁରା ଜିଲ୍ଲାରେ ଥିବା SBI (ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ) ଶାଖାରେ ଏକ ବଡ ଧରଣର ଡକାୟତି ହୋଇଛି । ଏଠାରେ ତିନି ଜଣ ମୁଖାପିନ୍ଧା ଅପରାଧୀ ଏକ ବଡ଼ ଡକାୟତି କରିଛନ୍ତି। ସେମାନେ ବ୍ୟାଙ୍କରେ ପ୍ରବେଶ କରି ବନ୍ଧୁକ ଏବଂ ଛୁରୀ ଦେଖାଇ କର୍ମଚାରୀ ମାନଙ୍କୁ ଭୟଭୀତ କରି ଆତଙ୍କ ରଚିଛନ୍ତି । ସେମାନେ ନଗଦ ୧ କୋଟି ଟଙ୍କା ଏବଂ ୨୦ କିଲୋ ସୁନା ଅଳଙ୍କାର ଲୁଟି ନେଇଛନ୍ତି । ଆଉ ପରେ ସେଠାରୁ ଫେରାର ହୋଇଯାଇଛନ୍ତି। ଡକାୟତ ମାନେ ଚାଲିଯିବା ପରେ, ବ୍ୟାଙ୍କ କର୍ମଚାରୀ ମାନେ ଘଟଣା ବିଷୟରେ ପୋଲିସକୁ ସୂଚନା ଦେଇଥିଲେ। ଏକ ପୋଲିସ ଟିମ୍ ତୁରନ୍ତ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି।
ପୋଲିସ ଅନୁଯାୟୀ, ମଙ୍ଗଳବାର ସନ୍ଧ୍ୟା ପ୍ରାୟ ସାଢେ ୬ଟା ସମୟରେ ଏହି ଘଟଣା ଘଟିଛି । ତିନି ଜଣ ମୁଖାପିନ୍ଧା ବ୍ୟକ୍ତି ବ୍ୟାଙ୍କ ଭିତରକୁ ପ୍ରବେଶ କରି କର୍ମଚାରୀ ମାନଙ୍କୁ ଭୟଭୀତ କରି ବନ୍ଧକ ରଖିଥିଲେ। ବ୍ୟାଙ୍କ ଅଧିକାରୀଙ୍କ ଅନୁଯାୟୀ, ଡକାୟତିର ପରିମାଣ ୨୧ କୋଟିରୁ ଅଧିକ। ବିଜୟପୁରା SP ଲକ୍ଷ୍ମଣ ନିମ୍ବାର୍ଗୀ କହିଛନ୍ତି ଯେ ବ୍ୟାଙ୍କ ଡକାୟତିର ତଦନ୍ତ ସମୟରେ ଜଣାପଡିଥିଲା ଯେ ଅଭିଯୁକ୍ତ ମାନେ ନକଲି ନମ୍ବର ପ୍ଲେଟ୍ ଥିବା ଏକ କାର ବ୍ୟବହାର କରିଥିଲେ ଏବଂ ଘଟଣା ପରେ ମହାରାଷ୍ଟ୍ରର ପନ୍ଧରପୁର ପଳାଇ ଯାଇଥିଲେ।
ଏସପି ଲକ୍ଷ୍ମଣ ନିମ୍ବାର୍ଗୀ କହିଛନ୍ତି ଯେ, ବ୍ୟାଙ୍କ ମ୍ୟାନେଜରଙ୍କ ଅଭିଯୋଗ ଆଧାରରେ ଏକ ମାମଲା ରୁଜୁ କରାଯାଇଛି। ଅଭିଯୁକ୍ତଙ୍କୁ ଖୋଜିବା ପାଇଁ ଏକ ସ୍ୱତନ୍ତ୍ର ଦଳ ଗଠନ କରାଯାଇଛି। ଏହି ସମୟରେ, ମୁଖ୍ୟମନ୍ତ୍ରୀ ସିଦ୍ଧରମୈୟା ଏହି ଘଟଣାକୁ ଗମ୍ଭୀରତାର ସହ ନେଇଛନ୍ତି ଏବଂ ବିଜୟପୁରା ଏସପି ଲକ୍ଷ୍ମଣ ନିମ୍ବାର୍ଗୀଙ୍କୁ ଏପରି ଘଟଣା ରୋକିବା ପାଇଁ କଠୋର ପଦକ୍ଷେପ ନେବାକୁ ଏବଂ ଅଭିଯୁକ୍ତଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦେଇଛନ୍ତି।
ମୁଖ୍ୟମନ୍ତ୍ରୀ ସିଦ୍ଧରମୈୟା କହିଛନ୍ତି ଯେ, କାରଟିକୁ ଚିହ୍ନଟ କରାଯାଇଛି। ମୁଁ ବିଜୟପୁରା ପୋଲିସ ଅଧିକ୍ଷକଙ୍କ ସହ କଥା ହୋଇଛି ଏବଂ ଅଭିଯୁକ୍ତଙ୍କୁ ଶୀଘ୍ର ଗିରଫ କରିବା ପାଇଁ ନିର୍ଦ୍ଦେଶ ଦେଇଛି। ସମସ୍ତ ଅଧିକାରୀଙ୍କୁ ମଧ୍ୟ ସଜାଗ ରହିବାକୁ ନିର୍ଦ୍ଦେଶ ଦିଆଯାଇଛି।
