ବେରୁଟ୍,୧୧/୦୧: ଲେବାନନରେ ଦୀର୍ଘ ରାଜନୈତିକ ଅସ୍ଥିରତା ଭିତରେ ସେନା କମାଣ୍ଡର ଜୋସେଫ୍ ଔନ ନୂଆ ରାଷ୍ଟ୍ରପତି ହୋଇଛନ୍ତି । ଗୁରୁବାର ସଂସଦରେ ୨ ରାଉଣ୍ଡ ଭୋଟିଂ ପରେ ୬୦ ବର୍ଷୀୟ ଔନ୍ଙ୍କୁ ଏହି ଦାୟିତ୍ୱ ମିଳିଛି । ୨ ବର୍ଷ ହେଲା ଏହି ପଦ ଖାଲି ଥିବାବେଳେ ରାଷ୍ଟ୍ରପତି ବାଛିବା ଲାଗି ଅଦ୍ୟାବଧି ୧୨ ଥର ଉଦ୍ୟମ ହୋଇଛି ।
ପ୍ରଥମ ରାଉଣ୍ଡରେ ଜୋସେଫ୍ଙ୍କୁ ୧୨୮ରୁ ୭୧ ଭୋଟ ମିଳିଥିଲା, ଯାହା କି ବହୁମତ ୮୬ଠାରୁ କମ୍ ଥିଲା । ଦ୍ୱିତୀୟ ରାଉଣ୍ଡରେ ତାଙ୍କୁ ୬୫ ଭୋଟ ଆବଶ୍ୟକ ଥିଲା । ଏଥିରେ ତାଙ୍କୁ ୯୯ ଭୋଟ ମିଳିବା ଯୋଗୁ ସେ ରାଷ୍ଟ୍ରପତି ନିର୍ବାଚିତ ହୋଇଛନ୍ତି । ସାଧାରଣତଃ ଲେବାନନରେ ଆର୍ମି କମାଣ୍ଡର କିମ୍ବା ସରକାରୀ କର୍ମଚାରୀ ଇସ୍ତଫା ଦେବାର ୨ ବର୍ଷ ଭିତରେ ରାଷ୍ଟ୍ରପତି ହୋଇପାରି ନ ଥାନ୍ତି । କିନ୍ତୁ ଔନଙ୍କ କ୍ଷେତ୍ରରେ ଏହା ହୋଇନାହିଁ । ଇସ୍ରାଏଲ ଏବଂ ଲେବାନନର ଆତଙ୍କୀ ଗୋଷ୍ଠୀ ହିଜ୍ବୁଲ୍ଲା ମଧ୍ୟରେ ନିକଟରେ ଯୁଦ୍ଧବିରତି ହୋଇଥିବାବେଳେ ଏବେ ଲେବାନନରେ ରାଷ୍ଟ୍ରପତି ନିର୍ବାଚନ ହୋଇଛି । ହିଜ୍ବୁଲ୍ଲାକୁ ନିୟନ୍ତ୍ରଣ କରିବା ଔନ୍ଙ୍କ ପାଇଁ ବଡ଼ ଚ୍ୟାଲେଞ୍ଜ ହେବ। ରାଷ୍ଟ୍ରପତି ନିର୍ବାଚନ ପାଇଁ ହିଜ୍ବୁଲ୍ଲା ସେଠାକାର ଖ୍ରୀଷ୍ଟିୟାନ ସମୁଦାୟର ଏକ ପାର୍ଟିର ମୁଖ୍ୟ ସୁଲେମାନ୍ ଫ୍ରାଙ୍ଗିହ୍ଙ୍କୁ ସମର୍ଥନ ଦେବାକୁ ଘୋଷଣା କରିଥିଲା । ସୁଲେମାନ ପୂର୍ବତନ ରାଷ୍ଟ୍ରପତି ଅସଦଙ୍କ ଘନିଷ୍ଠ ଭାବେ ଜଣା । କିନ୍ତୁ ସୁଲେମାନ ବୁଧବାର ରାଷ୍ଟ୍ରପତି ଦୌଡ଼ରୁ ନିଜ ନାଁ ପ୍ରତ୍ୟାହାର କରିଥିଲେ ।
