ନୂଆଦିଲ୍ଲୀ: ଭାରତୀୟ ବଜାରରେ ବହୁ ଲୋକପ୍ରିୟ କାର କମ୍ପାନି ମାରୁତି ସୁଜୁକି ବଡ଼ ନିଷ୍ପତ୍ତି ନେଇଛି। ପ୍ରାୟ ସମସ୍ତ ମଡେଲ୍ର କାର ଉପରେ ଦାମ ବଢ଼ାଇବ କମ୍ପାନି । ଏହି ନୂଆ ଦାମ ଲାଗୁ ହେବା ପରେ ମାରୁତି ସୁଜୁକି କାର ଉପରେ ୩୨, ୫୦୦ ଟଙ୍କା ପର୍ଯ୍ୟନ୍ତ ବୃଦ୍ଧି ପାଇବ । ତେବେ ଏହି ନୂଆ ଦାମ୍ ଫେବ୍ରୁଆରୀ ୧ରୁ ଲାଗୁ ହେବାକୁ ଯାଉଛି । କାର ତିଆରି ଏବଂ ପରିଚାଳନାଗତ ଖର୍ଚ୍ଚ ବୃଦ୍ଧି ପାଇଥିବାରୁ କମ୍ପାନି ଏଭଳି ନିଷ୍ପତ୍ତି ନେଇଥିବା ଜଣାପଡ଼ିଛି । ଏହା ପୂର୍ବରୁ ଜାନୁଆରୀରେ ମଧ୍ୟ କାର ମୂଲ୍ୟ ବଢ଼ାଇଥିଲା କମ୍ପାନି। ସମସ୍ତ ମଡେଲ ଉପରେ କମ୍ପାନି ୪ ପ୍ରତିଶତ ପର୍ଯ୍ୟନ୍ତ ମୂଲ୍ୟ ବୃଦ୍ଧି କରିଥିଲା ।
କମ୍ପାନି ମଡେଲ ଅନୁସାରେ କାର ମୂଲ୍ୟ ବୃଦ୍ଧି କରିଥିବା ବେଳେ ସେଲେରିଓ କାର ମୂଲ୍ୟରେ ସର୍ବାଧିକ ବୃଦ୍ଧି ପାଇଛି। ସେଲେରିଓ କିଣିବାକୁ ହେଲେ ଗ୍ରାହକଙ୍କୁ ଅଧିକ ୩୨,୫୦୦ ଟଙ୍କା ଦେବାକୁ ପଡ଼ିବ । ସେହିଭଳି ପ୍ରିମିୟମ୍ କାର ଇନଭିକ୍ଟୋର ଏକ୍ସ-ସୋରୁମ୍ ମୂଲ୍ୟ ୩୦ ହଜାର ଟଙ୍କା ବୃଦ୍ଧି ପାଇଛି । ବ୍ରେଜା ଏବଂ ଗ୍ରାଣ୍ଡ ବିଟାରା ମୂଲ୍ୟ ୨୦ ହଜାର ଟଙ୍କା ବଢ଼ିଥିବା ବେଳେ ସ୍ବିଫ୍ଟ କାର ଉପରେ ୫ ହଜାର ଟଙ୍କା ବଢ଼ିଛି । ଅଲ୍ଟୋ କେ-୧୦ ଉପରେ ୧୯,୫୦୦ ଟଙ୍କା ବଢ଼ିଥିବା ଜଣାପଡ଼ିଛି । ମାରୁତି ସୁଜୁକି ଫ୍ରଙ୍କସ୍ ଉପରେ ୫,୫୦୦ ଟଙ୍କା ଏବଂ ବଲେନୋ ଉପରେ ୯ ହଜାର ଟଙ୍କା ବଢ଼ାଇଛି କମ୍ପାନି ।
ରିପୋର୍ଟ ଅନୁସାରେ, ମାରୁତି ସୁଜୁକି ଗତବର୍ଷ ଡିସେମ୍ବର ମାସରେ ୧,୭୮,୨୪୮ କାର ବିକ୍ରି କରିଥିଲା। ଯାହା ୨୦୨୩ ତୁଳନାରେ ୩୦ ପ୍ରତିଶତ ଅଧିକ। ମୋଟ ବିକ୍ରିରେ ଘରୋଇ ବିକ୍ରି ୧,୩୨,୫୨୩ ୟୁନିଟ୍ ହୋଇଥିବା ବେଳେ ରପ୍ତାନି ହୋଇଥିଲା ୩୭,୪୧୯ ୟୁନିଟ୍ । ୨୦୨୪-୨୫ ଆର୍ଥିକ ବର୍ଷର ଦ୍ୱିତୀୟ ତ୍ରୈମାସିକ (ଜୁଲାଇ-ସେପ୍ଟେମ୍ବର)ରେ ମାରୁତି ସୁଜୁକି ୩,୦୬୯ କୋଟି ଟଙ୍କାର ଲାଭ କରିଛି। ହେଲେ ବାର୍ଷିକ ଆଧାରରେ ଦେଖିଲେ ଏଥିରେ ୧୭ ପ୍ରତିଶତ ହ୍ରାସ ପାଇଛି । ଗତ ଆର୍ଥିକ ବର୍ଷରେ କମ୍ପାନୀ ଜୁଲାଇ-ସେପ୍ଟେମ୍ବର ତ୍ରୈମାସିକରେ ୩୭୧୭ କୋଟି ଲାଭ କରିଥିଲା। ଜୁଲାଇ-ସେପ୍ଟେମ୍ବର ତ୍ରୈମାସିକରେ କମ୍ପାନୀର ଅପରେସନାଲ ରେଭିନ୍ୟୁ ୩୭,୨୦୩ କୋଟି ଟଙ୍କା ଥିଲା।
