ଭୁବନେଶ୍ୱର,୨୦/୦୫: ଜୟଦେବ ବିହାରରୁ ନନ୍ଦନକାନନ ଯାଏ ପ୍ରସ୍ତାବିତ ଏଲିଭେଟେଡ୍ ରୋଡ୍ କରିଡର ପ୍ରକଳ୍ପର ଟେଣ୍ଡର ବାତିଲ ହୋଇଛି । ଏଥିପାଇଁ ପ୍ରକଳ୍ପ କାମ ବିଳମ୍ବ ହେବ ବୋଲି ପୂର୍ତ୍ତ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ସୂଚନା ଦେଇଛନ୍ତି । ମେଟ୍ରୋ ରେଳ ପ୍ରକଳ୍ପ ପାଇଁ ମୂଳ ଷ୍ଟ୍ରକ୍ଚରାଲ ଡିଜାଇନ୍ରେ କିଛି ପରିବର୍ତ୍ତନ ହେବ । ଏଥିପାଇଁ ପୁରୁଣା ଟେଣ୍ଡରକୁ ବାତିଲ କରାଯାଇଛି । ଖୁବ୍ଶୀଘ୍ର ନୂଆ ଟେଣ୍ଡର ହେବ ବୋଲି ସୂଚନା ମିଳିଛି ।
ଜୟଦେବ ବିହାରରୁ ନନ୍ଦନକାନନ ଯାଏ ଏଲିଭେଟେଡ୍ କରିଡର ହେବ । ମୁଖ୍ୟ ରାସ୍ତା ଉପରେ ଦୁଇଥାକିଆ ବ୍ରିଜ୍ ହେବ । ଫ୍ଲାଏଓଭର ଉପରେ ମେଟ୍ରୋ ରେଳପଥ ରହିବ । ଫ୍ଲାଏଓଭରରେ ଗାଡ଼ି ଚଳାଚଳ କରିବ । ଏହା ଉପରେ ପୁଣି ଏକ ବ୍ରିଜ୍ ରହିବ । ସେଥିରେ ମେଟ୍ରୋ ଦୌଡ଼ିବ । ରାସ୍ତା ପାଇଁ ଜାଗା ଅଭାବକୁ ଦୂର କରିବା ଏବଂ ଭିଡ଼ ଏଡ଼ାଇବାକୁ ଏଭଳି ଏଲିଭେଟେଡ୍ କରିଡର ତିଆରି ପାଇଁ ଯୋଜନା ହୋଇଥିଲା । ନାଲ୍କୋ ଛକ, ଚନ୍ଦ୍ରଶେଖରପୁର, ଡମଣା ଛକ, ପଟିଆ ଛକ, କିଟ୍ ଛକ ଓ ରଘୁନାଥପୁର ଛକରୁ ଫ୍ଲାଏଓଭରକୁ ଯିବାକୁ/ଓହ୍ଲାଇବାକୁ ସୁବିଧା ରହିବ । ପୂର୍ବରୁ ଏହି ପ୍ରକଳ୍ପ ପାଇଁ ୧୮୦୦ କୋଟି ଟଙ୍କା ଖର୍ଚ୍ଚ ହେବ ବୋଲି ଆକଳନ ହୋଇଥିଲା । ଏଥିପାଇଁ ଡିପିଆର ବା ବିସ୍ତୃତ ପ୍ରକଳ୍ପ ରିପୋର୍ଟ ପ୍ରସ୍ତୁତ ପରେ ଟେଣ୍ଡର ଡକାଯାଇଥିଲା ।
ଓଡ଼ିଶା ସେତୁ ଓ ନିର୍ମାଣ ନିଗମ ଲିମିଟେଡ୍(ଓବିସିସି) ଏହି ଟେଣ୍ଡର ଆହ୍ୱାନ କରିଥିଲା । କିନ୍ତୁ ମେଟ୍ରୋ ରେଳପଥ ପାଇଁ ମୂଳ ଷ୍ଟ୍ରକ୍ଚରାଲ ଡିଜାଇନ୍ରେ କିଛି ପରିବର୍ତ୍ତନ ଆବଶ୍ୟକ ହୋଇଥିଲା । ଫଳରେ ଉକ୍ତ ଟେଣ୍ଡରରେ ସଂଶୋଧନ ପାଇଁ ସରକାରୀ ସ୍ତରରେ ଆଲୋଚନା ହୋଇଥିଲା । ମୂଳ ଷ୍ଟ୍ରକ୍ଚରାଲ ଡିଜାଇନ୍ରେ ପରିବର୍ତ୍ତନ କରି ମେଟ୍ରୋ ପାଇଁ ସ୍ୱତନ୍ତ୍ର କରିଡର ରଖିବାକୁ ହେଲେ ଆହୁରି ଅତିରିକ୍ତ ହଜାରେ କୋଟି ଟଙ୍କା ଆବଶ୍ୟକ ପଡ଼ିବ ବୋଲି ଆକଳନ କରାଯାଇଥିଲା । ଉଚ୍ଚସ୍ତରୀୟ ବୈଠକରେ ଏହା ଉପରେ ଆଲୋଚନା ହେବା ପରେ ଟେଣ୍ଡରକୁ ବାତିଲ କରାଯାଇଛି । ପ୍ରାୟ ସପ୍ତାହେ ତଳୁ ଏହି ଟେଣ୍ଡରକୁ ବାତିଲ କରାଯାଇଛି । ଏବେ ୨୭୦୦ କୋଟି ଟଙ୍କାର ନୂଆ ଟେଣ୍ଡର ପାଇଁ ସରକାରଙ୍କୁ ପ୍ରଶାସନିକ ଅନୁମୋଦନ ମଗାଯାଇଛି । ଅର୍ଥ ବିଭାଗ ପାଖରୁ ଏହି ଅନୁମୋଦନ ମିଳିଲେ ଖୁବ୍ଶୀଘ୍ର ସାନି ଟେଣ୍ଡର ଡକାଯିବ ବୋଲି ଓବିସିସି ପକ୍ଷରୁ ସୂଚନା ଦିଆଯାଇଛି ।
