ନୂଆଦିଲ୍ଲୀ: ଭାରତୀୟ ନୌସେନା ଅପରେସନ୍ ସିନ୍ଦୁରର ଏକ ନୂଆ ମୋର୍ଚ୍ଚା ଖୋଲି ପାକିସ୍ତାନର କରାଚୀରେ ଥିବା ବନ୍ଦରକୁ ଟାର୍ଗେଟ୍ କରିଥିବା ନେଇ ରିପୋର୍ଟ ସାମ୍ନାକୁ ଆସିଛି। ଏହି ଅଭିଯାନ ପହଲଗାମରେ ହୋଇଥିବା ଆତଙ୍କବାଦୀ ହମଲାର ଜବାବ ସ୍ୱରୂପ ଆରମ୍ଭ ହୋଇଥିଲା। ତେବେ ୧୯୭୧ ପରେ ଭାରତୀୟ ନୌସେନା ପାକିସ୍ତାନ ସହ ସିଧାସଳଖ ଯୁଦ୍ଧରେ ଅବତୀର୍ଣ୍ଣ ହୋଇଛି। 

ରିପୋର୍ଟ ଅନୁଯାୟୀ, ଭାରତୀୟ ନୌସେନା କରାଚୀ ବନ୍ଦର ନିକଟସ୍ଥ ଅଞ୍ଚଳରେ ସକ୍ରିୟ ରହି ଆକ୍ରମଣ ଜାରି ରଖିଚି। ଯାହା ପାକିସ୍ତାନର ଅର୍ଥନୀତି ଓ ପ୍ରତିରକ୍ଷା ପାଇଁ ଏକ ଗୁରୁତ୍ୱପୂର୍ଣ୍ଣ କେନ୍ଦ୍ର ଭାବେ ପରିଗଣିତ ହୋଇଥାଏ। ଏକ୍ସରେ ପ୍ରକାଶିତ କିଛି ପୋଷ୍ଟରେ ଦାବି କରାଯାଇଛି ଯେ ଆଇଏନଏସ୍ ବିକ୍ରାନ୍ତ କରାଚୀ ଉପକୂଳରେ ଅପରେସନ୍ ଜାରି ରଖିଛି। ତେବେ ଏନେଇ ଏଯାଏ ଆଧିକାରିକ ସ୍ତରରେ ପୁଷ୍ଟି କରାଯାଇନାହିଁ। 

ଅପରେସନ୍ ସିନ୍ଦୁର ମଙ୍ଗଳବାର ମଧ୍ୟ ରାତିରେ ଆରମ୍ଭ ହୋଇଥିଲା। ଯେଉଁଥିରେ ଭାରତୀୟ ସେନା, ନୌସେନା ଓ ବାୟୁସେନା ମିଳିତ ଭାବେ ପାକିସ୍ତାନ ଏବଂ ପାକିସ୍ତାନ ଅଧିକୃତ କଶ୍ମୀରରେ ଥିବା ୯ଟି ଆତଙ୍କବାଦୀ ଶିବିରକୁ ଧ୍ୱଂସ କରିଥିଲେ। ଏହି ଶିବିରଗୁଡ଼ିକ ଲସ୍କର-ଏ-ତୈବା ଓ ଜୈଶ-ଏ-ମହମ୍ମଦ ସଂଗଠନ ସହ ଜଡ଼ିତ ଥିଲା। ଏହା ସହିତ, ଅପରେସନ୍ ସିନ୍ଦୁର ୨.୦ ଅଧୀନରେ ଲାହୋରର ଏୟାର ଡିଫେନ୍ସ ସିଷ୍ଟମକୁ ଧ୍ୱଂସ କରିଦିଆ ଯାଇଥିଲା। 

ପାକିସ୍ତାନ ପକ୍ଷରୁ ବୁଧବାର ରାତିରେ ଭାରତର ୧୫ଟି ସହରରେ ଡ୍ରୋନ୍ ଓ ମିସାଇଲ ଆକ୍ରମଣର ପ୍ରୟାସ କରାଯାଇଥିଲା। କିନ୍ତୁ ଭାରତୀୟ ପ୍ରତିରକ୍ଷା ବ୍ୟବସ୍ଥା ଏହାକୁ ବିଫଳ କରିଦେଇ ଥିଲା। କରାଚୀରେ ନୌସେନାର ନୂଆ ଅପରେସନ୍ ସମ୍ପର୍କରେ ସ୍ପଷ୍ଟ ବିବରଣୀ ମିଳିନଥିବା ବେଳେ, ଏହି ଅଞ୍ଚଳରେ ଉତ୍ତେଜନା ବୃଦ୍ଧି ପାଇଛି। ପାକିସ୍ତାନର KSE 100 ଷ୍ଟକ୍ ଇଣ୍ଡେକ୍ସ ୭.୨% ହ୍ରାସ ପାଇଛି। ଯାହା ପାକିସ୍ତାନରେ ଆଗକୁ ହେବାକୁ ଥିବା ଘୋର ଅର୍ଥନୈତିକ ଅସ୍ଥିରତାକୁ ସୂଚାଇଛି। 

ଭାରତୀୟ ଅଧିକାରୀମାନେ ଅପରେସନ୍ ସିନ୍ଦୁରକୁ ଆତଙ୍କବାଦ ବିରୋଧରେ ଏକ ଅଣ-ଉତ୍ତେଜନାମୂଳକ କାର୍ଯ୍ୟାନୁଷ୍ଠାନ ବୋଲି ଦାବି କରିଛନ୍ତି। ତେବେ, ଏହି ଘଟଣା ଭାରତ-ପାକିସ୍ତାନ ମଧ୍ୟରେ ଥିବା ସମ୍ପର୍କକୁ ଆହୁରି ଜଟିଳ କରିଛି।