ଧଉଳି ୧୯।୮ (ଆପ୍ର): କିଛିଦିନର ନୀରବତା ପରେ ପୁଣି ସକ୍ରିୟ ହୋଇଉଠିଛନ୍ତି ସିନ୍ଧିଚୋର l ଧଉଳି ଥାନା ଅଞ୍ଚଳରେ ପୁଣି ସିନ୍ଧିଚୋରୀ ହୋଇଛି l ଘର ମାଲିକ ଘରେ ନଥିବା ସୁଯୋଗରେ ଚୋରୀ କରିଛନ୍ତି ଦୁର୍ବୃତ୍ତ l ଏପରିକି ଉକ୍ତ ଘରେ ଭଡାରେ ରହୁଥିବା ଲୋକଙ୍କୁ ବାହାର ପଟୁ ତାଲା ପକାଇ ଲୁଟିଛନ୍ତି ଲୁଟେରା l   ଘରର ମୁଖ୍ୟ ଫାଟକର ତାଲା ଭାଙ୍ଗି ଘରେ ପଶି ଆଲମିରା ଲକର ଭାଙ୍ଗି ପାଖାପାଖି ୧୦ ଲକ୍ଷ ଟଙ୍କାର ସୁନାଗହଣା ଲୁଟି ନେଇଥିବା ଅଭିଯୋଗ ହୋଇଛି l 

ଖବର ଅନୁଯାୟୀ ଗୋପୀନାଥପୁର ଗ୍ରାମ କଳିଙ୍ଗ ଅଶୋକ ସିଟିରେ ବିଷ୍ନୁପ୍ରିୟା ନାୟକ ରହୁଛନ୍ତି l ୩ ମହଲା ବିଶିଷ୍ଟ ଏହି କୋଠାରେ ପ୍ରଥମ ଓ ତୃତୀୟ ମହଲା ଘର ଭଡା ଲାଗିଥିବା ବେଳେ ଦ୍ଵିତୀୟ ମହଲାରେ ନିଜେ ବିଷ୍ନୁପ୍ରିୟା ପରିବାର ସହ ରହୁଛନ୍ତି l ସୋମବାର ପୁଅର  ସମ୍ବଲପୁର ବୁର୍ଲାରେ ଆଡ଼ମିସନ ଥିବାରୁ ସ୍ୱାମୀ ଓ ପୁଅଙ୍କ ସହ ବିଷ୍ନୁପ୍ରିୟା ସେଠାକୁ ଯାଇଥିଲେ l ମାତ୍ର ତାଙ୍କର ଘରର ମୁଖ୍ୟ ଫାଟକ ତାଲା ଭଙ୍ଗାଯିବା ସହ ଘରର କବାଟର ଲକ ତଡା ଯାଇଥିବା ମଙ୍ଗଳବାର ସକାଳେ ଭଡା ରହୁଥିବା ଶିବାଜୀ ଚରଣ ମହାନ୍ତିଙ୍କ ଠାରୁ  ଖବର ପାଇଥିଲେ l ପରେ ସେ ଟ୍ରେନ ଯୋଗେ ଘରକୁ ଫେରିଥିଲେ l ସେଠାରେ ଘର ଭିତରକୁ ପ୍ରବେଶ କରିବାପରେ ଆଲମିରାର ଲକର ଭଙ୍ଗା ଯିବା ସହ ଜିନିଷ ଗୁଡିକ ଖଟ ଉପରେ ଏଣେ ତେଣେ  ପଡିଥିଲା l ଦୁର୍ବୃତ୍ତମାନେ ପ୍ରଥମ ଓ ଦ୍ଵିତୀୟ ମହଲାରେ ଭଡାରେ ରହୁଥିବା ଲୋକଙ୍କ ଘର ବାହାରପଟୁ ତାଲା ପକାଇଥିଲେ l ପରେ ଶାବଳରେ ଘରର ମୁଖ୍ୟ କବାଟ ତାଡି ଆଲମିରାରୁ ସୁନାଅଳଙ୍କାର ନେଇ ପଳାଇଥିଲେ l ଚୋରୀ ଯାଇଥିବା ସୁନାଅଳଙ୍କାର ଆନୁମାନିକ ମୂଲ୍ୟ ୧୦ ଲକ୍ଷରୁ ଅଧିକ ହେବ ବୋଲି ଅନୁମାନ କରାଯାଇଛି l ଅଭିଯୋଗ ପାଇ ଧଉଳି ଥାନା ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲା l ସାଇଣ୍ଟିଫିକ ଟିମ ପହଞ୍ଚି ତଦନ୍ତ କରିବା ସହ ସେଠାରେ ଲାଗିଥିବା ସିସିଟିଭି ତଦନ୍ତ କରିଛନ୍ତି l ସେଥିରେ ଏହି ଚୋରୀ ରାତି  ୨ ଟାରୁ  ୩ ଟା ଭିତରେ ହୋଇଥିବା ବେଳେ ୨ ରୁ ୩ ଜଣ ଦୁର୍ବୃତ୍ତ ମୁହଁରେ କପଡା ବାନ୍ଧିଥିବା ଦେଖାଯାଇଛି  l ପୁଲିସ ଏହି ସିସିଟିଭି ସାହାଯ୍ୟରେ ଲୁଟିଆଙ୍କୁ ଧରିବା ପାଇଁ ବିଭିନ୍ନ ଦିଗକୁ ଲକ୍ଷ୍ୟ ରଖି ତଦନ୍ତ କରୁଛି l