ଭୁବନେଶ୍ୱର,୦୨/୦୨: ଯଜ୍ଞ ପାଇଁ ହୋମକୁଣ୍ଡ ପ୍ରସ୍ତୁତ କରାଯାଉଛି । ସାଧୁମାନେ ମାଟିରେ କୁଣ୍ଡ କରି ତହିଁରେ ଗୋବର ଓ ମାଟି ଲେପ ଦେଉଛନ୍ତି । ସେମାନଙ୍କ ରହଣି ପାଇଁ ଅସ୍ଥାୟୀ ଘର ତିଆରି ହେଉଛି । ସେହିପରି ଭିଡ଼ ହଟେଇବାକୁ ରାସ୍ତା ପାଶ୍ୱର୍ରେ ଲୁହାର ବାରିକେଡ୍ ଖଞ୍ଜା ଯାଉଛି । ବାହାର ରାଜ୍ୟରୁ ଖେଳଣା, ଫୁଲ ବେପାରୀ ଓ ଦୋଳି ବେପାରୀମାନେ ମଧ୍ୟ ଆସି ଖଣ୍ଡଗିରିରେ ପହଞ୍ଚିଲେଣି । ଯାତ୍ରା ପାଇଁ ମଧ୍ୟ ପେଣ୍ଡାଲ ସଜ୍ଜା ଚାଲିଛି ।
ତିନି ଦିନ ପରେ ଐତିହାସିକ ଖଣ୍ଡଗିରି ମେଳା । ସେଥିପାଇଁ ପାହାଡ଼ ପାଦଦେଶଠାରୁ ନେଇ ଜାଗମରା ରାସ୍ତା, ଖଣ୍ଡଗିରି ବାରି ଓ ବିଭିନ୍ନ ଯାତ୍ରା ପେଣ୍ଡାଲରେ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି । ଆସନ୍ତା ୪ ତାରିଖରୁ ହୋମଯଜ୍ଞରେ ଖଣ୍ଡଗିରି ପାହାଡ଼ କମ୍ପିବ । ଚଳିତବର୍ଷ ପ୍ରୟାଗରାଜରେ କୁମ୍ଭମେଳା ଚାଲୁଥିବାରୁ ପ୍ରତିବର୍ଷ ଯେଉଁଭଳି ଦେଶର କୋଣ ଅନୁକୋଣରୁ ସାଧୁସନ୍ଥ ଆସୁଥିଲେ, ଏଥରକ ସେମାନଙ୍କ ସଂଖ୍ୟା କମିପାରେ । ତଥାପି ପୁରୀ, ଢେଙ୍କାନାଳ ସହ ପଡୋଶୀ ପଶ୍ଚିମବଙ୍ଗ, ଛତିଶଗଡ଼ରୁ ସାଧୁସନ୍ଥ ଆସିବେ ବୋଲି ଏଠାରେ ପହଞ୍ଚିଥିବା କେତେକ ସାଧୁସନ୍ଥ କହିଛନ୍ତି । ମେଳା ଆରମ୍ଭରେ ପାହାଡ଼ ଉପରେ ଜୈନଙ୍କ ପୀଠ ପାଖରେ ଯଜ୍ଞ ଓ ଚଣ୍ଡୀ ଯଜ୍ଞ ହେବ । ସେହିପରି ମା’ ବାରଭୁଜାଙ୍କ ପାଖରେ ବୈଦିକ ବ୍ରାହ୍ମଣ ସମାଜ ପକ୍ଷରୁ ବିଶ୍ୱଶାନ୍ତି ଗୀତା ମହାଯଜ୍ଞ ସହ ନବଦିନାତ୍ମକ ରାମଚରିତ ମାନସ ପାରାୟଣ, ଗରିବ ବ୍ରାହ୍ମଣ ପିଲାଙ୍କ ସମୂହ ବ୍ରତ କାର୍ଯ୍ୟକ୍ରମ ରହିଛି । ପାହାଡ଼ ଚାରିପାଖରେ ସାଧୁସନ୍ଥଙ୍କ ଦ୍ୱାରା ୧୦୮ କୁଣ୍ଡୀୟ (ଧୂନି ଯଜ୍ଞ) କରାଯିବ
ଖଣ୍ଡଗିରି ମେଳା ଆସିଲେ ବଞ୍ଜାରାଙ୍କ ଭିଡ଼ ଜମେ । ସେମାନେ ରାସ୍ତାପାଶ୍ୱର୍ରେ ବସି ବେପାର କରନ୍ତି । ହେଲେ ଏଥରକ ଏହା ଉପରେ ଅଙ୍କୁଶ ଲଗାଇବା ପାଇଁ ରାସ୍ତାପାଶ୍ୱର୍ରେ ବାରିକେଡ୍ ତିଆରି କରାଯାଇଛି । ମେଳା ବେଳେ ଅସ୍ଥାୟୀ ଶୌଚାଳୟ ନଥିବାରୁ ଲୋକେ ରାସ୍ତା ଉପରେ ପରିସ୍ରା କରନ୍ତି । ବିଶେଷକରି ଓଭରବ୍ରିଜ୍ ତଳ ଦୁର୍ଗନ୍ଧରେ ଫାଟିପଡ଼େ । ତେଣୁ ଏଥରକ ଅସ୍ଥାୟୀ ଶୌଚାଳୟ କରିବାକୁ ସ୍ଥାନୀୟ ବ୍ୟବସାୟୀମାନେ ଦାବି କରିଛନ୍ତି ।
ସୂଚନାଯୋଗ୍ୟଯେ, ଗତ ଜାନୁଆରୀ ୧୦ରୁ ବିଶ୍ୱ ସନାତନ ବୈଦିକ ଧର୍ମ ପରିଷଦ ପକ୍ଷରୁ ପାହାଡ଼ ପାଦଦେଶରେ ପୂର୍ଣ୍ଣ କୁମ୍ଭମେଳା ଆରମ୍ଭ ହୋଇସାରିଛ।
