କଟକ, ୧୦/୦୫: ବିବାହ ପ୍ରତିଶ୍ରୁତି ଦେଇ ଜଣେ ମହିଳା ହୋମ୍ଗାର୍ଡଙ୍କ ସହ ଶାରୀରିକ ସମ୍ପର୍କ ରଖିବା ଅଭିଯୋଗରେ ଗିରଫ ଜଗତସିଂହପୁର ଥାନାର ତତ୍କାଳୀନ ଅତିରିକ୍ତ ଆଇଆଇସି ତପନ କୁମାର ନାହାକଙ୍କୁ ହାଇକୋର୍ଟ ଜାମିନ ପ୍ରଦାନ କରିଛନ୍ତି । କଠୋର ସର୍ତ୍ତ ସହ ନିମ୍ନ ଅଦାଲତ ଅଭିଯୁକ୍ତଙ୍କୁ ଜାମିନ ପ୍ରଦାନ କରିବେ ବୋଲି ହାଇକୋର୍ଟ ତାଙ୍କ ଆଦେଶରେ ସ୍ପଷ୍ଟ କରିଛନ୍ତି । ଜାମିନ ସର୍ତ୍ତ ଭାବେ ଶ୍ରୀ ନାହାକ ପ୍ରତି ସୋମବାର ଦିନ ୧୦ଟାରୁ ୧ଟା ମଧ୍ୟରେ ଥାନାରେ ହାଜିରା ପକାଇବେ, ଅନ୍ୟ କୌଣସି ଅପରାଧିକ କାର୍ଯ୍ୟରେ ସାମିଲ ହେବେ ନାହିଁ କି ତାଙ୍କ ବିରୋଧରେ ଥିବା ପ୍ରମାଣ ନଷ୍ଟ କରିବେ ନାହିଁ । ଏହାବାଦ୍ ଶ୍ରୀ ନାହାକ ସରକାରୀ ଜମିରେ ଶହେଟି ଆମ୍ବ ଓ ନିମ ଆଦି ଗଛ ଲଗାଇବେ । ଗଛ ଲଗାଇବା ପାଇଁ ଡିଏଫ୍ଓ ଆବଶ୍ୟକ ସହାୟତା ଯୋଗାଇ ଦେବେ । ଅଭିଯୁକ୍ତ ଗଛ ଲଗାଇଛନ୍ତି କି ନାହିଁ ସ୍ଥାନୀୟ ଥାନା ଅଧିକାରୀ ତଦାରଖ କରିବେ । କୌଣସି ଗୋଟେ ସର୍ତ୍ତ ଉଲ୍ଲଂଘନ କଲେ ଜାମିନ ଖାରଜ ହେବ ବୋଲି ହାଇକୋର୍ଟର ବିଚାରପତି ଜଷ୍ଟିସ୍ ଏସ୍.କେ. ପାଣିଗ୍ରାହୀ ନିର୍ଦ୍ଦେଶ ଦେଇଛନ୍ତି ।
ମାମଲାରୁ ଜଣାଯାଇଛି ଯେ, ୨୦୨୪ ନଭେମ୍ବର ୧୭ରେ ଶ୍ରୀ ନାହାକ ହୋମ୍ଗାର୍ଡଙ୍କୁ ପାରାଦୀପ ବାଲିଯାତ୍ରା ଦେଖାଇବା ପାଇଁ ଡାକି ନେଇ ଜଣେ ସମ୍ପର୍କୀୟଙ୍କ ଘରକୁ ନେଇ ଯାଇଥିଲେ । ପ୍ରଥମ ପତ୍ନୀଙ୍କୁ ଛାଡ଼ପତ୍ର ଦେଇ ହୋମଗାର୍ଡଙ୍କୁ ବିବାହ ପ୍ରତିଶ୍ରୁତି ଦେଇ ସେଠାରେ ଶ୍ରୀ ନାହାକ ତାଙ୍କ ସହ ଶାରୀରିକ ସମ୍ପର୍କ ରଖିଥିଲେ । ତେବେ ଶ୍ରୀ ନାହାକଙ୍କ ଅନ୍ୟ ମହିଳାଙ୍କ ସହ ସମ୍ପର୍କ ଥିବା ଜାଣିବା ପରେ ମହିଳା ହୋମ୍ଗାର୍ଡ ପ୍ରତିବାଦ କରିଥିଲେ । ଏହାକୁ ନେଇ ବିବାଦ ସୃଷ୍ଟି ହୋଇଥିଲା । ମହିଳା ହୋମ୍ଗାର୍ଡ ଶ୍ରୀ ନାହାକଙ୍କ ନାଁରେ ଏତଲା ଦେବା ପରେ ତାଙ୍କୁ ଗତ ଫେବ୍ରୁଆରୀ ୧୯ରେ ଗିରଫ କରାଯାଇଥିଲା । ଆବେଦନକାରୀଙ୍କ ପକ୍ଷରୁ ଆଇନଜୀବୀ ଦେବସ୍ନାନ ଦାସ ମାମଲା ପରିଚାଳନା କରୁଥିଲେ।
