କଟକ/ନରସିଂହପୁର,୨୪/୦୭: ରାତିରେ ଘରକୁ ଫେରୁଥିବା ବେଳେ ବାଇକ୍ରୁ ତେଲ ସରିଗଲା । ପେଟ୍ରୋଲ ପମ୍ପ୍ ଯାଇ ତେଲ ମାଗିବାରୁ ବୋତଲରେ ପେଟ୍ରୋଲ ଦେଇ ହେବନି ବୋଲି କୁହାଗଲା । ଘାଟି ରାସ୍ତାରେ ବାଇକ୍ ରଖି ଘରକୁ କେମିତି ଯିବେ? ବାଧ୍ୟ ହେଇ ପିକ୍ଅପ୍ ଭ୍ୟାନ୍ ଭଡ଼ା କରି ସେଥିରେ ବାଇକ୍ ଲଦି ତେଲ ଟାଙ୍କି ଯାଏ ଆଣିଲେ । ପିକ୍ଅପ୍ ଉପରେ ଚଢ଼ି ପମ୍ପ କର୍ମଚାରୀ ପେଟ୍ରୋଲ ପକାଇବା ପରେ ବାଇକ୍ ଷ୍ଟାର୍ଟ କରି ଘରକୁ ଗଲେ ବାଇକ୍ ଚାଳକ । ଏଭଳି ଏକ ରୋଚକ ଘଟଣା ଦେଖିବାକୁ ମିଳିଛି କଟକ ଜିଲ୍ଲା ନରସିଂହପୁର ଅଞ୍ଚଳରେ ।
ନରସିଂହପୁର ନୂଖାପଡ଼ା ଅଞ୍ଚଳର ଜଣେ ବ୍ୟକ୍ତି କୌଣସି କାମରେ ଅନୁଗୁଳ ଯାଇଥିଲେ । ଘରକୁ ଫେରୁଥିବା ବେଳେ ରାତି ପ୍ରାୟ ୮ଟା ବେଳକୁ ନରସିଂହପୁର-ଅନୁଗୁଳ ଘାଟିରେ ତାଙ୍କ ବାଇକ୍ରୁ ତେଲ ସରିଗଲା । ନିକଟରେ ଥିବା କିଛି ପେଟ୍ରୋଲ ପମ୍ପ୍କୁ ଯାଇ ବୋତଲରେ ବ୍ୟକ୍ତି ଜଣକ ପେଟ୍ରୋଲ ମାଗିଲେ । କିନ୍ତୁ ପେଟ୍ରୋଲ ପମ୍ପ୍ ମାନଙ୍କୁ ଜାରି ହୋଇଥିବା ନିର୍ଦ୍ଦେଶ ଅନୁସାରେ ବୋତଲରେ ପେଟ୍ରୋଲ ଦେବାକୁ ମନା କରିଦିଆଗଲା । ଫଳରେ କୌଣସି ବାଟ ନପାଇ ଅନ୍ୟ କିଛି ଗାଡ଼ିରୁ ସହାୟତା ବି ମାଗିଥିଲେ । କିନ୍ତୁ କେହି ନିଜ ଗାଡ଼ିରୁ ପେଟ୍ରୋଲ କାଢ଼ି ଦେଲେନାହିଁ । ଘାଟି ରାସ୍ତାରେ ନେଟ୍ୱକ୍ ନ ଥିବାରୁ ଘରକୁ ମୋବାଇଲ୍ ସଂଯୋଗ ବି ହୋଇପାରିଲାନାହିଁ ।
ଶେଷରେ ଏହି ବାଟ ଦେଇ ନରସିଂହପୁର ଅଭିମୁଖେ ଯାଉଥିବା ଏକ ଖାଲି ପିକ୍ଅପ୍ର ଭ୍ୟାନ୍ରେ ବ୍ୟକ୍ତି ଜଣକ ସେଥିରେ ବାଇକ୍ ଲଦି ନରସିଂହପୁର ପର୍ଯ୍ୟନ୍ତ ଆଣିଥିଲେ । ନରସିଂହପୁର ଶ୍ରୀରାମବଜାର ନିକଟରେ ଥିବା ପଟ୍ଟନାୟକ ପେଟ୍ରୋଲ୍ ପମ୍ପ୍ରେ ବାଇକ୍ରେ ପେଟ୍ରୋଲ ପକାଇ ନିଜ ଘରକୁ ଫେରିଥିଲେ । ଏହାର ଏକ ଭିଡିଓ ସୋସିଆଲ୍ ମିଡିଆରେ ଭାଇରାଲ୍ ହେବାରେ ଲାଗିଛି । ରାସ୍ତାରେ ଯା’ଆସ ବେଳେ ଗାଡ଼ିରୁ ହଠାତ୍ ପେଟ୍ରୋଲ ସରିଯିବା ପରେ କେତେ ଯେ ହଇରାଣ ହେଉଛନ୍ତି ତାହା ଏଥିରୁ ସ୍ପଷ୍ଟ ହେଉଛି ।
