ଭୁବନେଶ୍ୱର,୨୧/୦୯: ନିମାପଡ଼ା ଓ ଗୋପ ଦେଇ ଭୁବନେଶ୍ୱରରୁ କୋଣାର୍କ ନୂଆ ରେଳଲାଇନ୍ ଯିବ । ଏଥିପାଇଁ ଫାଇନାଲ୍ ଲୋକେସନ୍ (ଚୂଡ଼ାନ୍ତ ସ୍ଥାନ) ସର୍ଭେ କରିବାକୁ ରେଳ ମନ୍ତ୍ରଣାଳୟର ଅନୁମୋଦନ ମିଳିଛି । ଅନୁମୋଦନ ମିଳିବା ନେଇ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ାଙ୍କୁ ଚିଠି ଲେଖି ସୂଚନା ଦେଇଛନ୍ତି ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ।
ନିମାପଡ଼ା ଓ ଗୋପ ଦେଇ ଭୁବନେଶ୍ୱରରୁ କୋଣାର୍କ ନୂଆ ରେଳଲାଇନ୍ ନେବା ବାବଦରେ ପ୍ରଭାତୀ ଗତ ଜୁଲାଇ ୨୮ରେ ରେଳମନ୍ତ୍ରୀ ଅଶ୍ୱିନୀଙ୍କୁ ଚିଠି ଲେଖିଥିଲେ । ଚିଠି ପାଇବା ପରେ ଆବଶ୍ୟକ ପଦକ୍ଷେପ ନେବା ସହ ଏବେ ଭୁବନେଶ୍ୱର-କୋଣାର୍କ ନୂଆ ରେଳଲାଇନ୍ ନିମାପଡ଼ା ଓ ଗୋପ ଦେଇ ଯିବ ବୋଲି ସୂଚନା ଦେଇଛନ୍ତି । ଏଥିପାଇଁ ସେ ରେଳମନ୍ତ୍ରୀ ଅଶ୍ୱିନୀଙ୍କୁ କୃତଜ୍ଞତା ଜଣାଇଛନ୍ତି । ସୋସିଆଲ୍ ମିଡିଆରେ ସେ ଉଲ୍ଲେଖ କରିଛନ୍ତି ଯେ, ଏହି ବହୁ ପ୍ରତୀକ୍ଷିତ ରେଳ ପ୍ରକଳ୍ପ କେବଳ ରାଜଧାନୀଓ ବିଶ୍ୱ ଐତିହ୍ୟସ୍ଥଳୀ କୋଣାର୍କ ମଧ୍ୟରେ ରେଳ ସଂଯୋଗ ସ୍ଥାପନ କରିବ ନାହିଁ, ବରଂ ଏହା ମୋ ନିର୍ବାଚନମଣ୍ଡଳୀ ଅନ୍ତର୍ଗତ ନିମାପଡ଼ା ଓ ଗୋପବାସୀଙ୍କ ପାଇଁ ମଧ୍ୟ ଆଶୀର୍ବାଦ ସାବ୍ୟସ୍ତ ହେବ ।
ଏହି ନୂଆ ରେଳଲାଇନ୍ ସ୍ଥାନୀୟ ଅର୍ଥନୀତି ଏବଂ କୃଷି କ୍ଷେତ୍ର ପାଇଁ ସହାୟକ ହେବା ସହ ଅଞ୍ଚଳବାସୀ ସ୍ୱାସ୍ଥ୍ୟ ଓ ଶିକ୍ଷା ସେବା ସୁବିଧାରେ ପାଇପାରିବେ । ବିଶେଷ କରି ସ୍ଥାନୀୟ ଗମନାଗମନ ଏବଂ ପର୍ଯ୍ୟଟନ ପାଇଁ ଏହି ପ୍ରକଳ୍ପ ବେଶ ଲାଭଜନକ ସାବ୍ୟସ୍ତ ହେବ । ଏହି ଦୂରଦୃଷ୍ଟିସମ୍ପନ୍ନ ପ୍ରକଳ୍ପ ପାଇଁ ଶ୍ରୀ ବୈଷ୍ଣବ ଜୀଙ୍କୁ ଧନ୍ୟବାଦ ଜଣାଉଛି ବୋଲି ପ୍ରଭାତୀ ଉଲ୍ଲେଖ କରିଛନ୍ତି ।
ଉଲ୍ଲେଖଯୋଗ୍ୟ, କୋଣାର୍କ-ଭୁବନେଶ୍ୱର ରେଳପଥକୁ ରେଳ ମନ୍ତ୍ରଣାଳୟ ପକ୍ଷରୁ ମଞ୍ଜୁରି ମିଳବା ଦ୍ୱାରା ନିମାପଡ଼ା ଓ ଗୋପ ଅଞ୍ଚଳରେ ପର୍ଯ୍ୟଟନସ୍ଥଳୀର ବିକାଶ ହେବା ସହ ଆଞ୍ଚଳିକ ପରିବହନ ଓ ଯୋଗାଯୋଗ ମଧ୍ୟ ସୁଗମ ହୋଇପାରିବ ।
