ଗୁଣପୁର,୦୫/୧୧: ସ୍ଥାନୀୟ ଅଞ୍ଚଳରେ ଦେଖିବାକୁ ମିଳିଥିଲା ପାଦଚିହ୍ନ । କାଁ ଭାଁ ଶିକାର ସାଙ୍ଗକୁ ବାରମ୍ବାର ସ୍ଥାନ ବଦଳାଇ ଭୟ ସୃଷ୍ଟି କରିଥିବା ମହାରାଷ୍ଟ୍ରର ମହାବଳ ବାଘ ଏବେ ପୁଣି ଲେଉଟିଛି । କିଛିଦିନ ତଳେ ଏହି ବାଘ ପଡ଼ୋଶୀ ଗଜପତି ଜିଲ୍ଲାର ଚନ୍ଦ୍ରଗିରି ବନଖଣ୍ଡ ଅଞ୍ଚଳ ଦେଇ ଗଞ୍ଜାମ ଜିଲ୍ଲାର ଦିଗପହଣ୍ଡି ବନଖଣ୍ଡରେ ଘୂରି ବୁଲୁଥିବା ଖବର ମିଳିଛି । ଏହାକୁ ନେଇ ସୀମାନ୍ତ ରାୟଗଡ଼ା ଜିଲ୍ଲାର ଚନ୍ଦ୍ରପୁର, ଗୁଡ଼ାରୀ, ଗୁଣପୁର ବନଖଣ୍ଡରେ ହାଇଆଲର୍ଟ ଜାରି କରାଯାଇଛି । ଗଜପତି ଜିଲ୍ଲାର ସୀମାନ୍ତ ରେଞ୍ଜରମାନଙ୍କୁ ସତର୍କ ଦୃଷ୍ଟି ରଖିବାକୁ ନିର୍ଦ୍ଦେଶ ଦିଆଯାଇଥିବା ଗୁଣପୁର ରେଞ୍ଜର ଗଙ୍ଗାଧର ମିଶ୍ର ସୂଚନା ଦେଇଛନ୍ତି । ଏହାକୁ ନେଇ ଗୁଣପୁର ଉପଖଣ୍ଡର ବିଭିନ୍ନ ଗ୍ରାମାଞ୍ଚଳରେ ବାଘ ଆତଙ୍କ ଖେଳିଯାଇଛି ।
ଗତବର୍ଷ ଅଗଷ୍ଟ ମାସରେ ପ୍ରଥମେ ଗୁଣପୁର ସୀମାନ୍ତ ଆନ୍ଧ୍ର ଅଞ୍ଚଳରେ ଗୋଟିଏ ମହାବଳର ପାଦଚିହ୍ନ ଦେଖାଯିବା ପରେ ଲୋକେ ଆତଙ୍କିତ ହୋଇପଡି଼ଥିଲେ । ଏହାର ଦୁଇମାସ ବ୍ୟବଧାନରେ ଏହି ବାଘଟି ଗଜପତି ଜିଲ୍ଲାର ବିଭିନ୍ନ ଅଞ୍ଚଳରେ ବୁଲୁଥିବା ଜଙ୍ଗଲ ବିଭାଗ କ୍ୟାମେରାରୁ ଜଣାପଡ଼ିଥିଲା । ପରେ ଗୁଡ଼ାରୀ ବନଖଣ୍ଡର ପଦ୍ମପୁର ବ୍ଲକ୍ ଲିକିଟିପଦର ପାଖ ଉହାମାରେ ଏକ ବାଛୁରୀ ଶିକାର କରି ରାୟଗଡ଼ା ଜିଲ୍ଲା ଭିତରକୁ ପଶିଥିଲା । ବାଘଟି ପ୍ରାୟ ଦୁଇମାସ ଧରି ବନ ବିଭାଗକୁ ନାକେଦମ୍ କରିଥିଲା । ଅଥଚ ଥରେ ହେଲେ ଟ୍ରାପ୍ କ୍ୟାମେରା କିମ୍ବା କାହା ଆଖିରେ ପଡ଼ିନଥିଲା । ମହାରାଷ୍ଟ୍ରରୁ ୪ ରାଜ୍ୟ ପାରି ହୋଇ ବାଘୁଣି ସନ୍ଧାନରେ ଓଡ଼ିଶା ଆସିଥିବା ବନ ବିଭାଗ ପକ୍ଷରୁ ସେତବେଳେ କୁହାଯାଇଥିଲା । ପରେ ଗଜପତି ଜିଲ୍ଲାକୁ ଫେରି ସେଠାରୁ ଆଉ ସନ୍ଧାନ ମିଳିନଥିଲା । ଠିକ୍ ବର୍ଷେ ପରେ ପୁଣି ବାଘଟି ଗତବର୍ଷର ପୁରୁଣା ଅଞ୍ଚଳକୁ ଫେରିଥିବାରୁ ଜିଲ୍ଲା ଭିତରକୁ ପ୍ରବେଶ କରିବ ବୋଲି ଆଶଙ୍କା କରାଯାଇଛି ।
ଏ ସମ୍ପର୍କରେ ବହୁ ଅଭିଜ୍ଞ ବନ କର୍ମଚାରୀ କହିଛନ୍ତି, ମହାବଳଟି ମୁଖ୍ୟତଃ ଖାଦ୍ୟ, ବାସସ୍ଥାନ ଓ ବାଘୁଣି ସାଥୀ ଖୋଜିବା ପାଇଁ ଆସିଛି । ଅଥଚ ଏ ଅଞ୍ଚଳରେ ଘଞ୍ଚ ଜଙ୍ଗଲ କି ଶିକାର ପାଇଁ ଜଙ୍ଗଲି ପ୍ରାଣୀ ନାହାନ୍ତି । ଓଡ଼ିଶା ଜଙ୍ଗଲରେ ଶିମିଳିପାଳ ଅଭୟାରଣ୍ୟ ଛଡ଼ା ଅନ୍ୟ କୌଣସିଠାରେ ମହାବଳ ବାଘ ନ ଥିବାରୁ ସାଥୀ ବାଘୁଣି ମିଳିବା ମଧ୍ୟ ମୁସ୍କିଲ୍ । ସାଥୀଟିଏ ମିଳିବା ଯାଏଁ ସେ ଏମିତି ଏଣେତେଣେ ଘୂରି ବୁଲିବ । ଏବେ କୋଟଗଡ଼ ଅଭୟାରଣ୍ୟକୁ ଗଲେ ତା’ ପାଇଁ ଖାଦ୍ୟ ଅଭାବ ରହିବ ନାହିଁ । ସେହିପରି କଳାହାଣ୍ଡି ଜିଲ୍ଲାର ନର୍ଲା ଦେଇ ନୂଆପଡ଼ାର ଖଡ଼ିଆଳ ନିକଟ ଶୀତାନଦୀ ପାରି ହେଲେ ଯାଇ ଛତିଶଗଡ଼ ସୀମାନ୍ତ । ସେଠାକାର ଟାଇଗର କରିଡର ପର୍ଯ୍ୟନ୍ତ ପହଞ୍ଚିବା ଯାଏଁ ବି ସାଥୀ ବାଘୁଣି ମିଳିବା ଅସମ୍ଭବ ।
