ନୂଆଦିଲ୍ଲୀ: ପ୍ରସିଦ୍ଧ ଚିତ୍ରକର ଏମଏଫ ହୁସେନଙ୍କ ଏକ ପେଣ୍ଟିଂ ୧୩.୮ ମିଲିୟନ ଆମେରିକୀୟ ଡଲାର ( ଭାରତୀୟ ଟଙ୍କାରେ ପ୍ରାୟ ୧୧୮ କୋଟି ଟଙ୍କା) ରେ ବିକ୍ରି ହୋଇଛି। ଏମଏଫ ହୁସେନଙ୍କ ପେଣ୍ଟିଂ ଗ୍ରାମଯାତ୍ରା ଆଧୁନିକ ଭାରତୀୟ କଳାର ସବୁଠାରୁ ମହଙ୍ଗା ପେଣ୍ଟିଂ ପାଇଁ ରେକର୍ଡ ରଖିଛି। ଏହି ପେଣ୍ଟିଂକୁ ୧୯୫୦ ଦଶକର ପ୍ରସିଦ୍ଧ ଚିତ୍ରକରଙ୍କ ସବୁଠାରୁ ଗୁରୁତ୍ୱପୂର୍ଣ୍ଣ ଏବଂ ବୃହତ୍ତମ ପେଣ୍ଟିଂ ଭାବରେ ବିବେଚନା କରାଯାଏ।
ଏହି ପେଣ୍ଟିଂ ମାର୍ଚ୍ଚ ୧୯ ତାରିଖରେ ନ୍ୟୁୟର୍କର କ୍ରିଷ୍ଟିରେ ନିଲାମ ହୋଇଛି। ଏହା ପୂର୍ବରୁ ୨୦୨୩ ମସିହାରେ, ଅମ୍ରିତା ଶେରଗିଲଙ୍କ ୧୯୩୭ ମସିହାର ପେଣ୍ଟିଂ "ଦି ଷ୍ଟୋରି ଟେଲର" ମୁମ୍ବାଇରେ ପ୍ରାୟ ୭.୪ ମିଲିୟନ ଆମେରିକୀୟ ଡଲାର (୬୧.୮ କୋଟି ଟଙ୍କା) ରେ ନିଲାମ ହୋଇଥିଲା । ଗୋଟିଏ କାନଭାସରେ ଏମଏଫ ହୁସେନଙ୍କ ଚିତ୍ର ପ୍ରାୟ ୧୪ ଫୁଟ ଲମ୍ବା ଏବଂ ୧୩ଟି ପ୍ୟାନେଲ ଅଛି। ଏହି ଗ୍ରାମଯାତ୍ରାର ଅର୍ଥ ହେଉଛି ଗାଁକୁ ତୀର୍ଥଯାତ୍ରା। ଏହାକୁ ହୁସେନଙ୍କ କୃତିର ମୂଳଦୁଆ ବୋଲି ବିବେଚନା କରାଯାଏ।
କ୍ରିଷ୍ଟିର ଦକ୍ଷିଣ ଏସୀୟ ମଡର୍ଣ୍ଣ ଏଣ୍ଡ୍ କଣ୍ଟେପରାରୀ ଆର୍ଟର ମୁଖ୍ୟ ନିଷାଦ ଆୱାରୀ କହିଛନ୍ତି ଯେ,"ଆମେ ମକବୁଲ ଫିଦା ହୁସେନଙ୍କ କାର୍ଯ୍ୟ ଏବଂ ସମଗ୍ର ବର୍ଗ ପାଇଁ ଏକ ନୂତନ ମାନଦଣ୍ଡ ମୂଲ୍ୟ ସ୍ଥିର କରିବାର ଅଂଶ ହୋଇ ଆନନ୍ଦିତ। ଏହା ଏକ ଐତିହାସିକ ମୁହୂର୍ତ୍ତ ଏବଂ ଆଧୁନିକ ଏବଂ ସମକାଳୀନ ଦକ୍ଷିଣ ଏସୀୟ କଳା ବଜାରର ଅସାଧାରଣ ପ୍ରଗତି ଜାରି ରଖିଛି ।
ଏମଏଫ ହୁସେନଙ୍କ ସର୍ବାଧିକ ମୂଲ୍ୟରେ ବିକ୍ରି ହୋଇଥିବା ଚିତ୍ରଟି ୧୯୫୪ ମସିହାରେ ଭାରତ ଛାଡି ଚାଲିଯାଇଥିଲା। ୟୁକ୍ରେନରେ ଜନ୍ମିତ ନରବେ ଡାକ୍ତର ଲିଓନ୍ ଏଲିଆସ୍ ଭୋଲୋଡାର୍ସ୍କି ଏହି ଚିତ୍ରଟିକୁ କିଣିଥିଲେ। ସେ ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ପାଇଁ ଏକ ଥୋରାସିକ୍ ସର୍ଜରୀ ତାଲିମ କେନ୍ଦ୍ର ସ୍ଥାପନ କରିବା ପାଇଁ ନୂଆଦିଲ୍ଲୀ ଆସିଥିଲେ। ୧୯୬୪ ମସିହାରେ ଭୋଲୋଡାର୍ସ୍କି ଏହି ଚିତ୍ରଟିକୁ ଓସ୍ଲୋ ବିଶ୍ୱବିଦ୍ୟାଳୟ ହସ୍ପିଟାଲକୁ ଦେଇଥିଲେ।
୧୭ ସେପ୍ଟେମ୍ବର ୧୯୧୫ରେ ମହାରାଷ୍ଟ୍ରର ପନ୍ଧରପୁରରେ ଜନ୍ମଗ୍ରହଣ କରିଥିବା ଏମଏଫ ହୁସେନ ଭାରତର ସବୁଠାରୁ ଗୁରୁତ୍ୱପୂର୍ଣ୍ଣ ଏବଂ ଲୋକପ୍ରିୟ କଳାକାର ମାନଙ୍କ ମଧ୍ୟରୁ ଜଣେ ଥିଲେ। ତାଙ୍କର ଚିତ୍ର ଗୁଡ଼ିକ ସାରା ବିଶ୍ୱରେ କଳା ପ୍ରତି ସମ୍ମାନ ଆଣିଥିଲା। ତାଙ୍କର ୯ ଜୁନ୍ ୨୦୧୧ରେ ୯୫ ବର୍ଷ ବୟସରେ ମୃତ୍ୟୁ ହୋଇଥିଲା। ସେ ଅନେକ ମହାନ କୃତି ଛାଡି ଯାଇଛନ୍ତି।
