ନୂଆଦିଲ୍ଲୀ,୨୬/୦୩: ବୁଧବାର ଚୀନ୍ରେ ସ୍ଥାନୀୟ ସମୟ ସକାଳ ୧.୨୧ ମିନିଟରେ ପ୍ରବଳ ଭୂକମ୍ପ ଅନୁଭୂତ ହୋଇଥିଲା। ଉତ୍ତର ଚୀନ୍ର ହେଓ୍ବେଇ ପ୍ରଦେଶର ଲେଙ୍ଗଫେଙ୍ଗ ସ୍ଥିତ ୟୋଙ୍ଗକିଙ୍ଗ କାଉଣ୍ଟିରେ ଏହି ଭୂକମ୍ପ ଘଟିଥିଲା। ଏହାର ତୀବ୍ରତା ରିକ୍ଟର ସ୍କେଲରେ ୪.୨ ମାପ କରାଯାଇଥିଲା। ଚାଇନା ଭୂକମ୍ପ ନେଟୱାର୍କ କେନ୍ଦ୍ର ଅନୁଯାୟୀ ଏହି ଭୂକମ୍ପର କେନ୍ଦ୍ରସ୍ଥଳ ଭୂମିଠାରୁ ୨୦ କିଲୋମିଟର ତଳେ ଥିଲା। ଏହି ଭୂକମ୍ପର କେନ୍ଦ୍ର ବେଜିଂ ନିକଟରେ ଥିଲା, ଯେଉଁ କାରଣରୁ ସେଠାରେ ଥିବା ବାସିନ୍ଦାମାନେ ମଧ୍ୟ ସାମାନ୍ୟ ଭୟ ସୃଷ୍ଟି ହୋଇଛି। ଚୀନ୍ର ଆଲର୍ଟ ସିଷ୍ଟମ ତୁରନ୍ତ ଲୋକଙ୍କ ଫୋନରେ ସତର୍କ ବାର୍ତ୍ତା ଜାରି କରିଥିଲା, ଯାହା ଲୋକଙ୍କୁ ସତର୍କ ରହିବାକୁ ସୁଯୋଗ ଦେଇଥିଲା। ସୂଚନାଥାଉକି ଯେ ଜାପାନ ଭଳି ଭୂକମ୍ପ କ୍ଷେତ୍ରରେ ଚୀନ୍ ମଧ୍ୟ ଅନ୍ୟତମ ସମ୍ବେଦନଶୀଳ ଦେଶ। ଏଠାରେ ସମୟ ସମୟରେ ହାଲୁକାରୁ ନେଇ ଗମ୍ଭୀର ତୀବ୍ରତାର ଭୂକମ୍ପ ହୋଇଥାଏ, ବିଶେଷ କରି ଉତ୍ତର ଏବଂ ପଶ୍ଚିମ ଅଞ୍ଚଳରେ ଏହା ଅଧିକ ଦେଖିବାକୁ ମିଳେ।
ବଡ଼ କ୍ଷତିର କୌଣସି ରିପୋର୍ଟ ନାହିଁ:
ଚାଇନାର ଉତ୍ତର ହେଓ୍ବେଇ ପ୍ରଦେଶରେ ଘଟିଥିବା ଏହି ୪.୨ ତିବ୍ରତାର ଭୂକମ୍ପ କୌଣସି ଗୁରୁତର କ୍ଷତି ଘଟାଇ ନାହିଁ। ତେବେ ବେଜିଂ ଏବଂ ଏହାର ଆଖପାଖ ଅଞ୍ଚଳରେ କମ୍ପନ ଅନୁଭୂତ ହୋଇଥିଲା। ସ୍ଥାନୀୟ ପ୍ରଶାସନ ପରିସ୍ଥିତି ଉପରେ ନଜର ରଖିଛି ଏବଂ କୌଣସି ଜରୁରୀକାଳୀନ ପଦକ୍ଷେପର ଆବଶ୍ୟକତା ନାହିଁ। ଭୂକମ୍ପ ପରେ କୌଣସି ବଡ଼ କ୍ଷୟକ୍ଷତି ହୋଇନାହିଁ।
ଚୀନ୍ରେ ହୋଇଥିଲା ଶକ୍ତିଶାଳୀ ଭୂମିକମ୍ପ:
ଉଲ୍ଲେଖଯୋଗ୍ୟ ଯେ, ୧୨ ମେ ୨୦୦୮ ରେ ସିଚୁଆନ୍ ପ୍ରଦେଶରେ ୭.୯ ତୀବ୍ରତାର ଏକ ଭୂକମ୍ପ ଘଟି ପ୍ରାୟ ୮୭,୦୦୦ ଲୋକଙ୍କର ମୃତ୍ୟୁ ଘଟିଥିଲା ଏବଂ ଲକ୍ଷ ଲକ୍ଷ ଲୋକ ବାସହୀନ ହୋଇଥିଲେ। ଏହି ଭୂକମ୍ପ ବିଦ୍ୟାଳୟ, ଡାକ୍ତରଖାନା ଏବଂ ଘର ସମେତ ଅନେକ ସ୍ଥାନକୁ ଗୁରୁତର ଭାବେ ପ୍ରଭାବିତ କରିଥିଲା। ଭୂକମ୍ପ ପରେ ରିଲିଫ ଏବଂ ଉଦ୍ଧାର କାର୍ଯ୍ୟରେ ବ୍ୟାପକ ଜାତୀୟ ତଥା ଆନ୍ତର୍ଜାତୀୟ ସହଯୋଗ ମିଳିଥିଲା। ଏହି ଭୂକମ୍ପ ଯୋଗୁଁ ଚାଇନାରେ ଭୂକମ୍ପ ପ୍ରତିରୋଧକ କୋଠା ଏବଂ ସଂରଚନାଗୁଡ଼ିକର ବିକାଶ ପ୍ରତି ଅଧିକ ଧ୍ୟାନ ଦିଆଯାଇଥିଲା।
