ଭୁବନେଶ୍ୱର,୦୬/୧୦: ଆଜି କୁମାର ପୂର୍ଣ୍ଣିମା ଏବଂ ଏକ ମାସ ଧରି ଚାଲିଥିବା ଜହ୍ନି ଓଷାର ଶେଷ ଦିନ । କୁମାରୀ କନ୍ୟାମାନେ ସୂର୍ଯ୍ୟ ଉଦୟ ପୂର୍ବରୁ ସ୍ନାନ କରି ନୂଆ ପୋଷାକ ପରିଧାନ କରିଥିଲେ । ଏହା ପରେ ମା’ ବୃନ୍ଦାବତୀଙ୍କ ନିକଟରେ ଗୁଆ, ଲିଆ, କଷି ଜହ୍ନି ଦେଇ ଆଞ୍ଜୁଳି ଟେକିଲେ ।
କୁମାର ପୂର୍ଣ୍ଣିମା ଓଡ଼ିଶାର ଏକ ବିଶେଷ ପର୍ବ । ଏହା କୁମାରୋତ୍ସବ ବା କୋଜାଗର ପୂର୍ଣ୍ଣିମା ନାମରେ ମଧ୍ୟ ଜଣାଶୁଣା । ଆଶ୍ୱିନ ମାସ ପୂର୍ଣ୍ଣିମା ତିଥିରେ ଏହି ପର୍ବଟି ପାଳିତ ହୁଏ । ଏହି ପୂର୍ଣ୍ଣିମା ଶରତ ଋତୁରେ ପଡ଼ୁଥିବାରୁ କେତେକ ସ୍ଥାନରେ ଏହାକୁ ଶରତ ପୂର୍ଣ୍ଣିମା ମଧ୍ୟ କୁହାଯାଏ । ଏହିଦିନ ମା’ ଲକ୍ଷ୍ମୀ ଦେବୀଙ୍କର ଆରାଧନା କରାଯାଉଥିବାରୁ ଏହାକୁ ଗଜଲକ୍ଷ୍ମୀ ପୂଜା ବା କୋଜାଗାର ଲକ୍ଷ୍ମୀ ପୂଜା ମଧ୍ୟ କୁହାଯାଏ । ଏହି ଦିନ ଓଡ଼ିଶାବାସୀ ତୁଳସୀ ଚଉରା, ଗଜଲକ୍ଷ୍ମୀ, ଚନ୍ଦ୍ର, ସୂର୍ଯ୍ୟ ଓ କାର୍ତ୍ତିକଙ୍କର ପୂଜା ଆରାଧନା କରି ନିଜର ସୁଖ, ସୌଭାଗ୍ୟ, ଯଶ, ଧନ ଓ ପୌରୁଷ କାମନା କରିଥାନ୍ତି । ଓଡ଼ିଶାରେ ଏହି ପର୍ବ ସାଧାରଣତଃ କୁମାରୀ କନ୍ୟାମାନେ କାର୍ତ୍ତିକେୟଙ୍କ ଭଳି ସୁନ୍ଦର ଜୀବନସାଥୀ ପାଇବା ପାଇଁ କରିଥାନ୍ତି ।
ସୋମବାର ସନ୍ଧ୍ୟାରେ ଚାନ୍ଦ ପୂଜା ହେବ । ସେଥିଲାଗି ବିଭିନ୍ନ ଫଳମୂଳ ଓ ଆଞ୍ଜୁଳି ଟେକା ଲିଆରେ ଚାନ୍ଦ ତିଆରି ହେବ । ଚନ୍ଦ୍ର ଉଦୟ ହେବା ବେଳକୁ କୁମାରୀମାନେ ଚାନ୍ଦ ପୂଜା କରିବେ ଏବଂ ଭୋଗ ଚାନ୍ଦକୁ ଦେଇ ବ୍ରତ ଶେଷ କରିବେ । ଏବେ ଚାହିଦାକୁ ଦେଖି ବଜାରରେ ଆଖୁ ଗୋଟେ ଖଣ୍ଡ ୧୦ରୁ ୨୦ଟଙ୍କା, ନଡ଼ିଆ ଗୋଟାକୁ ୪୦ରୁ ୫୦ଟଙ୍କାରେ ବିକ୍ରି ହେଉଛି । ଗାଁମାନଙ୍କରେ କୁମାର ପୂର୍ଣ୍ଣିମାରେ ରାତି ଉଜାଗର ରହି କୁମାରୀମାନେ ବିଭିନ୍ନ ଖେଳକୌତୁକରେ ମଜ୍ଜି ରହନ୍ତି ।
କୁମାର ପୂର୍ଣ୍ଣିମା ଉପଲକ୍ଷେ ରବିବାର ସନ୍ଧ୍ୟାରେ ରାଜଧାନୀର ବିଭିନ୍ନ ମାର୍କେଟ୍ରେ ନାହିଁ ନଥିବା ଗହଳି ଦେଖିବାକୁ ମିଳିଥିଲା । ମାର୍କେଟ୍ ବିଲ୍ଡିଂ, ଏକନମ୍ବର ହାଟ ସାଙ୍ଗକୁ ଜନପଥରେ ଥିବା ବିଭିନ୍ନ ପୋଷାକ ଓ ପ୍ରସାଧନ ସାମଗ୍ରୀ ଦୋକାନରେ ଆଜି ଦିନ ତମାମ ଝିଅମାନଙ୍କ ଭିଡ଼ ଲାଗିଥିଲା । ରବିବାର ଛୁଟି ଦିନ ହୋଇଥିବାରୁ ଅପରାହ୍ନ ୪ଟା ପରେ ଏକ ନମ୍ବର ହାଟରେ ଚାଲିବା ବି ଅସମ୍ଭବ ହୋଇପଡ଼ିଥିଲା ।
