ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି (ରବିବାର) G20 ଶିଖର ସମ୍ମିଳନୀ ଅବସରରେ ଜୋହାନ୍ସବର୍ଗରେ ଦକ୍ଷିଣ ଆଫ୍ରିକାର ରାଷ୍ଟ୍ରପତି ସିରିଲ୍ ରାମାଫୋସାଙ୍କୁ ଭେଟିଛନ୍ତି । ଏହି ସମୟରେ ବୈଦେଶିକ ମନ୍ତ୍ରୀ ଡକ୍ଟର ଏସ୍. ଜୟଶଙ୍କର ମଧ୍ୟ ଏହି ବୈଠକରେ ଭାରତୀୟ ପ୍ରତିନିଧିମଣ୍ଡଳର ଏକ ଅଂଶ ଥିଲେ। ବୈଠକ ସମୟରେ, ଦୁଇ ଦେଶର ନେତା ମାନେ ବିଭିନ୍ନ ପ୍ରସଙ୍ଗରେ ସହଯୋଗ ଉପରେ ଆଲୋଚନା କରିଛନ୍ତି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ଏଠାରେ IBSA ନେତାଙ୍କ ବୈଠକରେ ଅଂଶଗ୍ରହଣ କରିଥିଲେ । ଏହି ସମୟରେ ଭାରତ, ବ୍ରାଜିଲ୍ ଏବଂ ଦକ୍ଷିଣ ଆଫ୍ରିକାକୁ ନେଇ ଗଠିତ ତ୍ରିକୋଣୀୟ ଫୋରମ୍ ମଧ୍ୟରେ ସହଯୋଗକୁ ଆହୁରି ଗଭୀର କରିବା ପାଇଁ ଭାରତର ପ୍ରତିବଦ୍ଧତାକୁ ଦୋହରାଇଥିଲେ । ପ୍ରଧାନମନ୍ତ୍ରୀ ମୋଦି G20 ଶିଖର ସମ୍ମିଳନୀ ଅବସରରେ ଜୋହାନ୍ସବର୍ଗରେ ଦକ୍ଷିଣ ଆଫ୍ରିକାର ରାଷ୍ଟ୍ରପତି ସିରିଲ୍ ରାମାଫୋସା ଏବଂ ବ୍ରାଜିଲ୍ ରାଷ୍ଟ୍ରପତି ଲୁଇଜ୍ ଇନାସିଓ ଲୁଲା ଡା ସିଲଭାଙ୍କୁ ଭେଟିଥିଲେ। ସୂଚନାଥାଉକି, IBSA ଗୋଷ୍ଠୀ ସହଯୋଗକୁ ପ୍ରୋତ୍ସାହିତ କରିବା, ବିଶ୍ୱ ଶାସନ ବ୍ୟବସ୍ଥାକୁ ଉନ୍ନତ କରିବା ଏବଂ ବିକାଶଶୀଳ ଦେଶମାନଙ୍କ ମଧ୍ୟରେ ସହଯୋଗ ବୃଦ୍ଧି କରିବା ଉପରେ ଧ୍ୟାନ ଦିଏ।
ସେପ୍ଟେମ୍ବର ମାସରେ, ବୈଦେଶିକ ମନ୍ତ୍ରୀ ଏସ. ଜୟଶଙ୍କର, ବ୍ରାଜିଲର ବୈଦେଶିକ ମନ୍ତ୍ରୀ ମୌରୋ ଭିଏରା ଏବଂ ଦକ୍ଷିଣ ଆଫ୍ରିକାର ମନ୍ତ୍ରୀ ସିଣ୍ଡିସିୱେ ଚିକୁଙ୍ଗା ବାର୍ଷିକ ମିଳିତ ଜାତିସଂଘ ସାଧାରଣ ପରିଷଦ ଅଧିବେଶନ ଅବସରରେ ନ୍ୟୁୟର୍କରେ ସାକ୍ଷାତ କରିଥିଲେ। ମନ୍ତ୍ରୀମାନେ ୪୦ ଟି ଦେଶରେ ୫୧ଟି ପ୍ରକଳ୍ପ ସହିତ ଏକ ଦକ୍ଷିଣ-ଦକ୍ଷିଣ ସହଯୋଗ ପଦକ୍ଷେପ IBSA ପାଣ୍ଠିକୁ ସୁଦୃଢ଼ ଏବଂ ବିସ୍ତାର କରିବାକୁ ସହମତ ହୋଇଥିଲେ। ମନ୍ତ୍ରୀମାନେ ଆମେରିକାର ଶୁଳ୍କ ନୀତିକୁ ମଧ୍ୟ ସମାଲୋଚନା କରିଥିଲେ, ଏହା ବିଶ୍ୱକୁ ଅସ୍ଥିର କରିବାର ଆଶଙ୍କା ପ୍ରକାଶ କରିଥିଲେ।
ପୂର୍ବରୁ, ଶନିବାର ଦିନ G20 ଶିଖର ସମ୍ମିଳନୀରେ ସମ୍ବୋଧିତ କରି, ପ୍ରଧାନମନ୍ତ୍ରୀ ମୋଦୀ ବିଶ୍ୱବ୍ୟାପୀ ଦେଶ ମାନଙ୍କୁ ନିଶା ଏବଂ ଆତଙ୍କବାଦ ମଧ୍ୟରେ ସମ୍ପର୍କ ଦୂର କରିବାକୁ ପ୍ରାଥମିକତା ଦେବାକୁ ଅନୁରୋଧ କରିଥିଲେ।
