କଟକ,୦୩/୦୮:କଟକ ଜିଲ୍ଲା ଗ୍ରାମାଞ୍ଚଳ ପୁଲିସକୁ ବଡ଼ ସଫଳତା । ଧରାପଡ଼ିଲା ଦୁର୍ଦ୍ଦାନ୍ତ ଡକାୟତି ଗ୍ୟାଙ୍ଗ। ଏଥିସହ ସେମାନଙ୍କଠାରୁ ସୁନାରୂପା ଅଳଙ୍କାର ସହ ବନ୍ଧୁକ ଜବତ ହୋଇଛି । ସୂଚନା ମୁତାବକ, ବିଭିନ୍ନ ସମୟରେ କଟକ , କେନ୍ଦ୍ରାପଡା, ଯାଜପୁର, ପାରାଦୀପ , ଭୁବନେଶ୍ୱର ଅଞ୍ଚଳରେ ବନ୍ଧୁକ ଓ ଭୁଜାଲି ଦେଖାଇ ଲୁଟପାଟ ହେଉଥିଲା । ଏନେଇ କଟକ ଜିଲ୍ଲା ସାଲେପୁର, ନେମାଳ ,ନିଶ୍ଚିନ୍ତକୋଇଲି ଥାନାରେ ବିଭିନ୍ନ ଅଭିଯୋଗ ହୋଇଥିଲା । ଯାହାପରେ ସାଲେପୁର ଏସଡ଼ିପିଓଙ୍କ ନେତୃତ୍ୱରେ ପୁଲିସ ଟିମ ଏହି ଡକାୟତ ଗ୍ୟାଙ୍ଗକୁ ଧରିବାରେ ସଫଳ ହୋଇଛି।
ଧରାପଡିଥିବା ୩ଜଣ ଡକାୟତ ହେଲେ ଗଞ୍ଜାମ ବୁଗୁଡାର ତୋଫାନ ବିଶୋଇ, ପାତମୁଣ୍ଡାଇ କେନ୍ଦ୍ରାପଡାର ସନ୍ତୋଷ ମଲ୍ଲିକ ଓ ଜଗତସିଂହପୁର କୁଜଙ୍ଗର ପ୍ରଭାତ ମଲ୍ଲିକ ବୋଲି ଜଣାପଡ଼ିଛି। ଏମାନଙ୍କ ସହ ଚୋରି ସାମଗ୍ରୀ କିଣିଥିବା କଟକ, ଭୁବନେଶ୍ୱରର ଦିବ୍ୟଜ୍ୟୋତି ନାୟକଙ୍କୁ ମଧ୍ୟ ପୁଲିସ ଗିରଫ କରିଛି। ଅଭିଯୁକ୍ତଙ୍କଠାରୁ ଏକ ବୋଲେରୋ,୩ଟି ମୋଟର ସାଇକେଲ, ଗୋଟିଏ ବନ୍ଧୁକ,୩୩ ଗ୍ରାମ ସୁନା ଓ ୧କିଲୋରୁ ଉର୍ଦ୍ଧ ରୁପା ଅଲଙ୍କାର ଜବତ ହୋଇଛି ବୋଲି କଟକ ଗ୍ରାମାଞ୍ଚଳ ଏସପି ପ୍ରତୀକ ସିଂ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ଏହାସହ ଏହି ଡକାୟତି ଗ୍ୟାଙ୍ଗର ଅନ୍ୟ ସଦସ୍ୟମାନଙ୍କୁ ମଧ୍ୟ ପୁଲିସ ଖୋଜାଖୋଜି କରୁଥିବା ଏସପି କହିଛନ୍ତି।
