ନୂଆଦିଲ୍ଲୀ: ଆସାମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୬,୫୦୦ କୋଟି ଟଙ୍କାର ବିକାଶ ପ୍ରକଳ୍ପ ଘୋଷଣା କରିଛନ୍ତି । ପ୍ରଧାନମନ୍ତ୍ରୀ ଆସାମର ଦାରଙ୍ଗରେ ଏକ ସାଧାରଣ ସଭାକୁ ସମ୍ବୋଧିତ କରିଛନ୍ତି । ଏହି ସମୟରେ ସେ କଂଗ୍ରେସକୁ ଟାର୍ଗେଟ କରିଛନ୍ତି । ସେ କହିଛନ୍ତି, ମୁଁ ଭଗବାନ ଶିବଙ୍କର ଭକ୍ତ ଏବଂ ସମସ୍ତ ବିଷ ପିଇ ଯାଉଛି । ସେ ଏହା ମଧ୍ୟ କହିଛନ୍ତି, ଅପରେସନ ସିନ୍ଦୂର ପରେ ଏହା ମୋର ପ୍ରଥମ ଆସାମ ଗସ୍ତ। ମା କାମାକ୍ଷାଙ୍କ ଆଶୀର୍ବାଦରେ ଅପରେସନ ସିନ୍ଦୂରକୁ ବିପୁଳ ସଫଳତା ମିଳିଛି ।
ପ୍ରଧାନମନ୍ତ୍ରୀ କହିଛନ୍ତି, କିଛି ଦିନ ପୂର୍ବରୁ ଆମେ ଭାରତ ରତ୍ନ ଭୂପେନ ହଜାରିକା ଜୀଙ୍କ ଜନ୍ମଦିନ ପାଳନ କରିଥିଲୁ। ଗତକାଲି ମୁଁ ତାଙ୍କ ସମ୍ମାନରେ ଆୟୋଜିତ ଏକ ବହୁତ ବଡ଼ କାର୍ଯ୍ୟକ୍ରମରେ ସାମିଲ ହେବାର ସୁଯୋଗ ପାଇଥିଲି । ବିଜେପିର ଡବଲ ଇଞ୍ଜିନ ସରକାର ଆସାମର ମହାନ ସନ୍ତାନ ଏବଂ ଆମର ପୂର୍ବପୁରୁଷମାନେ ଆସାମ ପାଇଁ ଯେଉଁ ସ୍ୱପ୍ନ ଦେଖିଥିଲେ ତାହା ପୂରଣ କରିବାରେ ପୂର୍ଣ୍ଣ ନିଷ୍ଠାର ସହିତ ନିୟୋଜିତ ଅଛି । ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ଆଜି ମୋତେ କଂଗ୍ରେସ ଦଳର ସଭାପତିଙ୍କ ଏକ ବିବୃତ୍ତି ଦେଖାଇଛନ୍ତି। ଯେଉଁଦିନ ଭାରତ ସରକାର ଏହି ଦେଶର ମହାନ ପୁତ୍ର ଏବଂ ଆସାମର ଗର୍ବ ଭୂପେନ ଜୀଙ୍କୁ ଭାରତ ରତ୍ନରେ ସମ୍ମାନିତ କରିଥିଲେ, ସେହି ଦିନ କଂଗ୍ରେସ ଦଳର ଅଧ୍ୟକ୍ଷ ଏକ ବିବୃତ୍ତି ଦେଇଥିଲେ ଯେ, ମୋଦୀ 'ନର୍ତ୍ତକ-ଗାୟକମାନଙ୍କୁ' ଭାରତ ରତ୍ନ ଦେଉଛନ୍ତି ।
ପ୍ରଧାନମନ୍ତ୍ରୀ ମୋଦୀ କଂଗ୍ରେସକୁ ଟାର୍ଗେଟ କରି କହିଛନ୍ତି, ୧୯୬୨ ମସିହାରେ ଚୀନ୍ ସହିତ ଯୁଦ୍ଧ ପରେ ପଣ୍ଡିତ ନେହେରୁ ଯାହା କହିଥିଲେ, ଉତ୍ତର-ପୂର୍ବାଞ୍ଚଳର ଲୋକଙ୍କର ସେହି କ୍ଷତ ଆଜି ମଧ୍ୟ ଶୁଖିନାହିଁ । କଂଗ୍ରେସର ବର୍ତ୍ତମାନର ପିଢ଼ି ମଧ୍ୟ ସେହି କ୍ଷତ ଉପରେ ଲୁଣ ଢାଳୁଛି । ସାଧାରଣତଃ, ଲୋକମାନେ ମୋତେ ଯେତେ ଇଚ୍ଛା ଗାଳି ଦେଇପାରନ୍ତି। ମୁଁ ଭଗବାନ ଶିବଙ୍କର ଭକ୍ତ, ମୁଁ ସବୁ ବିଷ ପିଇ ଯାଏ । କିନ୍ତୁ ଯେତେବେଳେ ଅନ୍ୟ କାହାକୁ ନିର୍ଲଜ୍ଜ ଭାବରେ ଅପମାନିତ କରାଯାଏ, ମୁଁ ତାହା ସହ୍ୟ କରିପାରେ ନାହିଁ ।
ପ୍ରଧାନମନ୍ତ୍ରୀ ଆହୁରି କହିଛନ୍ତି, ‘ମୁଁ ଜାଣିଛି, କଂଗ୍ରେସର ସମଗ୍ର ଇକୋସିଷ୍ଟମ ଆଜି ମୋତେ ଆକ୍ରମଣ କରିବ। ମୋ ପାଇଁ ଜନସାଧାରଣ ମୋର ଈଶ୍ୱର । ଯଦି ମୋର ଆତ୍ମା ମୋ ଈଶ୍ୱରଙ୍କ ସହ କଥା ହୋଇପାରିବ ନାହିଁ, ତେବେ ଏହା ଆଉ କେଉଁଠାରେ କହିବ । ସେ ମୋର ପ୍ରଭୁ, ସେ ମୋର ପୂଜ୍ୟ, ସେ ମୋର ରିମୋଟ୍ କଣ୍ଟ୍ରୋଲ୍, ମୋ ପାଇଁ ଅନ୍ୟ କୌଣସି ରିମୋଟ୍ କଣ୍ଟ୍ରୋଲ୍ ନାହିଁ ।’
ପ୍ରଧାନମନ୍ତ୍ରୀ ଆହୁରି କହିଛନ୍ତି, ଆଜି ସମଗ୍ର ଦେଶ ଏକ ବିକଶିତ ଭାରତ ଗଠନ ପାଇଁ ଏକତ୍ରିତ ଭାବରେ ଆଗକୁ ବଢ଼ୁଛି। ବିଶେଷକରି ଆମର ଯୁବ ବନ୍ଧୁମାନେ ଆଗମୁ ଆସୁଛନ୍ତି । ସେମାନଙ୍କ ପାଇଁ ବିକଶିତ ଭାରତ ଏକ ସ୍ୱପ୍ନ ଏବଂ ଏକ ସଂକଳ୍ପ। ଏହି ସଂକଳ୍ପରେ ଆମର ଉତ୍ତର-ପୂର୍ବର ବହୁତ ବଡ଼ ଭୂମିକା ଅଛି। ଏବେ ଉତ୍ତର-ପୂର୍ବର ସମୟ ବୋଲି କହିଛନ୍ତି ପ୍ରଧାନମନ୍ତ୍ରୀ ମୋଦୀ ।
